সৰ্বাধিক লোকক যাতে কোভিড-১৯ৰ ভেকচিন দিব পৰা যায় তাৰ বাবে অসম চৰকাৰে কোভাক্সিনৰ ১ কোটি ড’জ ক্ৰয় কৰাৰ পৰিকল্পনা কৰিছে।
ৰাজ্যৰ স্বাস্থ্য বিভাগৰ প্ৰধান সচিব সমীৰ সিনহাই ৰাজ্যখনলৈ প্ৰয়োজনীয় পৰিমানৰ কোভাক্সিন যোগানৰ অনুৰোধ জনাই হায়দৰাবাদৰ ভাৰত বায়’টেক ইন্টাৰনেশ্যনেলৰ অধ্যক্ষ তথা পৰিচালন সঞ্চালকলৈ এখন পত্ৰ লিখিছে।
দেশৰ আন ৰাজ্যৰ সৈতে অসমতো অহা ১ মে’ৰ পৰা ১৮ বছৰৰ পৰা ৪৫বছৰ বয়সৰ তলৰ সকলো যোগ্য ব্যক্তিকে কোভিড-১৯ৰ ভেকচিন প্ৰদান কৰিবলৈ এক বৃহৎ পৰিমানৰ ভেকচিনৰ প্ৰয়োজন হ’ব।
সমীৰ সিনহাই লিখিছে যে এনে ব্যৱস্থাৰ অধীনত অসম চৰকাৰৰ স্বাস্থ্য আৰু পৰিয়াল কল্যাণ বিভাগে ভাৰত চৰকাৰে নিৰ্দ্ধাৰণ কৰি দিয়া দৰত ১কোটি কোভাক্সিনৰ ড’জ ক্ৰয় কৰাৰ প্ৰস্তাৱ দিছে।
পত্ৰখনত সিনহাই ভাৰত বায়’টেকক এই সন্দৰ্ভত যোগানৰ সূচীকে ধৰি ডেলিভাৰি তথা পেমেন্টৰ চৰ্তাৱলীৰ সৱিশেষ তাৎক্ষণিকভাৱে অৱগত কৰিবলৈ অনুৰোধ জনাইছে।
স্বাস্থ্য সচিবগৰাকীয়ে কয় যে অসম চৰকাৰৰ হৈ ভেকচিন ক্ৰয়ৰ ক্ষেত্ৰত ৰাজ্যখনৰ এন এইচ এম হৈছে হ’ব নডেল এজেন্সি আৰু এন এইচ এম, অসমৰ পৰিচালন সঞ্চালক ড০ লক্ষ্মণন হ’ব নডেল বিষয়া।