অসম-নাগালেণ্ড সীমান্তত নগা লোকৰ ভূমি আগ্ৰাসনক কেন্দ্ৰ কৰি পুনৰ তীব্ৰ উত্তেজনাৰ সৃষ্টি হৈছে। অসমৰ ভূমিত নগাই বলপূৰ্বকভাৱে প্ৰৱেশ কৰি এখন পকী গেট স্থাপন কৰাৰ লগতে উক্ত অঞ্চলটো নাগালেণ্ডৰ ‘নিউলেণ্ড’ জিলা হিচাপে নামাকৰণ কৰাক লৈ সীমান্তবাসীৰ মাজত তীব্ৰ প্ৰতিক্ৰিয়াৰ সৃষ্টি হৈছে। ইয়াৰ প্ৰতিবাদত দেওবাৰে সীমান্তৰ খিলঞ্জীয়াই উত্তাল প্ৰতিবাদী কাৰ্যসূচী ৰূপায়ণ কৰে।
প্ৰাপ্ত খবৰ অনুসৰি, অসম-নাগালেণ্ড সীমান্তৰ সৰুপথাৰ সমজিলাৰ অন্তৰ্গত চুঙাজান মাজগাঁও পঞ্চায়তৰ নৱমিলনপুৰ আৰু ২ নং শান্তিপুৰ গাঁৱলৈ সোমোৱা পথত নগাই এখন পকী গেট নিৰ্মাণ কৰিছে। অসমৰ ভূমি নাগালেণ্ডৰ অন্তৰ্ভুক্ত কৰাৰ এই প্ৰচেষ্টাক লৈ নৱমিলনপুৰ, মহিমা গাঁও আৰু চুঙাজানৰ দাঁতিকাষৰীয়া ৰাইজে তীব্ৰ প্ৰতিবাদ সাব্যস্ত কৰে। স্থানীয় ৰাইজৰ অভিযোগ যে নগাই বিভিন্ন সময়ত ন ন কৌশলেৰে অসমৰ মাটি দখলৰ চেষ্টা চলাই আহিছে।
সীমান্তৰ ৰাইজে অভিযোগ উত্থাপন কৰিছে যে অসম চৰকাৰে এই গুৰুত্বপূৰ্ণ স্পৰ্শকাতৰ বিষয়সমূহৰ প্ৰতি কোনো ধৰণৰ গুৰুত্ব প্ৰদান কৰা নাই। উল্লেখ্য যে, প্ৰতিবাদস্থলীত সীমান্ত দণ্ডাধীশ প্ৰিয়মজ্যোতি ফুকনৰ লগতে সৰুপথাৰ সমজিলাৰ আৰক্ষী অধীক্ষক দ্বীপেন পাটৰ উপস্থিত হয়। প্ৰতিবাদী ৰাইজে জিলা প্ৰশাসনৰ জৰিয়তে অসম চৰকাৰলৈ এক স্মাৰক পত্ৰ প্ৰদান কৰি অতি শীঘ্ৰেই উক্ত গেটখন উচ্ছেদ কৰিবলৈ দাবী জনায়।
এগৰাকী স্থানীয় লোকে সংবাদ মাধ্যমৰ আগত ক্ষোভ প্ৰকাশ কৰি কয় যে কেন্দ্ৰ আৰু দুই ৰাজ্যতে বিজেপি মিত্ৰজোঁটৰ চৰকাৰ থকাৰ পাছতো অসমৰ ভূমি সুৰক্ষিত নহয়। তেওঁ অভিযোগ কৰে যে সীমান্তত থকা চি আৰ পি এফ (CRPF) বাহিনীয়ে প্ৰায়ে নগাৰ পক্ষ লৈ অসমীয়া লোকক ধমকি দিয়ে।
আন এগৰাকী স্থানীয় ব্যক্তি দ্বীপেন গগৈয়ে কয় যে সীমা সমস্যাটো এক দীৰ্ঘদিনীয়া সমস্যা আৰু ই এতিয়া ভয়াবহ ৰূপ ধাৰণ কৰিছে। তেওঁ সোঁৱৰাই দিয়ে যে কিছুদিন পূৰ্বে নগাই অসমৰ মাটিত থকা ৯৫ টা ঘৰ জ্বলাই দিছিল। চৰকাৰে যদি আগন্তুক নিৰ্বাচনৰ পূৰ্বে সীমান্তৰ খিলঞ্জীয়া লোকক ভূমিৰ পট্টা প্ৰদান নকৰে আৰু এই সমস্যা সমাধান নকৰে, তেন্তে চুঙাজানবাসীয়ে ‘বিকল্প পথ’ বা নিৰ্বাচন বৰ্জনৰ দৰে কঠোৰ সিদ্ধান্ত লবলৈ বাধ্য হ’ব বুলি তেওঁ হুংকাৰ দিয়ে। স্থানীয় মহিলাসকলেও স্পষ্ট কৰি দিয়ে যে তেওঁলোকে জন্মৰে পৰা গোলাঘাট জিলাৰ নিবাসী হিচাপে পৰিচয় দি আহিছে আৰু কোনো পৰিস্থিতিতে নগাৰ গেটৰ তলেৰে অহা-যোৱা কৰি নিজৰ মাটিক নাগালেণ্ড বুলি মানি ল’ব নোৱাৰে।
বৰ্তমান চুঙাজান অঞ্চলত পৰিস্থিতি থমথমীয়াকৈ আছে। অসমৰ ভূমিৰ সুৰক্ষা আৰু খিলঞ্জীয়াৰ অধিকাৰ সাব্যস্ত কৰিবলৈ চৰকাৰে কি পদক্ষেপ গ্ৰহণ কৰে, সেয়া পৰৱৰ্তী সময়ত লক্ষ্যণীয় হ’ব।
