নগাওঁ আৰক্ষীয়ে শনিবাৰে গ্ৰেপ্তাৰ কৰিছে বনকৰা শিশুৰ গাত উতলা পানী ঢলাত অভিযুক্ত ডিব্ৰুগড়ৰ চিকিৎসক ডাঃ সিদ্ধি প্ৰসাদ দেউৰী আৰু তেওঁৰ পত্নী মিতালী কোঁৱৰক।
নগাঁৱৰ ৰহাত সন্ধিয়া দুয়োকে গ্ৰেপ্তাৰ কৰা হৈছে।
পাঁচদিনৰ সন্ধান অভিযানৰ পিছত পলাতক দম্পতিহালক কৰায়ত্ত কৰিবলৈ আৰক্ষী সক্ষম হৈছে।
“নগাওঁ আৰক্ষীয়ে দম্পতিহালক গ্ৰেপ্তাৰ কৰিছে। আমি তেওঁক ট্ৰেক কৰি আছিলো আৰু নগাওঁ আৰক্ষীক খবৰ দিছিলো,” ডিব্ৰুগড়ৰ আৰক্ষী অধীক্ষক প্ৰতীক বিজয় কুমাৰ থুবেই জনায়।
ইয়াৰ পূৰ্বে ডিব্ৰুগড় আৰক্ষীয়ে দম্পতিহালৰ পুত্ৰ-কন্যাদ্বয়ক ঘটনা সংক্ৰান্তত গ্ৰেপ্তাৰ কৰিছিল।
ডাঃ দেউৰীয়ে তেওঁৰ ঘৰৰ মজিয়াত শুই থকা অৱস্থাত ১২ বছৰীয়া নাবালক বনকৰা ল’ৰাজনৰ গাত উতলা পানী ঢালি দিছিল।
পিছত চাইল্ডলাইন, শিশু কল্যাণ সমিতি আৰু আৰক্ষীৰ দলে নাবালকগৰাকীক উদ্ধাৰ কৰিছিল।
নাবালকগৰাকীয়ে যোৱা এবছৰ ধৰি ডাঃ দেউৰীৰ ঘৰত বনকৰা ল’ৰা হিচাপে কাম কৰি আহিছিল।
