অসম চৰকাৰে মংগলবাৰে নতুন কোভিড নিৰ্দেশনা জাৰি কৰিছে। আজিৰে পৰা সন্ধিয়া ৬ বজাৰ পূৰ্বে বন্ধ হ’ব সকলো বজাৰ, চুপাৰ মাৰ্কেট, শ্বপিংম’লৰ দোকান, সাপ্তাহিক বজাৰ আদি। আজি ৰাজ্যৰ মুখ্য সচিব জিঞ্চু বৰুৱাই এক সংবাদ মেল সম্বোধি এইদৰে কয়।
সংবাদ মেলত মুখ্য সচিব জিঞ্চু বৰুৱাই লগতে কয় যে মাত্ৰ ৫০ শতাংশ কৰ্মচাৰীৰে চৰকাৰী আৰু বেচৰকাৰী কাৰ্যালয়সমূহ চলাব লাগিব। সকলো কৰ্মস্থান তথা কাৰ্যালয় আদি সম্পূৰ্ণৰূপে চেনিটাইজ কৰিব লাগিব। কৰ্মচাৰীসকলেও চেনিটাইজাৰ ব্যৱহাৰ কৰিব লাগিব।
কোভিড নীতি নিয়ম উলংঘাকাৰীৰ বিৰুদ্ধে গোচৰ ৰুজু কৰা হ’ব বুলি উল্লেখ কৰি তেওঁ লগতে কয় যে মাস্ক পৰিধান নকৰাসকলে ১০০০ টকাকৈ জৰিমনা ভৰিব লাগিব।
প্ৰশাসনৰ অনুমতি সাপেক্ষে অনুষ্ঠান আয়োজন কৰিব পাৰিলেও তাত ৫০ শতাংশ অথবা সৰ্বোচ্চ ৪০০ জন লোকহে উপস্থিত থাকিব পাৰিব। আনহাতে বিবাহকে ধৰি ঘৰুৱা অনুষ্ঠানত মাত্ৰ ১০০ জন লোকহে উপস্থিত থাকিব পাৰিব।
মৃতকৰ শেষকৃত্যত ২০ জনতকৈ অধিক লোক থাকিব নোৱাৰিব।
কাৰ্যালয়সমূহত ঘৰৰ পৰা কাম কৰাৰ ক্ষেত্ৰতহে অধিক গুৰুত্ব আৰোপ কৰিবলৈ কোৱা হৈছে। গৰ্ভৱতী মহিলা কৰ্মচাৰী অথবা ৫ বছৰ অনুৰ্ধৰ শিশু থকা মাতৃয়ে ঘৰৰ পৰাই কাম কৰিব পাৰিব।
ইফালে শিক্ষানুষ্ঠানসমূহত মাত্ৰ ৫০ শতাংশ শিক্ষাৰ্থী উপস্থিতি থাকিব পাৰিব। সকলো শিক্ষানুষ্ঠানে মান সম্পন্ন অনলাইন শিক্ষা প্ৰদানৰ ব্যৱস্থা ৰখাটো বাধ্যতামূলক কৰা হ’ব। বিদ্যালয়সমূহত পুৱাৰ প্ৰাৰ্থনা সভাকে ধৰি সকলো শিক্ষাৰ্থী সমবেত হ’ব পৰা কাৰ্যসূচী বাতিল কৰা হৈছে।
ধৰ্মীয় স্থান অথবা উৎসৱসমূহত ঘণ্টাই প্ৰতি ২০ জনকৈ লোক উপস্থিত থাকিব পাৰিব। অৱশ্যে তীৰ্থ স্থানসমূহত ঘণ্টাই প্ৰতি ৫০ জনকৈ ব্যক্তি উপস্থিত থাকিব পাৰিব।
অটোৰিক্সা, অ’লা, উবেৰ বা আন যান-বাহনত এজন চালক আৰু দুজন যাত্ৰী যাব পাৰিব।
চিটাবাছ, আন্তঃজিলা আৰু আন্তঃৰাজ্যিক বাছসমূহে ৫০ শতাংশ যাত্ৰীহে নিব পাৰিব।
ৰাজহুৱা স্থানত মাস্ক পৰিধান বাধ্যতামূলক কৰা হৈছে। এখন দোকানত একে সময়ত ৫ জন লোক সমবেত হ’ব পাৰিলেও ৬ ফুটৰ দূৰত্ব বজাই ৰখাতো বাধ্যতামূলক কৰা হৈছে।
চেলুন, পাৰ্লাৰসমূহ খোলা থাকিব যদিও কোভিড নীতি নিয়ম কঠোৰ ভাৱে মানি চলিব লাগিব।
এই আটাইবোৰ নতুন কোভিড নীতি নিৰ্দেশনা ৩০ এপ্ৰিল পৰ্যন্ত কঠোৰভাৱে বলৱৎ কৰা হৈছে বুলি সদৰী কৰিছে ৰাজ্যৰ মুখ্য সচিবগৰাকীয়ে।
