পেহেলগামত ঘটা সন্ত্ৰাসবাদী আক্ৰমণক দেশৰ ভিতৰে, বাহিৰে সকলোৱে গৰিহণা দিছে। কাশ্মীৰ উপত্যকাৰ লোকসকলেও ইয়াৰ বিৰুদ্ধে প্ৰতিবাদ সাব্যস্ত কৰি দোকান-পোহাৰ আৰু ব্যৱসায়িক প্ৰতিষ্ঠানসমূহ কেইবাদিনলৈকে বন্ধ কৰি ৰাখিছিল। কিন্তু প্ৰাৰম্ভিক প্ৰতিক্ৰিয়াৰ পিছত মানুহে আক্ৰমণৰ সময়ত হোৱা নিৰাপত্তাজনিত ত্ৰুটিৰ সন্দৰ্ভতো কিছুমান প্ৰশ্ন উত্থাপন কৰিবলৈ আৰম্ভ কৰিছে।
এই কথা ইতিমধ্যে পোহৰলৈ আহিছে যে সেই দুৰ্ভগীয়া দিনটোত পেহেলগামত প্ৰায় ২০০০ পৰ্যটক গোট খাইছিল অথচ তাত এজনো নিৰাপত্তাৰক্ষী নাছিল। আক্ৰমণৰ পাছত নিৰাপত্তাৰক্ষী কেইবা ঘণ্টাৰ পিছতহে ঘটনাস্থলীত উপস্থিত হৈছিল। পিছত সৰ্বদলীয় বৈঠকৰ সময়ত চৰকাৰেও স্বীকাৰ কৰে যে পেহেলগাম কাণ্ডত নিৰাপত্তাৰ কিছু ত্ৰুটি ৰৈ গৈছিল। এই প্ৰশ্ন আন বহুতৰ দৰে উত্তৰপ্ৰদেশৰ লোকশিল্পী নেহা সিং ৰাথোৰ আৰু সামাজিক মাধ্যমৰ প্ৰভাৱশালী লেখিকা ড০ মেডুছাইও উত্থাপন কৰিছিল। কিন্তু কেৱল এই বিষয়বোৰ উত্থাপন কৰাৰ বাবেই দুয়োৰে লগতে আন বহুজনৰ বিৰুদ্ধে দেশদ্ৰোহৰ গোচৰ ৰুজু কৰা হৈছে।
ভাৰতীয় সংবিধানৰ ১৯ নং অনুচ্ছেদ অনুসৰি প্ৰতিজন নাগৰিকে কিছুমান মৌলিক অধিকাৰ ভোগ কৰে আৰু সেই অধিকাৰবোৰৰ ভিতৰত মত প্ৰকাশৰ স্বাধীনতা অন্যতম। উচ্চতম ন্যায়ালয়েও বাৰে বাৰে কৈছে যে চৰকাৰী সিদ্ধান্তৰ সমালোচনা কৰাটো নাগৰিকৰ ব্যক্তিগত অধিকাৰৰ ভিতৰত পৰে আৰু ইয়াৰ বাবে কাকো শাস্তি বিহা উচিত নহয়। অসম নাগৰিক সমাজে মত প্ৰকাশৰ স্বাধীনতাৰ এনেধৰণৰ উলংঘনত উদ্বেগ প্ৰকাশ কৰাৰ লগতে চৰকাৰৰ এই এই দমনমূলক নীতিৰ প্ৰতিবাদ কৰিবলৈ সকলো শ্ৰেণীৰ জনসাধাৰণক আহ্বান জনাইছে। সাধাৰণ মানুহক নিজৰ মতামত প্ৰকাশ কৰাৰ বাবে হাৰাশাস্তি কৰাৰ পৰিৱৰ্তে চৰকাৰ সন্ত্ৰাসবাদীৰ বিৰুদ্ধে কঠোৰ হোৱাটো পোষকতা কৰিছে।
