গোলকীয় স্তৰত ইন্ধনৰ যোগানক লৈ সৃষ্টি হোৱা শংকাৰ মাজতে শুকুৰবাৰে ইণ্ডিয়ান অইল কৰ্প’ৰেশ্যন লিমিটেডে (আই অ’ চি এল) অসম আৰু মণিপুৰৰ জনসাধাৰণক আশ্বস্ত কৰিছে যে ৰাজ্য দুখনত ৰন্ধন গেছ (এল পি জি) আৰু পেট্ৰ’ল-ডিজেলৰ কোনো নাটনি হোৱা নাই। বৰ্তমানৰ পৰিস্থিতিত ইন্ধনৰ যোগান ব্যাহত হোৱাৰ আশংকা কৰি ৰাইজৰ মাজত সৃষ্টি হ’ব পৰা আতংকৰ প্ৰতি লক্ষ্য ৰাখি তৈল প্ৰতিষ্ঠানটোৱে স্পষ্ট কৰি দিছে যে উত্তৰ-পূৰ্বাঞ্চলৰ এই দুয়োখন ৰাজ্যৰ প্ৰয়োজনীয়তা নিৰৱচ্ছিন্নভাৱে পূৰণ কৰিব পৰাকৈ তেওঁলোকৰ হাতত পৰ্যাপ্ত পৰিমাণৰ ইন্ধন মজুত আছে।
শেহতীয়াকৈ আন্তঃৰাষ্ট্ৰীয় বজাৰত খাৰুৱা তেলৰ মূল্যৰ অস্থিৰতা আৰু যোগান শৃংখল ব্যাহত হোৱাৰ খবৰে সমগ্ৰ বিশ্বতে ব্যাপক উদ্বেগ প্ৰকাশ কৰা পৰিলক্ষিত হৈছে। এই সন্দৰ্ভত প্ৰতিক্ৰিয়া ব্যক্ত কৰি আই অ’ চি এলৰ উত্তৰ-পূব মণ্ডলৰ জ্যেষ্ঠ বিষয়াসকলে সংবাদ মাধ্যমৰ আগত জানিবলৈ দিয়ে যে বৰ্তমান ৰাজ্যখনৰ সকলোবোৰ বটলিং প্লাণ্ট আৰু ইন্ধন ডিপোসমূহত স্বাভাৱিক কাম-কাজ অব্যাহত আছে। কৰ্তৃপক্ষই ৰাইজক আতংকিত হৈ প্ৰয়োজনতকৈ অধিক ইন্ধন বা ৰন্ধন গেছ ক্ৰয় কৰাৰ পৰা বিৰত থাকিবলৈ আহ্বান জনাইছে আৰু লগতে আশ্বাস দিছে যে যোগান প্ৰক্ৰিয়াত কোনো ধৰণৰ আউল লগা নাই।
উল্লেখ্য যে, বিগত কেইদিনমান ধৰি সামাজিক মাধ্যমৰ লগতে একাংশ মহলত ইন্ধনৰ সম্ভাৱ্য নাটনিৰ বিষয়ে উৰাবাতৰি বিয়পি পৰিছিল, যাৰ ফলত গ্ৰাহকসকলে পেট্ৰ’ল পাম্প আৰু গেছ এজেঞ্চীসমূহত অস্বাভাৱিকভাৱে ভিৰ কৰাৰ উপক্ৰম হৈছিল। পূৰ্বেও এনে ধৰণৰ ভুৱা খবৰৰ বাবে সাধাৰণ জনজীৱনত প্ৰভাৱ পৰাৰ লগতে বজাৰত কৃত্ৰিম নাটনিৰ সৃষ্টি হৈছিল। সেয়েহে এইবাৰ প্ৰশাসনে পূৰ্বৰে পৰা সতৰ্কতামূলক ব্যৱস্থা গ্ৰহণ কৰি ৰাইজক এনে ভিত্তিহীন উৰাবাতৰিত বিশ্বাস নকৰিবলৈ অনুৰোধ জনাই আহিছে।
