অসমৰ ২ বনৰীয়া হাতীক “ঘৰচীয়া” মৰ্য্যাদা বন বিভাগৰ

অসমৰ বন বিভাগে বন্যপ্ৰাণী (সুৰক্ষা) আইন, ১৯৭২ উলংঘা কৰিছে, আৰু বনৰ পৰা ধৰি অনা দুটা অপ্ৰাপ্তবয়স্ক হাতীক বেসময়ত (out-of-turn) প্ৰদান কৰিছে “ঘৰচীয়া” মৰ্য্যাদা।

সেই দুটাকে ধৰি মুঠ চাৰিটাকৈ হাতী তিনিচুকীয়াৰ পৰা আহমেদাবাদৰ জগন্নাথ মন্দিৰলৈ নিয়াৰ বাবে অসমৰ বন বিভাগে শেহতীয়াকৈ অনুমতি দিছে।

অহা ৪ জুলাইত হ’ব লগা ৰথ যাত্ৰা কাৰ্য্যসূচীত হাতীকেইটাই অংশগ্ৰহণ কৰাৰ কথা।

সেই দুয়োটা হাতীয়ে তাৎপৰ্য্যপূৰ্ণভাৱে ঘৰত জন্মা নহয়, আৰু সিহঁতক ২০১৮ চনৰ জানুৱাৰিত বনত ধৰা হৈছিল। সিহঁতক প্ৰশিক্ষণ দি ঘৰচীয়া কৰা হৈছে।

“ঘৰচীয়া” মৰ্য্যাদা দিয়া হাতী দুটাক ৰূপসিং আৰু ৰাণী বুলি চিনাক্ত কৰা হৈছে। দুয়োটা হাতীৰ বয়স ছয়ৰ পৰা সাত বছৰৰ ভিতৰৰ।

আহমেদাবাদলৈ পৰিবহণ সহজ কৰাৰ কাৰণে, অসমৰ বন বিভাগৰ বিষয়াৰ নিৰীক্ষণত ৰাণী আৰু ৰূপসিঙৰ কাণত যোৱা ১৫ জুনত মাইক্ৰ’চিপ সংস্থাপন কৰা হৈছে।

ৰূপসিঙৰ মাইক্ৰ’চিপৰ নম্বৰ 000770A96E, হাতীটোৰ মালিক তিনিচুকীয়াৰ লক্ষীপথাৰৰ পিয়ল মৰাণ।

ৰাণীৰ মাইক্ৰ’চিপৰ নম্বৰ 000770AB16, আৰু মালিক হৈছে তিনিচুকীয়াৰ লাইকা গাঁৱৰ জোগীনাথ পেগু।

আহমেদাবাদলৈ পৰিবহণ প্ৰক্ৰিয়া সহজ কৰাৰ বাবে বন বিভাগে দুয়োটা হাতীৰ নামত মালিকৰ প্ৰমাণপত্ৰ জাৰি কৰিছে।

বনৰীয়া জীৱ ধৰাৰ ক্ষেত্ৰত বন্যপ্ৰাণী (সুৰক্ষা) আইন, ১৯৭২ৰ খুব কঠোৰ বিধি আছে, ইয়াক আইনখনৰ ধাৰা ২(১৬)ৰ অধীনত “চিকাৰ” ৰূপে সংজ্ঞায়িত কৰা হৈছে। ১নং সূচীৰ জন্তু হিচাপে আইনখনৰ ৯নং ধাৰাই বনৰ পৰা হাতী ধৰা নিষিদ্ধ কৰিছে।

এই আইন মতে, বনৰীয়া হাতী ধৰা সম্পূৰ্ণৰূপে অবৈধ। ই এক অ-আপোচযোগ্য (non-compoundable) অপৰাধ, সাত বছৰৰ কাৰাযোগ্য, আৰু ইয়াৰ জৰিমনা ন্যূনতম ১০০০০ টকা।

বনৰ পৰা ধৰা হাতী দুটাক বেসময়ত “ঘৰচীয়া”ৰ মৰ্য্যাদা দিবলৈ অসমৰ বন বিভাগৰ ওপৰত এনে কি “বাধ্য-বাধকতা” আছিল?

মন্তব্য সংগ্ৰহ কৰাৰ বাবে অসমৰ পি চি চি এফ (বন্যপ্ৰাণী) ৰঞ্জনা গুপ্তা উপলব্ধ নাই। বুধবাৰে তেওঁ ফ’ন উঠোৱা নাই।

বন্যপ্ৰাণী কৰ্মীসকলৰ মতে, হাতীকেইটা যদি বনৰ পৰা অবৈধভাৱে ধৰা হৈছে, তেন্তে সিহঁতক মাইক্ৰ’চিপ লগাই আৰু মালিকৰ প্ৰমাণপত্ৰ দি “ঘৰচীয়া”ৰ মৰ্য্যাদা দিয়াৰ ক্ষমতা অসমৰ বন বিভাগৰ নাই।

ভাৰতৰ হস্তী সংৰক্ষণৰ ইতিহাসত চাগে এইটোৱে প্ৰথম ঘটনা য’ত বনৰ পৰা ধৰা অপ্ৰাপ্তবয়স্ক জন্তুক “ঘৰচীয়া” মৰ্য্যাদা দিয়াত ৰাজ্যিক বন বিভাগ জৰিত হৈছে।

তাৰোপৰি, যদিহে হাতীকেইটা ধন বা আন কিবা কাৰণত ছমাহৰ বাবে ভাৰাত আহমেদাবাদলৈ স্থানান্তৰ কৰা হয়, তেন্তে ই হ’ব বন্যপ্ৰাণী (সুৰক্ষা) আইন, ১৯৭২ৰ ধাৰা ৪৩ৰ উলংঘন।

আইনখনৰ ধাৰা ৪৩(১) মতে, কোনো ব্যক্তিয়ে তেওঁৰ নিয়ন্ত্ৰণ বা দখলত থকা এটা বন্দী জন্তুক, যাৰ নামত তেওঁৰ এখন মালিকী প্ৰমাণপত্ৰ আছে, ব্যৱসায়িক প্ৰকৃতিৰ কোনো ধৰণৰ বিবেচনাৰে হস্তান্তৰ কৰিব নোৱাৰে।