ৰহাৰ এটা আদ্যৱন্ত পৰিয়ালৰ ঘৰত শিশুশ্ৰমিক হিচাপে কৰ্মৰত পশ্চিম কাৰ্বি আংলঙৰ হত্যাৰ বলি হোৱা কন্যা শিশুটি কেৱল শাৰীৰিক আৰু মানসিক নিৰ্যাতনৰে বলি হোৱা নিছিল, কন্যা শিশুটি যৌন নিৰ্যাতনৰো বলি হৈ আছিল। এই বিস্ফোৰক দাবী কৰিছে অসম ৰাজ্যিক শিশু অধিকাৰ সুৰক্ষা আয়োগ(ASCPCR)এ।
আয়োগে দাবী কৰা মতে হত্যাৰ বলি হোৱা কন্যা শিশুটি মৃত্যুৰ পূৰ্বে অন্তঃসত্ত্বাও আছিল।
ইফালে অভিযুক্ত পিতৃ আৰু পুত্ৰক আৰক্ষীয়ে গ্ৰেপ্তাৰ কৰাৰ পিছতে প্ৰতিৱেশীসকলে নিৰ্যাতিতা শিশু কন্যাটিক হত্যা কৰাৰ পূৰ্বে অভিযুক্তসকলে নিয়মীয়াকৈ শাৰীৰিক আৰু মানসিকভাৱে নিৰ্যাতন চলাই অহা বুলি ৰাজ্যিক শিশু আধিকাৰ আয়োগৰ আগত প্ৰকাশ কৰা বুলিও জনাইছে আয়োগে।
শিশু অধিকাৰ আয়োগে আৰক্ষী প্ৰশাসনক ভাৰতীয় দণ্ডবিধি POSCO আইন, ২০১২ৰ ৪,৫ আৰু ৬ৰ ধাৰা, শিশু আৰু কিশোৰ শ্ৰমিক (নিষিদ্ধকৰণ আৰু নিয়ন্ত্ৰণ)আইন, ১৯৮৬ আৰু জুভেনাইল ন্যায়(শিশুৰ যত্ন আৰু সুৰক্ষা) আইন, ২০১৫ৰ অধীনত অভিযুক্তৰ বিৰুদ্ধে গোচৰ ৰুজু কৰি আদালতত চাৰ্জশ্বীট দাখিল কৰিবলৈ দাবী জনাইছে।
নগাঁৱৰ আৰক্ষী অধীক্ষকে শিশু অধিকাৰ আয়োগক অতি শীঘ্ৰেই আদালতত চাৰ্জশ্বীট দাখিল কৰি ফাৰ্ষ্ট ট্ৰেক ক’ৰ্টৰ জৰিয়তে ভুক্তভোগী পৰিয়ালটোক ন্যায় প্ৰদান কৰা হ’ব বুলি জনোৱা বুলিও সদৰী কৰিছে আয়োগে।
ইফালে ৰহাৰ স্থানীয় ৰাইজে নগাঁও আৰক্ষীৰ বিৰুদ্ধে সোচ্চাৰ হোৱা দেখা গৈছে। নিৰ্যাতিত পৰিয়ালটোৰ ন্যায় প্ৰদান আৰু অভিযুক্তক উচিত শাস্তি প্ৰদানৰ দাবীৰে প্ৰতিবাদ সাৱস্ত কৰা স্থানীয় লোকক আৰক্ষীয়ে লাঠীচালনা কৰাৰ লগতে আটক কৰা বুলিও গুৰুতৰ অভিযোগ উত্থাপন হৈছে।
