বৰপেটা চিকিৎসা মহাবিদ্যালয়ৰ নামৰ পৰা ভাৰতৰ প্ৰাক্তন ৰাষ্ট্ৰপতি ফখৰুদ্দিন আলী আহমেদৰ নাম প্ৰত্যাহাৰ কৰাৰ সিদ্ধান্তক লৈ ৰাজ্যজুৰি তীব্ৰ প্ৰতিক্ৰিয়াৰ সৃষ্টি হৈছে।, বাঘ হাজৰিকা জাগৰণ মঞ্চ আৰু খিলঞ্জীয়া অসমীয়া মুছলমান উন্নয়ন পৰিষদে যৌথভাৱে এই সিদ্ধান্তৰ বিৰুদ্ধে তীব্ৰ গৰিহণা প্ৰকাশ কৰিছে। সংগঠনকেইটাই অভিযোগ কৰা অনুসৰি, অনাগত বিধানসভা নিৰ্বাচনৰ প্ৰাকক্ষণত ৰাজ্যত সাম্প্ৰদায়িক মেৰুকৰণ সৃষ্টি কৰাৰ উদ্দেশ্যে চৰকাৰে এই পদক্ষেপ গ্ৰহণ কৰিছে। তেওঁলোকে এই কাৰ্যক অসমৰ এগৰাকী সুসন্তান তথা স্বাধীনতা সংগ্ৰামীগৰাকীৰ প্ৰতি চৰম অৱমাননা বুলি অভিহিত কৰিছে।
যৌথ বিবৃতিত সংগঠনসমূহৰ নেতৃবৰ্গই কয় যে ফখৰুদ্দিন আলী আহমেদ কেৱল এজন মুছলমান নেতা নাছিল, তেওঁ আছিল দেশৰ প্ৰথমগৰাকী অসমীয়া ৰাষ্ট্ৰপতি। স্বাধীনতা আন্দোলনত গুৰুত্বপূৰ্ণ ভূমিকা পালন কৰা আৰু দেশৰ বাবে নিজকে উছৰ্গা কৰা এইগৰাকী ব্যক্তিক এনেদৰে অপমান কৰাটো কোনোমতেই গ্ৰহণযোগ্য নহয়। লগতে তেওঁলোকে দাবী কৰে যে ইয়াৰ আগতেও বিভিন্ন সময়ত অসমৰ ইতিহাসৰ সৈতে জড়িত বহু বিশিষ্ট ব্যক্তিক লৈ চৰকাৰে বিতৰ্কিত মন্তব্য কৰি আহিছে, যিটো অতি পৰিতাপৰ বিষয়।
চৰকাৰৰ এই সাম্প্ৰদায়িক আৰু জাতিবিৰোধী সিদ্ধান্তক শীঘ্ৰে বাতিল কৰিবলৈ সংগঠনকেইটাই দাবী জনায়। মুখ্যমন্ত্ৰী হিমন্ত বিশ্ব শৰ্মা নেতৃত্বাধীন চৰকাৰখনে এনে সিদ্ধান্তৰে খিলঞ্জীয়া অসমীয়া মুছলমানসকলৰ মনত আঘাত দিছে বুলিও বিবৃতিত উল্লেখ কৰা হয়। যদি এই সিদ্ধান্ত বাতিল কৰা নহয়, তেন্তে ভৱিষ্যতে ইয়াৰ বিৰুদ্ধে অধিক তীব্ৰ আন্দোলন গঢ়ি তোলা হ’ব বুলিও তেওঁলোকে সকীয়াই দিয়ে।
এই যৌথ বিবৃতিটোত অসম চিভিল ছচাইটিৰ সভাপতি হাফিজ ৰছিদ আহমেদ চৌধুৰী আৰু সাধাৰণ সম্পাদক মছদ্দৰ হুছেইন, বাঘ হাজৰিকা জাগৰণ মঞ্চৰ সভাপতি ড০ পইনুৰুদ্দিন আহমেদ আৰু সাধাৰণ সম্পাদক চামচুল বাৰিক, আৰু খিলঞ্জীয়া অসমীয়া মুছলমান উন্নয়ন পৰিষদৰ সভাপতি চৈয়দ মুকিবৰ ৰহমান তথা সাধাৰণ সম্পাদক নুৰ মহম্মদে স্বাক্ষৰ কৰিছে।
