জন্মৰ পিছতেই, দুচকুৰে নিজৰ জন্মদাত্ৰীক চিনিব পৰা নৌহওঁতেই বিচ্ছিন্ন হৈ সাত সাগৰ তেৰ নদীৰ সিপাৰলৈ গুচি যাব লগীয়া হোৱা তেজপুৰৰ এগৰাকী ৩৫ বছৰীয়া যুৱতীয়ে য়ু টিউবত দিয়া আকুল আহ্বানে সকলোৰে হৃদয় চুই গৈছে।
Rajini missing herself নামেৰে যোৱা ৯ ডিচেম্বৰত আপল’ড দিয়া এই ভিডিঅ’টো এতিয়া ছ’চিয়েল মিডিয়াত ঘূৰি ফুৰিছে।
ৰজিনী নামৰ এই যুৱতীগৰাকীয়ে জনোৱা মতে, তেওঁৰ জন্ম হৈছে ১৯৮৩ চনৰ ২৪ ফেব্ৰৱাৰিত। যদিও তেওঁক সঠিককৈ নাজানে, তেওঁৰ জন্মৰ স্থান তেজপুৰেই হ’ব পাৰে বুলি বিভিন্ন তথ্যৰ ভিত্তিত তেওঁ এক অনুমান দাঙি ধৰিছে।
“মই বৰ আকুলভাৱে মোৰ মাৰ পৰিচয় আৰু অন্যান আত্মীয়সকলক বিচাৰি ফুৰিছো।” ৰজিনীয়ে কয়।
নিজৰ জন্মৰ স্থান সম্পৰ্কীয় ধাৰণা দাঙি ধৰি তেওঁ কয়, “শোণিতপুৰ জিলাৰ তেজপুৰ অথবা তেজপুৰৰ ওচৰৰে কোনোবা এঠাইত মোৰ জন্ম হৈছিল।”
আনহাতে মাকৰ নাম ৰেবিয়া আৰু তেওঁ মুচলমান সম্প্ৰদায়ৰ আছিল বুলিও জানিবলৈ দিয়ে ৰজিনীয়ে। অৱশ্যে তেওঁ নিজৰ মাকৰ উপাধি নাজানে বুলি কয়। “মোৰ জন্মৰ সময়ত তেওঁ ৩৫ বছৰীয়া আছিল। গতিকে এতিয়া প্ৰায় ৭০ বছৰ বয়স হ’ব পাৰে।” ৰজিনীয়ে কয়।
ৰজিনীয়ে তেওঁৰ ফেইচবুকৰ টাইমলাইনত লিখে যে তেওঁৰ জন্মৰ চাৰি দিনৰ কোনোবাই তেওঁক কিনি সেই সময়ত তেজপুৰত থকা মিছনেৰিসকলৰ দ্বাৰা পৰিচালিত অনাথ আশ্ৰমলৈ লৈ আনিছিল। এই অনাথ আশ্ৰমটোক মাডাৰ টেৰেছা অনাথ আশ্ৰম বুলি জনা গৈছিল। তাত এবছৰ কটোৱাৰ পিছত তেওঁক কলকাতাৰ শিশু ভৱনলৈ লৈ যোৱা হয়। তাৰ পিছত ২বছৰ বয়সত তেওঁক বেলজিয়ামৰ এটা দম্পতীয়ে তুলি লয় আৰু যোৱা ৩৩ বছৰ তেওঁ বেলজিয়ামতে বাস কৰিছে।
“মোৰ মায়েই মোক স্বেচ্ছাই ত্যাগ কৰিছিল নে নাই মই সেইটো নিশ্চিত নহয়। আৰু “মই যে জীয়াই আছো সেইটো তেওঁ জানে বুলিও মই নাভাবো।” ৰজিনীয়ে কয়।
আনহাতে ৰজিনীৰ মতে, তেওঁক তুলি লোৱা মাক-দেউতাকেও তেওঁক এজনী অনাথ ছোৱালী বুলিহে ভাবে।
তেওঁ যোৱা দুটা বছৰ ধৰি অনাথ আশ্ৰয়গৃহটো আৰু এইটো চলোৱা কৰ্তৃপক্ষৰ সৈতে এই সন্দৰ্ভত যোগাযোগ কৰি আহিছে বুলি জানিবলৈ দিয়ে ৰজিনীয়ে।
