অসমত বসবাস কৰি থকা মুঠ ৭০ গৰাকী প্ৰব্ৰজনকাৰীয়ে শেহতীয়াকৈ নাগৰিকত্ব (সংশোধনী) আইন চমুকৈ ‘কা‘ৰ অধীনত ভাৰতীয় নাগৰিকত্ব বিচাৰি আৱেদন কৰিছে আৰু ইয়াৰে ছগৰাকীক ইতিমধ্যে নাগৰিকত্ব প্ৰদান কৰা হৈছে। অসম বিধানসভাৰ বাজেট অধিৱেশনৰ প্ৰথম দিনটোত উত্থাপিত এক প্ৰশ্নৰ উত্তৰত ৰাজ্য চৰকাৰে এই তথ্য সদৰী কৰে। একেখন অধিৱেশনতে আন এক প্ৰশ্নৰ উত্তৰত চৰকাৰে প্ৰকাশ কৰে যে ৰাজ্যখনত বৰ্তমানলৈকে ১,৭২,৬৭৩ গৰাকী বিদেশী নাগৰিকক চিনাক্ত কৰা হৈছে আৰু ইয়াৰে ৩১,৭৮৬ গৰাকীক ইতিমধ্যে বিতাড়ন কৰা হৈছে।
বিধানসভাত দাখিল কৰা তথ্য অনুসৰি ১৯৫০ চনৰ আইনৰ অধীনত যোৱা বছৰৰ ২ মে‘ৰ পৰা এতিয়ালৈকে ১,৫৭২ গৰাকী অবৈধ প্ৰব্ৰজনকাৰীক বাংলাদেশলৈ বিতাড়ন কৰা হৈছে। বিতাড়িত লোকসকলৰ ভিতৰত শ্ৰীভূমি জিলাৰ পৰা ৮৬৬ গৰাকী আৰু কাছাৰ জিলাৰ পৰা ৩৫৭ গৰাকী প্ৰব্ৰজনকাৰী আছিল। চৰকাৰী প্ৰতিবেদনত লগতে উল্লেখ কৰা হৈছে যে ৰে‘লৱে আৰক্ষীয়ে আটক কৰা ৬৮ গৰাকী অবৈধ প্ৰব্ৰজনকাৰীও বিতাড়ন কৰা লোকসকলৰ ভিতৰত অন্তৰ্ভুক্ত আছে।
উল্লেখযোগ্য যে, ২০১৯ চনত সংসদত গৃহীত হোৱা নাগৰিকত্ব সংশোধনী আইনখন কেন্দ্ৰীয় চৰকাৰে বিধিৱদ্ধভাৱে অধিসূচনা জাৰি কৰাৰ পিছত ২০২৪ চনৰ মাৰ্চ মাহৰ পৰা কাৰ্যকৰী কৰা হয়। এই আইন অনুসৰি ২০১৪ চনৰ ৩১ ডিচেম্বৰ বা তাৰ পূৰ্বে বাংলাদেশ, পাকিস্তান আৰু আফগানিস্তানৰ পৰা ভাৰতত প্ৰৱেশ কৰা হিন্দু, শিখ, বৌদ্ধ, জৈন, পাৰ্চী আৰু খ্ৰীষ্টান ধৰ্মৰ প্ৰব্ৰজনকাৰীসকলক ভাৰতীয় নাগৰিকত্ব প্ৰদান কৰা হ‘ব। অৱশ্যে এই আইনখন প্ৰণয়নৰ পূৰ্বে আৰু পিছত অসমত ব্যাপক প্ৰতিবাদ সাব্যস্ত কৰা হৈছিল আৰু এই প্ৰতিবাদৰ সময়ত কেইবাগৰাকীও লোকৰ প্ৰাণহানি ঘটিছিল।
চলিত সপ্তাহৰ আৰম্ভণিতে মুখ্যমন্ত্ৰী হিমন্ত বিশ্ব শৰ্মাই প্ৰকাশ কৰিছিল যে অসমত বঙালী হিন্দুৰ মাজত সন্দেহযুক্ত ভোটাৰৰ সংখ্যা এক লাখতকৈ কম আৰু তেওঁলোকৰ কোনো এজনো বৰ্তমান ডিটেনচন কেম্পত আৱদ্ধ হৈ থকা নাই। মুখ্যমন্ত্ৰীগৰাকীয়ে লগতে উল্লেখ কৰে যে ভাৰতৰ মহাপঞ্জীয়কে ২০১৯ চনৰ ৰাষ্ট্ৰীয় নাগৰিকপঞ্জীৰ খচৰা চূড়ান্ত কৰাৰ পিছত এই সংখ্যা বৃদ্ধি পোৱাৰ সম্ভাৱনা আছে, কিয়নো তালিকাৰ পৰা বাদ পৰা বঙালী হিন্দুসকলে পৰৱৰ্তী সময়ত ‘কা‘ৰ অধীনত নাগৰিকত্বৰ বাবে আৱেদন কৰিব লাগিব।
