অসমত অহা ১৩ নৱেম্বৰলৈকে চিনেমা হল খোলাৰ কোনো সম্ভাৱনা নাই। এক সংবাদমেল যোগে এই কথা স্পষ্ট কৰি দিছে চিনেমা হল মালিক সন্থাই।
সোমবাৰে চিনেমা হল মালিক সন্থাই কয় যে কেন্দ্ৰীয় চৰকাৰে বলৱৎ কৰা ষ্টেণ্ডাৰ্ড অ’পাৰিটং প্ৰচিডিউৰ(SoPs)ৰ সূচী অসম চৰকাৰে বলৱৎ কৰাৰ পিছতহে ৰাজ্যত চিনেমা হল পুনৰ খোলা হ’ব।
উল্লেখ্য যে কেন্দ্ৰীয় চৰকাৰে SoPsৰ নিৰ্দেশনাৱলী মানি ১৫ অক্টোবৰৰ পৰা দেশত চিনেমা হলসমূহ পুনৰ খুলিব পাৰিব বুলি ঘোষণা কৰিছিল।
ইয়াৰ পিছতে দেশৰ বিভিন্ন ৰাজ্যত যোৱা ১৫ অক্টোবৰৰ পৰা SoPsৰ নিৰ্দেশনাৱলী মানি চিনেমা হলসমূহ পুনৰ খোলা হৈছে যদিও অসমত এতিয়াও চৰকাৰে চিনেমা হল পুনৰ খোলাৰ বাবে অনুমতি প্ৰদান কৰা নাই।
আনহাতে আজি সংবাদ মেলত সন্থাই কেন্দ্ৰীয় চৰকাৰে জাৰি গাইডলাইন সমূহ সংবাদ মাধ্যমৰ লোকৰ আগত প্ৰকাশ কৰিছে সংস্থাই। গাইডলাইনসমূহ হৈছে—
আসন ব্যৱ্স্থাপনা আৰু টিকট বুকিং—
- থিয়েটাৰত প্ৰৱেশ কৰাৰ সময়ত উষ্ণতা স্ক্ৰীণিং আৰু চেনিটাইজড্ কৰাতো বাধ্যতামূলক কৰিব লাগিব।
- শাৰীৰিক দূৰত্ব ৰক্ষা হোৱাকৈ গোলাকাৰ চিহ্ন তৈয়াৰ কৰিব লাগিব।
- ক’ৰ’ণা ভাইৰাছৰ লক্ষণযুক্ত কোনো লোকক থিয়েটাৰত প্ৰৱেশ কৰিবলৈ দিব নোৱাৰিব।
- এখন স্ক্ৰীণ থকা চিনেমা হলত দুটা শ্ব’ৰ মাজত পৰ্যাপ্ত সময় ৰাখিব লাগিব কৰ্তৃপক্ষই।
- সৰ্বোচ্চ ৫০% শতাংশ দৰ্শকেৰেহে চিনেমা প্ৰদৰ্শন কৰিব পাৰিব।
- অনলাইন বা উইণ্ডু বুকিঙৰ সময়ত খালী থাকিব লগীয়া আসনসূমহ চিহ্নিত কৰিব লাগিব কৰ্তৃপক্ষই।
- থিয়েটাৰৰ ভিতৰত এনে আসনসমূহ ৰঙা চিনেৰে চিহ্নিত কৰিব লাগিব।
- কেৱল আগতীয়া আৰু অনলাইন বুকিঙৰ দ্বাৰাহে টিকট বিক্ৰী কৰিব পাৰিব।
- উইণ্ড’ টিকট কটাৰ সময়ত দৰ্শক আৰু টিকট কাউন্টাৰ কৰ্মচাৰীৰ হাতত স্পৰ্শ ঘটিব নোৱাৰিব।
- টিকট বুকিঙৰ সময়ত সংশ্লিষ্ট দৰ্শকজনে মোবাইল নম্বৰ দিয়াটো বাধ্যতামূলক হ’ব।
সাধাৰণ প্ৰট’কল—
- থিয়েটাৰৰ বাহিৰত আৰু ৱেটিং ৰুমত দৰ্শকসকলে অন্ততঃ ৬ ফুট দূৰত্ব বজাই ৰাখিব লাগিব।
- সকলো সময়তে দৰ্শকে মাস্ক পৰিধান কৰি থাকিব লাগিব। চাবোনেৰে হাত ধোৱা আৰু চেনিটাইজড্ কৰাটো অত্যন্ত প্ৰয়োজনীয় বুলি গণ্য কৰা হ’ব।
- দৰ্শকে কাঁহোতে টিচু পেপাৰ অথবা ৰুমাল ব্যৱহাৰ কৰাৰ লগতে মুখখন হাতেৰে ঢাকি ধৰিব লাগিব।
- ৰাজহুৱা স্থানত পিক পেলোৱাটো সম্পূৰ্ণৰূপে নিষিদ্ধ কৰা হৈছে।
- সকলোকে আৰোগ্য সেতু এপ ব্যৱহাৰ কৰিবলৈও পৰামৰ্শ দিয়া হৈছে।
স্মৰ্তব্য যো ক’ৰ’ণা প্ৰতিৰোধৰ বাবে দেশত ২২ মাৰ্চৰ পৰা বলৱৎ কৰা লকডাউনৰ সময়ৰ পৰাই দেশৰ চিনেমা হলসমূহ বন্ধ হৈ আছে।