ৰাজ্যত নতুন চৰকাৰ এখন গঠন নোহোৱাকৈয়ে অসমৰ বন বিভাগত বহু কেইগৰাকী বিষয়াক পদোন্নতি দিয়াৰ লগতে কেইবা জনো বিষয়াক বদলি কৰিছে।
শেহতীয়াকৈ বনবিভাগৰ আয়ুক্ত সচিব জি ডি ত্ৰিপাঠীয়ে জাৰি কৰা এক নিৰ্দেশনা অনুসৰি বিভাগটোৰ ১৫ গৰাকী বিষয়াক পদোন্নতি দিয়া হৈছে।
ৰাজ্যত এখন কেয়াৰ টেকাৰ চৰকাৰ থকাৰ সময়তে বহু কেইগৰাকী বিষয়াৰ পদোন্নতি আৰু বদলিৰ নিৰ্দেশটোৱে এতিয়া বহুতকে আচৰিত কৰি তোলা পৰিলক্ষিত হৈছে।
সোমবাৰে জাৰি কৰা নিৰ্দেশনাটোত কোৱা হৈছে যে শিলচৰৰ মুখ্য বন সংৰক্ষক সুমন মহাপাত্ৰক অতিৰিক্ত প্ৰধান মুখ্য বন সংৰক্ষক হিচাবে পদোন্নতি দিয়া হৈছে।
তেওঁ গুৱাহাটীত কাৰ্যনিৰ্বাহ কৰিব।সামাজিক বনানিকৰণৰ মুখ্য বন সংৰক্ষক হৃদেশ মিশ্ৰক উজনি অসম সংমণ্ডলৰ অতিৰিক্ত প্ৰধান বন সংৰক্ষক হিচাবে পদোন্নতি দিয়া হৈছে, মুখ্য বন সংৰক্ষক সত্যেন্দ্ৰ সিঙক গুৱাহাটীত অতিৰিক্ত প্ৰধান বন সংৰক্ষক হিচাবে পদোন্নতি দিয়া হৈছে।যোৰহাটৰ উজনি অসম চক্ৰৰ বন সংৰক্ষক এন আনন্দক মুখ্য বন সংৰক্ষক হিচাবে পদোন্নতি দিয়া হৈছে।
দেৰাডুনৰ CASFOSৰ অধ্যাপক হিচাবে ডেপুটেছনত থকা চি ৰমেশক মুখ্য বন সংৰক্ষক হিচাবে পদোন্নতি দিয়া হৈছে।
তেজপুৰৰ উত্তৰ অসম চক্ৰৰ বন সংৰক্ষক জিতেন্দ্ৰ শৰ্মাক শিলচৰৰ মুখ্য বন সংৰক্ষক হিচাবে পদোন্নতি দিয়া হৈছে।বঙাইগাঁওৰ বন সংৰক্ষক মহম্মদ ছোলমান উদ্দিন চৌধুৰীক গুৱাহাটীত মুখ্য বন সংৰক্ষক হিচাবে পদোন্নতি দিয়া হৈছে।
নগাঁওৰ বন সংমণ্ডল বিষয়া ৰাজেন চৌধুৰীক বঙাইগাঁওৰ সামাজিক বনানিকৰণৰ নামনি অসম সংমণ্ডলৰ বন সংৰক্ষক হিচাবে পদোন্নতি দিয়া হৈছে।বিটিচিৰ বন বিষয়া অনিন্দ্য স্বৰ্গীয়াৰীক গুৱাহাটীলৈ অতিৰিক্ত প্ৰধান মুখ্য বন সংৰক্ষক হিচাবে বদলি কৰা হৈছে।
গুৱাহাটীত কৰ্মৰত এপিচিচিএফ সন্দীপ কুমাৰক অতিৰিক্ত প্ৰধান মুখ্য বন সংৰক্ষক হিচাবে নামনি অসম মণ্ডল, গুৱাহাটীলৈ বদলি কৰা হৈছে।
মুখ্য বন সংৰক্ষক অনুৰাগ সিঙক বিটিআৰলৈ বদলি কৰা হৈছে।এপিচিচিএফ এছ পি বশিষ্ঠক সামাজিক বনানিকৰণৰ অতিৰিক্ত পিচিচিএফ হিচাবে বদলি কৰা হৈছে।
বন সংৰক্ষক বংকিম শৰ্মাক তেজপুৰলৈ বদলি কৰা হৈছে। সীমান্ত শাখাৰ বন সংৰক্ষক মজিদুল হুছেইনক গুৱাহাটীৰ চিএফ হিচাবে বদলি কৰা হৈছে।
ডিচিএফ বসন্থন বিক নগাঁও সংমণ্ডলৰ ডিএফঅ’ হিচাবে বদলি কৰা হৈছে। ৰাজ্যত নিৰ্বাচনৰ ফলাফল ঘোষণা হ’ব অহা ২ মে’ত।
এনে পৰিস্থিতিত ৰাজ্যত চলি আছে এখন ‘কেয়াৰ টেকাৰ’ চৰকাৰ। এনে এখন চৰকাৰে কিদৰে বন বিভাগৰ বহু বিষয়াক পদোন্নতি অথবা বদলি কৰিব পাৰিলে সেয়া এতিয়া ৰহস্যৰ বিষয় হৈ পৰিছে।
এই ক্ষেত্ৰত একাংশ ক্ষমতাশালী বিষয়াই ক্ষমতাৰ অপ ব্যৱহাৰ কৰা বুলিও অভিযোগ উঠিছে।