নিৰ্বাচন আয়োগে সমষ্টি পুনৰনিৰ্ধাৰণৰ খচৰা প্ৰকাশ কৰাৰ পিছত অসমৰ মুখ্যমন্ত্ৰীয়ে বিভিন্ন ধৰণৰ মন্তব্য কৰি আহিছে। তেওঁ ২৩ জুনৰ দিনা কৈছিল এই সীমানিৰ্ধাৰণ অসম চুক্তি আৰু ৰাষ্ট্ৰীয় নাগৰিক পঞ্জীয়ে কৰিব নোৱৰা কাম সম্ভৱ কৰি তুলিব । ই কাৰ্যকৰী হ’লে ১০২ টা সমষ্টিত অসমৰ জনসাধাৰণ প্ৰভাৱশালী হ’ব আৰু নিৰ্বিঘ্নে তেওঁলোকৰ প্ৰতিনিধি নিৰ্বাচিত কৰিব পাৰিব। অসমৰ মুঠ বিধানসভা সমষ্টিৰ সংখ্যা যিহেতু ১২৬ টা, তাৰে ১০২ টা সমষ্টি ইমানদিনে বাহিৰৰ লোকসকলৰ প্ৰভাৱত আছিল বুলি ইংগিত দিয়া মুখ্যমন্ত্ৰীৰ বক্তব্য অত্যন্ত অপমানজনক নহয়নে? সংবিধানৰ নামত শপত লোৱা মুখ্যমন্ত্ৰী এজনৰ বাবে এনে ধৰ্মান্ধ মন্তব্য শোভা নাপায়। এজন সাংবিধানিক পদাধিকাৰীৰ এনে মনোভাৱে অসমৰ এটা অংশৰ জনসাধাৰণৰ প্ৰতি এক বিচ্ছিন্নতা আৰু ঘৃণাৰ অনুভূতি সৃষ্টি কৰাৰ সম্ভাৱনা আছে।
একেটা সম্প্ৰদায়ৰ লোকক একোটাহঁত সমষ্টিত সীমাবদ্ধ কৰিবলৈ যি ধৰণে প্ৰচেষ্টা চলোৱা হৈছে, সি ঔপনিৱেশিক যুগৰ পৃথক মতদাতাৰ ভয়াৱহ স্মৃতি ঘূৰাই আনিছে। এই খচৰাখনৰ উদ্দেশ্য মানুহক ভাগ ভাগ কৰা, সকলোকে সামৰি লোৱা নহয়। প্ৰতিটো সমষ্টিত এটা ধৰ্মক সুকীয়াকৈ ৰখাৰ প্ৰৱণতাই কিছুমান সমষ্টিত সংখ্যাগৰিষ্ঠতাবাদ আৰু আনবোৰত আবদ্ধকৰণ প্ৰক্ৰিয়াক উদগনি দিব ।অসমৰ ইতিমধ্যে ভঙ্গুৰ হৈ পৰা সামাজিক গাঁথনি ই বিধ্বস্ত কৰি পেলাব। নিৰ্বাচন গণতন্ত্ৰৰ উৎসৱ, ই বৈচিত্ৰ্যৰ মাজত ঐক্য উদযাপনৰ এক উপলক্ষ হ’ব লাগে, ই মানুহক বিভাজিত কৰাৰ উপলক্ষ হ’ব নালাগে।এই খচৰাখনকে যদি চূড়ান্ত ৰূপ দিয়া হয়, তেন্তে ই বৈচিত্ৰ্যৰ মাজত একতাৰ ধাৰণাটোকে বিলোপ কৰিব।
খচৰাখন সংবিধানৰ মৌলিক বিচাৰধাৰাৰ বিৰোধী। এটা সাংবিধানিক প্ৰক্ৰিয়াৰে সংবিধানৰ মৌলিক প্ৰমূল্যকে ধূলিস্যাৎ কৰিব বিচৰা হৈছে। এই “পৰোক্ষ পৃথক মতদাতা”ই আমাৰ ৰাষ্ট্ৰৰ ভ্ৰাতৃত্ববোধৰ ধাৰণাটোকে আঘাত কৰিব। অৱশেষত ই ব্যক্তিৰ মৰ্যাদা আৰু ৰাষ্ট্ৰৰ একতা আৰু অখণ্ডতা উলংঘা কৰিব।