নাগৰিকত্ব বিধেয়কৰ পৰা আৰম্ভ কৰি বানপানী, এন আৰ চি উন্নীতকৰণলৈকে এশ এবুৰি সমস্যাই অসমক জুমুৰি দি থকাৰ সময়ত আশ্চৰ্য্যজনকভাৱে ফট’ উঠিবলৈ সময়ৰ অভাৱ হোৱা নাই মুখ্য মন্ত্ৰী সৰ্বানন্দ সোণোৱালৰ! আৰু এইবাৰ সোণোৱালে ফট’ উঠিব খুজিছে সাংবাদিকৰ সৈতে।
সকলোকে আচৰিত কৰি বিভাগীয় অনুষ্ঠানযোগে বুধবাৰে সাংবাদিকক প্ৰে’ছ স্বীকৃতি পত্ৰ বিলাবলৈ ওলাইছে মুখ্য মন্ত্ৰী সোণোৱাল। সাংবাদিকক স্বীকৃতি পত্ৰ দিয়াটো চিৰাচৰিতভাৱে এক কেৰাণীৰ কাম আৰু ভাৰতৰ সকলো ৰাজ্যৰ তথ্য আৰু জনসম্পৰ্ক বিভাগসমূহৰ ই এক নৈমিত্তিক কাম।
সাংবাদিকক স্বীকৃতি পত্ৰ দিয়াত মুখ্য মন্ত্ৰীক হাজিৰ কৰাটো- তথ্য আৰু জন সম্পৰ্ক বিভাগৰ সঞ্চালক ৰাজীৱ প্ৰকাশ বৰুৱাকে ধৰি মুখ্য মন্ত্ৰীৰ আন উপদেষ্টাসকলৰ- মূঢ়তাৰ বাহিৰে আন একো নহয়।
সাংবাদিকক মুখ্য মন্ত্ৰীৰদ্বাৰা পৰিচয় পত্ৰ প্ৰদানৰ কাইলৈৰ দৰে অনুষ্ঠান বছৰত এইটো দ্বিতীয়টো। এই বছৰৰ ১৩ এপ্ৰিলত তেওঁ প্ৰথম বাৰৰ বাবে সংবাদ মাধ্যমৰ লোকক কাৰ্ড বিতৰণ কৰিছিল।
যোৱা কিছু বছৰত অসম কাৰ্য্যতঃ পৰিণত হৈছে উৎসৱ স্থলীত— সেয়া নিযুক্তি পত্ৰ বিতৰণৰে হওক বা ছাত্ৰ-ছাত্ৰীক লেপটপ আৰু স্কুটাৰ বিতৰণ বা স্বাস্থ্য কাৰ্ড বিতৰণৰে হওক। লাইমলাইটলৈ অহাৰ বাবে এইবোৰ ফেশ্বন হৈ পৰিছে মুখ্য মন্ত্ৰী আৰু তেওঁৰ সতীৰ্থ মন্ত্ৰীসকলৰ বাবে।
বিজেপি নেতৃত্বাধীন চৰকাৰখন ২০১৬ চনত শাসনলৈ আহোতে অসমৰ প্ৰত্যেকজন লোকে ভাবিছিল যে মুখ্য মন্ত্ৰী সৰ্বানন্দ সোণোৱালে ‘গে’ম চে’ঞ্জাৰ’ৰ সক্ৰিয় ভূমিকা ল’ব আৰু ৰাজ্যখনলৈ আনিব বৃহৎ উন্নয়ন।
সোণোৱাল ব্যস্ত মানুহ, অসমক উৎপাদনৰ এক গুৰুত্বপূৰ্ণ কেন্দ্ৰলৈ পৰিৱৰ্তন কৰা আৰু দক্ষিণ আৰু দক্ষিণ-পূব এছীয় অৰ্থনীতিৰ মাজৰ সাঁকোৰূপে গঢ়ি তোলাৰ দায়িত্ব প্ৰধান মন্ত্ৰী নৰেন্দ্ৰ মোদীয়ে তেওঁৰ ওপৰত ন্যস্ত কৰিছে। তেঁৱেই আয়োজন কৰিছিল অসমৰ ইতিহাসৰ আটাইতকৈ বৃহৎ বিনিয়োগ সন্মিলন—এডভাণ্টেজ আছামৰো, আৰু বিনিয়োগ আকৰ্ষণৰ বাবে ভ্ৰমণ কৰিছিল দক্ষিণ-পূব এছীয় দেশসমূহ।
সোণোৱালৰ ওপৰত ন্যস্ত এই হাৰক্যুলিয়ান বোজাৰ কথা মুখ্য মন্ত্ৰীৰ উপদেষ্টাসকলৰ বোধগম্য নহয় কিয়, সেইটো আশ্চৰ্য্যজনক। স্থানীয় দৈনিক কাকতকেইখনৰ মুখ্য পৃষ্ঠাত কেইখনমান ফট’, আৰু স্থানীয় টিভি চেনেলকেইটাত কেই ছেকেণ্ডমানৰ ক্লিপ একোটাৰ বাবে তেওঁলোকে সোণোৱালৰ মূল্যৱান সময় অথলে নিয়াইছে কিয়!
