অসম বিধানসভা নিৰ্বাচন ২০২৬-ৰ আজি ঘোষিত ফলাফলৰ প্ৰাৰম্ভিক ধাৰাত শাসকীয় বিজেপি নেতৃত্বাধীন এন.ডি.এ (NDA) মিত্ৰজোঁটে এক বৃহৎ বিজয়ৰ দিশে অগ্ৰসৰ হৈছে। ৰাজ্যখনৰ ১২৬ খন আসনৰ ভিতৰত ১০০ খনৰো অধিক আসনত মিত্ৰজোঁটে অগ্ৰগতি লাভ কৰি দিছপুৰত একেৰাহে তৃতীয়বাৰৰ বাবে চৰকাৰ গঠন কৰাটো প্ৰায় নিশ্চিত কৰি তুলিছে। ইয়াৰ বিপৰীতে কংগ্ৰেছ নেতৃত্বাধীন বিৰোধী ঐক্যমঞ্চ ‘অসম সন্মিলিত মৰ্চা’ মাত্ৰ ২০ ৰ পৰা ২৫ খন আসনতে সীমাবদ্ধ থকা পৰিলক্ষিত হৈছে। নিৰ্বাচন আয়োগৰ তথ্য অনুসৰি, পুৱা ৮ বজাৰ পৰা আৰম্ভ হোৱা ভোটগণনাত আৰম্ভণিৰে পৰাই শাসকীয় পক্ষই আধিপত্য বিস্তাৰ কৰিবলৈ সক্ষম হয়।
বিজেপিৰ এই বিজয় যাত্ৰাত কেইবাজনো হেভিৱেট নেতাই নিজৰ দখল অক্ষুণ্ণ ৰাখিবলৈ সক্ষম হৈছে। বিশেষকৈ মুখ্যমন্ত্রী হিমন্ত বিশ্ব শৰ্মাই জালুকবাৰী সমষ্টিত বৃহৎ ভোটৰ ব্যৱধানত জয়লাভ কৰাৰ বিপৰীতে বিৰোধীৰ শিবিৰত শোকৰ ছাঁ পৰিছে। প্রদেশ কংগ্ৰেছৰ সভাপতি গৌৰৱ গগৈয়ে যোৰহাট সমষ্টিত বিজেপিৰ প্ৰাৰ্থী হিতেন্দ্ৰ নাথ গোস্বামীৰ হাতত ২৩,১৮২ টা ভোটৰ ব্যৱধানত পৰাজয় বৰণ কৰাটো বিৰোধীৰ বাবে এক ডাঙৰ আঘাত হিচাপে বিবেচিত হৈছে। ইয়াৰ উপৰি শিৱসাগৰত অখিল গগৈ ৬৮৪৩৫ ভোটেৰে ১২৬৭৯ ভোটৰ ব্যৱধানত আগবাঢ়ি থকাৰ বিপৰিতে খোৱাঙত লুৰীণজ্যোতি গগৈৰ দৰে হাই-প্রফাইল নেতৰ বৃহৎ ব্যৱধানত পৰাজয়বৰণে বিৰোধী শিবিৰক অধিক হতাশ কৰি তুলিছে।
মিত্ৰজোঁটৰ অন্যতম সহযোগী দল অসম গণ পৰিষদ (AGP) আৰু বড়োলেণ্ড পিপলছ ফ্ৰণ্টেও (BPF) নিজৰ নিজৰ দুৰ্গত আশানুৰূপ প্ৰদৰ্শন কৰিছে। অগপৰ সভাপতি অতুল বৰা আৰু জ্যেষ্ঠ নেতা কেশৱ মহন্তই নিজ নিজ সমষ্টিত জয়ৰ দিশে আগবাঢ়িছে। বিৰোধী দলসমূহৰ ভিতৰত বদৰুদ্দিন আজমল নেতৃত্বাধীন এ.আই.ইউ.ডি.এফ আৰু ৰাইজৰ দলেও দুই-এখন আসনত অগ্ৰগতি লাভ কৰিছে যদিও মিত্ৰজোঁটৰ বিজয় ৰথ ৰখাবলৈ সেয়া পৰ্যাপ্ত হোৱা নাই। নিৰ্বাচনৰ এই ফলাফলক লৈ কেন্দ্ৰীয় মন্ত্ৰী সৰ্বানন্দ সোণোৱালে সন্তুষ্টি প্ৰকাশ কৰি কয় যে চৰকাৰৰ উন্নয়নমূলক কাম-কাজৰ বাবেই জনসাধাৰণে পুনৰ মিত্ৰজোঁটৰ ওপৰত আস্থা প্ৰকট কৰিছে।
ৰাজ্যখনৰ ভিন্ন প্ৰান্তৰ লগতে গুৱাহাটীৰ বিজেপিৰ মুখ্য কাৰ্যালয়ত দলীয় কৰ্মীসকলে ইতিমধ্যে বিজয় উৎসৱ পালন কৰা দেখা গৈছে। ইয়াৰ বিপৰীতে বিৰোধীৰ কাৰ্যালয়সমূহ নিস্তব্ধ হৈ পৰিছে। ২০২৩ চনৰ সমষ্টি পুনৰ নিৰ্ধাৰণৰ পাছত এইটোৱেই আছিল প্ৰথম নিৰ্বাচন, য’ত ভোটাৰৰ সঁহাৰিয়ে বহু পুৰণি সমীকৰণ সলনি কৰি পেলালে। এই পৰ্যন্ত ভোটগণনা সম্পূৰ্ণ হোৱা নাই যদিও মিত্ৰজোঁটে যিধৰণৰ জনদেশ লাভ কৰিছে, তাৰ পৰা স্পষ্ট যে অসমৰ ৰাজনীতিত বিজেপিৰ ভেটি অধিক শক্তিশালী হৈ পৰিল।