সমষ্টি পুনৰনিৰ্ধাৰণ যি ধৰণে কৰিব বিচৰা হৈছে তাৰপৰা এইটো স্পষ্ট যে, ই নিৰ্বাচন আয়োগৰ কাম নহয়, ই বিজেপিৰহে কাম। এই খচৰাখনত বিজেপিৰ হস্তক্ষেপে নিৰ্বাচন আয়োগৰ দৰে সাংবিধানিক সংস্থাৰ স্বাধীনতা খৰ্ব কৰিছে আৰু এতিয়া তেওঁলোকে নিৰপেক্ষভাৱে নিৰ্বাচন অনুষ্ঠিত কৰিব পাৰিবনে নাই তাৰ ওপৰত আমাৰ মনত সন্দেহৰ সৃষ্টি হৈছে। নিৰ্বাচন আয়োগৰ এই আপোচ ভাৰতীয় গণতন্ত্ৰৰ বাবে এক মাৰাত্মক ভাবুকি।
সীমানিৰ্ধাৰণে বহুতো সৰু সম্প্ৰদায়ক ৰাজনৈতিকভাৱে অপ্ৰাসংগিক কৰি তুলিব, আনহাতে আন কেতবোৰক অধিক প্ৰাসংগিক আৰু গুৰুত্বপূৰ্ণ কৰি তুলিব।আচলতে ই সম্পূৰ্ণৰূপে বিজেপিৰ পৰিকল্পনামতে প্ৰস্তুত কৰা এখন খচৰা। সমান জনপ্ৰতিনিধিত্বৰ সলনি বিজেপিৰ ভোট বেংকৰ প্ৰতি লক্ষ্য ৰাখিহে ইয়াক প্ৰস্তুত কৰা হৈছে। সেয়ে, ই সমষ্টিসমূহৰ পুনৰনিৰ্ধাৰণ আৰু জনপ্ৰতিনিধিত্ব আইনৰ সাংবিধানিক ৰায়ৰ পৰিপন্থী । এনেদৰে ভাৰতৰ নিৰ্বাচন আয়োগে ইয়াৰ নিজা নিৰ্দেশনা আৰু পদ্ধতি উলংঘা কৰিছে ।
২০ জুনৰ দিনা দিয়া প্ৰেছ বিজ্ঞপ্তিত আয়োগে উল্লেখ কৰিছিল যে, “সকলোবোৰ সমষ্টিকে যিমানদূৰ সম্ভৱ ভৌগোলিকভাৱে সংহত অঞ্চলৰ ভিতৰত ৰাখিবলৈ চেষ্টা কৰা হৈছে, আৰু সমষ্টি পুনৰনিৰ্ধাৰণৰ ক্ষেত্ৰত, ভৌতিক বৈশিষ্ট্য, জনসংখ্যাৰ ঘনত্ব, প্ৰশাসনিক গোটৰ বৰ্তমানৰ সীমা, যোগাযোগৰ সুবিধা আৰু ৰাজহুৱা সুবিধাৰ প্ৰতি মনোযোগ দিয়া হৈছে।” কিন্তু, নিৰ্বাচন আয়োগে প্ৰকাশ কৰা খচৰাটোৰ বেছিভাগ বিধানসভা আৰু সংসদীয় সমষ্টি ভৌগোলিকভাৱে সংহত নহয়, আৰু জনসংখ্যাৰ আৰ্হিও সমান নহয়। এইটো স্পষ্ট যে নিৰ্বাচন আয়োগে কেৱল বিজেপিক সহায় কৰিবলৈ নিজৰে নীতি-নিৰ্দেশনা আৰু পদ্ধতি উলংঘা কৰি সমষ্টি পুনৰনিৰ্ধাৰণৰ খচৰা প্ৰস্তুত কৰিছে। সেয়ে, সীমানিৰ্ধাৰণৰ এই খচৰা অসম নাগৰিক সমাজৰ বাবে গ্ৰহণযোগ্য নহয়। আমি এনে ষড়যন্ত্ৰমূলক কামক গৰিহণা দিয়াৰ লগতে নিৰ্বাচনী আয়োগৰ নিৰপেক্ষতা ৰক্ষাৰ বাবে সকলো প্ৰয়োজনীয় পদক্ষেপ ল’বলৈ গণতান্ত্ৰিক দল-সংগঠনক আহ্বান জনাইছোঁ।
