অসম বিধানসভা নিৰ্বাচনৰ মনোনয়ন পৰ্বৰ মাজতে ভাৰতীয় জাতীয় কংগ্ৰেছে ৭ গৰাকী প্ৰাৰ্থীৰ নাম সন্নিৱিষ্ট পঞ্চম তথা চূড়ান্ত তালিকাখন প্ৰকাশ কৰিছে। এই চূড়ান্ত তালিকা প্ৰকাশৰ লগে লগে ৰাজ্যৰ ১২৬ খন বিধানসভা আসনৰ ভিতৰত কংগ্ৰেছে ১০১ খন আসনৰ বাবে নিজৰ প্ৰাৰ্থী চূড়ান্ত কৰিলে।
অখিল ভাৰতীয় কংগ্ৰেছ কমিটিৰ (AICC) সাধাৰণ সম্পাদক (সংগঠন) কে. চি. বেণুগোপালে এক আনুষ্ঠানিক বিবৃতিযোগে এই তালিকা প্ৰকাশ কৰে। বিবৃতিটোত উল্লেখ কৰা অনুসৰি, কংগ্ৰেছৰ কেন্দ্ৰীয় নিৰ্বাচনী সমিতিয়ে (CEC) অসম বিধানসভা নিৰ্বাচনৰ বাবে এই প্ৰাৰ্থীসকলক অনুমোদন জনাইছে। চূড়ান্ত তালিকাত স্থান লাভ কৰা প্ৰাৰ্থীসকলৰ ভিতৰত গোঁসাইগাঁও সমষ্টিৰ পৰা যোছেফ হাঁচদা, দতমা (জনজাতি)-ৰ পৰা বিৰখাং বড়ো, বিজনীৰ পৰা ৰজত কান্তি সাহা আৰু ভেৰগাঁও সমষ্টিৰ পৰা অংশুলা গগৌৰা দৈমাৰীয়ে প্ৰতিদ্বন্দ্বিতা কৰিব।
একেদৰে, দলটোৱে মাজবাট সমষ্টিৰ পৰা নাৰায়ণ অধিকাৰী, হাফলং (জনজাতি) সমষ্টিৰ পৰা নিৰ্মল লাংথাছা আৰু কাটিগড়া বিধানসভা সমষ্টিৰ পৰা অমৰ চান্দ জৈনক প্ৰাৰ্থিত্ব প্ৰদান কৰিছে। ইয়াৰ পূৰ্বে শুকুৰবাৰে কংগ্ৰেছে সাতগৰাকী প্ৰাৰ্থীৰে চতুৰ্থখন তালিকা প্ৰকাশ কৰিছিল, য’ত এগৰাকী বৰ্তমানৰ বিধায়কক টিকটৰ পৰা বঞ্চিত কৰা হৈছিল। উল্লেখ্য যে, এইবাৰৰ নিৰ্বাচনত ছটা দলৰ মিত্ৰজোঁটৰ সৈতে অৱতীৰ্ণ হোৱা কংগ্ৰেছে মিত্ৰদল ৰাইজৰ দলৰ বাবে ১১ খন আসন আৰু সামগ্ৰিকভাৱে মিত্ৰদলসমূহৰ বাবে ১৫ খন আসন এৰি দিয়াৰ কথা পূৰ্বেই ঘোষণা কৰিছিল।
২০১৬ চনৰ পৰা ৰাজ্যৰ শাসন ক্ষমতাৰ পৰা আঁতৰি থকা কংগ্ৰেছে এইবাৰৰ নিৰ্বাচনত হেৰোৱা ভেটি উদ্ধাৰৰ চেষ্টা চলাইছে, আনহাতে শাসনাধিষ্ঠিত বিজেপিয়ে একেৰাহে তৃতীয়টো কাৰ্যকালৰ বাবে চৰকাৰ গঠনৰ লক্ষ্য নিৰ্ধাৰণ কৰিছে। বিদায়ী বিধানসভাত শাসকীয় বিজেপিৰ ৬৪ গৰাকী, অসম গণ পৰিষদৰ ৯ গৰাকী, ইউপিপিএলৰ ৭ গৰাকী আৰু বিপিএফৰ ৩ গৰাকী বিধায়ক আছে। আনহাতে বিৰোধী শিবিৰত কংগ্ৰেছৰ ২৬ গৰাকী, এআইইউডিএফৰ ১৫ গৰাকী আৰু চিপিআই(এম)-ৰ এগৰাকী বিধায়ক আছে। তদুপৰি, এগৰাকী নিৰ্দলীয় বিধায়কো আছে।
