জ্যেষ্ঠ সাংবাদিক ধীৰেন্দ্ৰ নাথ চক্ৰৱৰ্তীক আজি গণৰাজ্য দিৱসৰ দিনটোত মুখ্য মন্ত্ৰী সৰ্বানন্দ সোণোৱালে ‘গণৰাজ্য দিৱস সাংবাদিকতা’ বঁটা প্ৰদান কৰে।
৭০ সংখ্যক গণৰাজ্য দিৱস উপলক্ষে ৰাজ্য চৰকাৰে খানাপাৰাৰ পশু-চিকিৎসালয়ৰ খেলপথাৰত অনুষ্ঠিত কৰা গণৰাজ্য দিৱসৰ কেন্দ্ৰীয় কাৰ্যসূচীত অংশগ্ৰহণ কৰি মুখ্য মন্ত্ৰী গৰাকীয়ে ৰাজ্যপাল জগদীশ মুখীৰ উপস্থিতিত ধীৰেন্দ্ৰ নাথ চক্ৰৱৰ্তীক উক্ত বঁটা প্ৰদান কৰে।
উল্লেখযোগ্য যে ২০১৭ চনত অসম চৰকাৰৰ তথ্য আৰু জনসংযোগ বিভাগৰ দ্বাৰা প্ৰাৰম্ভন কৰা এই বঁটাত আছে এখন প্ৰশস্তিপত্ৰৰ লগতে জাপি, শৰাই, গামোচা আৰু ১ লাখ টকাৰ চেক।
আনহাতে ইয়াৰ পূৰ্বে মুখ্য মন্ত্ৰীজনে গুৱাহাটীৰ শ্ৰদ্ধাঞ্জলি কাননৰ চহিদ স্মাৰকত পুষ্পাঞ্জলি নিবেদন কৰি চহিদসকলৰ প্ৰতি শ্ৰদ্ধা নিবেদন কৰে, উক্ত অনুষ্ঠানতে তেওঁ ভূপেন হাজৰিকাৰ প্ৰতিচ্ছবিটো মাল্যাৰ্পণ কৰে।
