আজিৰ পৰা আৰম্ভ হোৱা ২৫ সংখ্যক ছিনিয়ৰ ৰাষ্ট্ৰীয় মহিলা ফুটবল প্ৰতিযোগিতাৰ উদ্বোধনী খেলত ৰে’লৱে মিজোৰামক ৪-০ গলৰ ব্যৱধানত পৰাস্ত কৰে।
খেলৰ প্রথমাৰ্ধত ৰে’লৱেৰ য়ুমনাম কমলা দেৱীয়ে প্ৰথমটো গ’ল দিয়াৰ বিপৰীতে দ্বিতীয়াৰ্ধত তেওঁ আন তিনিটা গ’ল দিয়ে।
অৰুণাচল প্ৰদেশৰ পাচিঘাট ইন্দোৰ ষ্টেডিয়ামত অনুষ্ঠিত হোৱা ৰাষ্ট্ৰীয় ফুটবল প্ৰতিযোগিতাখন অৰুণাচলৰ মুখ্য মন্ত্ৰী পেমা খাণ্ডু, কেন্দ্ৰীয় খেল আৰু যুৱ কল্যাণ মন্ত্ৰী কিৰেণ ৰিজিজুৰ উপস্থিতিত উদ্বোধন কৰা হয়।
উদ্বোধনী অনুষ্ঠানত ভাষণ দি পেমা খাণ্ডুই ৰাষ্ট্ৰীয় পৰ্যায়ৰ প্ৰতিযোগিতাখন অনুষ্ঠিত কৰিব পৰাটো ৰাজ্যখনৰ বাবে গৌৰৱৰ বিষয় হিচাপে অভিহিত কৰে।
প্ৰতিযোগিতাখনৰ আৰম্ভণি দিনটোত অসম, অন্ধ্ৰপ্ৰদেশ, হাৰিয়ানা, মধ্যপ্ৰদেশ, বিহাৰ, ৰে’লৱে আৰু কৰ্ণাটককে ধৰি মুঠ আঠটা দলে খেলত অংশগ্ৰহণ কৰে।
অসমে আৰু অন্ধ্ৰপ্ৰদেশৰ মাজত অনুষ্ঠিত হোৱা খেলখনত অসমে অন্ধ্ৰপ্ৰদেশক ৯-০ গ’লৰ বিশাল ব্যৱধানত পৰাস্ত কৰে।
অসমৰ উজ্জীৱিত খেলৰ সন্মুখত অন্ধ্ৰপ্ৰদেশৰ দলটোৱে কোনোধৰণৰ প্ৰতিৰোধ গঢ়িবলৈ সক্ষম নহ’ল।
আনহাতে, মধ্যপ্ৰদেশে হাৰিয়ানাক ২-১ গ’লৰ ব্যৱধানত, বিহাৰে কৰ্ণাটকক ৩-০ গ’লৰ ব্যৱধানত পৰাস্ত কৰি প্ৰতিযোগিতাখনত প্ৰত্যয়জনক আৰম্ভণি কৰে।
প্ৰতিযোগিতাখনত ঘৰুৱা দল অৰুণাচল প্ৰদেশে ১২ ছেপ্টেম্বৰত অভিযানৰ আৰম্ভণি কৰিব।
উল্লেখযোগ্য যে, সমগ্ৰ দেশৰ মুঠ ৩০ টা দলে অংশগ্ৰহণ কৰা প্ৰতিযোগিতাখন ১৫ দিনৰ বাবে চলিব।
১৫ দিনৰ বাবে চলিবলগীয়া প্ৰতিযোগিতাখনত আঠটা গ্ৰুপত বিভক্ত মুঠ ৩০ টা দলে খিতাপ দখলৰ বাবে চেষ্টা কৰিব।
