যোৱা ৭-৮ মাহ ধৰি ৰাজ্যৰ অসামৰিক চৰকাৰী চিকিৎসালয়বোৰে ৰোগীৰ খাদ্যৰ বাবত পাব লগীয়া ধন মুকলি কৰি দিয়া নাই বিত্ত বিভাগে, যাৰ ফলত চিকিৎসালয়বোৰত খাদ্য যোগান ধৰি থকা ঠিকাদাৰী প্ৰতিষ্ঠানবোৰে নিজৰ ধন খৰচ কৰি থাকিব লগীয়া হৈছে।
এই সম্পৰ্কীয় এটা প্ৰতিবেদন প্ৰকাশ কৰিছে দৈনিক জনমভূমি নামৰ কাকতখনে।
প্ৰতিবেদনটোৰ মতে, ২০১৮ চনৰ ডিচেম্বৰৰ পৰাই ৰাজ্যৰ বিভিন্ন জিলাত থকা চৰকাৰী চিকিৎসালয়বোৰে ৰোগীক খাদ্য যোগানৰ বাবদ পাব লগীয়া ধন পোৱা নাই। এই পৰিস্থিতি অব্যাহত থাকিলে অনাগত দিনত চিকিৎসালয়বোৰত খাদ্য যোগান বন্ধ হৈ পৰাৰ সম্ভাৱনা আছে।
স্বাস্থ্য বিভাগৰ নিয়মমতে, চৰকাৰী চিকিৎসালয়বোৰত চিকিৎসাধীন হৈ থকা ৰোগীক দিনে দুবাৰকৈ ভাত দিয়াৰ উপৰি চাহ-বিস্কুট আদি দিয়া হয়। ইয়াৰ বাবদ প্ৰতিজন ৰোগীৰ বিপৰীতে দিনে ৬৯ টকাৰ পৰা ৯০ টকাকৈ খৰচ পৰে।
একোখন চৰকাৰী চিকিৎসালয়ত মাহে তিনি লাখ বা তাতকৈ অধিক টকা খাদ্য যোগানৰ বিল হয়, স্বাস্থ্যসেৱা সঞ্চালকালয়ৰ কাৰ্য্যালয়ৰ সূত্ৰৰ ভিত্তিত প্ৰতিবেদনটোত কোৱা হৈছে।
লগতে পঢ়ক জখলাবন্ধা চৰকাৰী চিকিৎসালয়ত বিতৰণ কৰিলে ম্যাদ ওকলা ঔষধ : তীব্ৰ প্ৰতিক্ৰিয়া
এই বিলবোৰ মাহৰ মূৰত সংশ্লিষ্ট চিকিৎসালয়ৰ অধীক্ষক আৰু জিলাৰ যুটীয়া স্বাস্থ্যসেৱা সঞ্চালকৰ দ্বাৰা অনুমোদন হয়। তাৰ পিছত স্বাস্থ্যসেৱা সঞ্চালকৰ ওচৰলৈ আহে। উক্ত বিল স্বাস্থ্যসেৱা সঞ্চালকে পুনৰীক্ষণ কৰি স্বাস্থ্য আৰু পৰিয়াল কল্যাণ বিভাগৰ সচিবৰ অনুমোদনৰ বাবে প্ৰেৰণ কৰে।
প্ৰতিবেদনটোৰ মতে, ৰাজ্যৰ বহুকেইখন জিলাৰ অসামৰিক চিকিৎসালয়ৰ খাদ্য যোগানৰ বিল স্বাস্থ্যসেৱা সঞ্চালকৰ কাৰ্য্যালয়ে পুনৰীক্ষণ কৰি স্বাস্থ্য আৰু পৰিয়াল কল্যাণ বিভাগৰ সচিবলৈ প্ৰেৰণ কৰাৰ পিছতো প্ৰায় ৭/৮ মাহ ধৰি এইবোৰ পৰি আছে।
উল্লেখ কৰিব পাৰি যে চৰকাৰী চিকিৎসালয়ত ৰোগীয়ে বিনামূলীয়া ঔষধ প্ৰায় নাপায়েই। সাধাৰণ জ্বৰ, পেটচলা, কাহৰ চিৰাপ আদিৰ দুই-এটা ঔষধৰ বাদে প্ৰায়বোৰ দৰবেই ৰোগীয়ে ব্যক্তিগত ফাৰ্মাচিৰ পৰা কিনিব লগীয়া হয়।
আনহাতে শেহতীয়াকৈ জখলাবন্ধা, বিহালীকে ধৰি একাধিক চৰকাৰী চিকিৎসালয়ত ম্যাদ ওকলা ঔষধ বিতৰণৰ গুৰুতৰ বিসংগতি পোহৰলৈ আহিছিল।
