কোভিদ-১৯ পজিটিভ বৃদ্ধি হোৱাৰ ঘটনাত কিয় আচৰিত হোৱা নাই স্বাস্থ্য মন্ত্ৰী হিমন্ত বিশ্ব শৰ্মা?
বুধবাৰৰ ৰাতিৰ পৰা আজি পুৱালৈকে মুঠ ২২ জন ৰোগী পজিটিভ হৈছে। তাৰ পৰিপ্ৰেক্ষিতত গুৱাহাটীবাসী ৰাইজ আতংকিত হোৱাটো স্বাভাৱিক।
কিন্তু ইয়াৰ পাছতো আচৰিত হোৱা নাই মন্ত্ৰী হিমন্ত বিশ্ব শৰ্মা।
বিশেষকৈ আজিৰ দিনটোত ৭ গৰাকী কেন্সাৰ আৰু হৃদ ৰোগী এই ৰোগত আক্ৰান্ত হোৱাৰ পাছত ইয়াক স্বাভাৱিক আখ্যা দিয়ে মন্ত্ৰীগৰাকীয়ে।
‘আজি ৭ গৰাকী পজিটিভ পোৱাৰ পাছত আমি বহুত বেছি আচৰিত হোৱা নাই, এয়া স্বাভাৱিক কথা। কিয়নো আমি আশা কৰা ধৰণে মুম্বাইৰ পৰা অনা কেন্সাৰ ৰোগীসকলৰ মাজত কিছুসংখ্যক পজিটিভ হ’ব বুলি পূৰ্বতে ভাবিছিলো।‘ কিছু সময় পূৰ্বে অনুষ্ঠিত সংবাদমেলত মন্ত্ৰীগৰাকীয়ে এইদৰে কয়।
তেওঁ লগতে কয়, ‘আন লোকৰ সৈতে যাতে সংস্পৰ্শলৈ নাহে তাৰ প্ৰতি লক্ষ্য ৰাখি হোটেল ৰেডিশ্যন ব্লুত কেন্সাৰ ৰোগীসকলক বিশেষভাৱে সুবিধা প্ৰদান কৰি ৰখা হৈছিল।‘
ইপিনে, মুংৰু চাহানীৰ পাছতে কালিৰ দিনটোত ১৫ গৰাকীকৈ লোক আক্ৰান্ত হোৱাক লৈ হিমন্ত বিশ্ব শৰ্মাই সংবাদমেলত কেতবোৰ তথ্য দাঙি ধৰে।
তেওঁ কয় ‘মুংৰু চাহানীয়ে আমিনগাঁৱৰ আলু গুডামত কাম কৰিছিল। তেওঁৰ জ্বৰ হোৱাৰ পাছত ফাঁচিবজাৰৰ ৰাজকমল হোটেললৈকে ঘূৰি আহিছিল। তেওঁৰ সংস্পৰ্শলৈ অহা আৰু তেওঁক চিকিৎসা কৰা এজন চিকিৎসকসহ মুঠ ৩২ জন ব্যক্তিৰ চেম্পল সংগ্ৰহ কৰা হৈছে। ৩২ জনৰ চেম্পলৰ ভিত্তিত কালি GMCH-ত ১৫ জনক পজিটিভ বুলি গণ্য কৰে।‘
‘এই ৰোগীসকলৰ ভিতৰত এজন ৰোগী বিন্দেশ্বৰী ঠাকুৰ নামৰ কুমাৰপাৰাৰ নাপিতজনে ৰাজকমল হোটেলৰ তলত আহি চুলি কাটে আৰু গধূলি কুমাৰপাৰালৈ উভটি যায়। প্ৰায় ৭০-৮০ জন লোকক তেওঁ চুলি কাটিছিল।‘ এইদৰে কয় মন্ত্ৰীগৰাকীয়ে।
ইয়াৰোপৰি, কোভিদ-১৯ পজিটিভ হোৱা মুকেশ সিং ৰাজকমল হোটেলৰ মেনেজাৰ আছিল আৰু তেওঁৰ ঘৰত ফটাশিল আমাবাৰীৰ জি.এছ কলনীত বুলি মন্ত্ৰীগৰাকীয়ে জানিবলৈ দিয়ে।
তেওঁ আৰু কয়, ‘কৃষ্ণ কুমাৰ গুপ্তা যোৱা ৩ মাৰ্চত ঝাৰখণ্ডৰ পৰা আহিছিল আৰু লকডাউনৰ ফলত যাব নোৱাৰি ৰাজকমল হোটেলত থাকি গৈছিল। প্ৰবীণ কুমাৰ ৰাও গুদামৰ সদস্য নাছিল যদিও তেওঁ ৰাজকমল হোটেলত আছিল।‘
আক্ৰান্ত বিশ্বনাথ শ্বাহাই নিজৰ গাড়ীৰে মুংৰু চাহানীক গাড়ীৰে চিকিৎসালয়লৈ লৈ গৈছিল বুলিও মন্ত্ৰীগৰাকীয়ে কয়।
‘কালি আক্ৰান্ত হোৱা শংকৰ চাহা সৰু চাহৰ দোকানী আছিল। পানবজাৰ ৰেইলৱে কলনীত থাকে।‘ তেওঁ কয়।
ইয়াৰোপৰি, ১৫ জন লোক পজিটিভ হোৱাৰ পাছত মুঠ ৩৪০ গৰাকী লোকৰ শ্বাব চেম্প’ল সংগ্ৰহ কৰা হৈছে বুলি জানিবলৈ দি লগতে কয় ‘এই ৩৪০ গৰাকী লোক পোনপটীয়াকৈ বা আওপকীয়াকৈ এই লোকসকলক লগত সংস্পৰ্শলৈ আহিছিল।‘
‘এই লোকসকলৰ মাজত যদি পজিটিভ আহে তেন্তে সেই অঞ্চলটোৰ মোবাইল ট্ৰেকিঙত ধৰা পৰা লোকসকলে সাৱধানতা অৱলম্বন কৰি প্ৰিলিমিনাৰি স্ক্ৰিনিং টেষ্ট কৰিবলগীয়া হ’ব পাৰে। আৰক্ষীক ইতিমধ্যে মোবাইল টাৱাৰৰ ডাটা সংগ্ৰহ কৰিবলৈ কোৱা হৈছে।‘ তেওঁ কয়।
মন্ত্ৰীগৰাকীয়ে উক্ত অঞ্চললৈ যোৱা ৭ দিনৰ ভিতৰত ভ্ৰমণ কৰা লোকসকলৰ যদি কাৰোবাৰ গাৰ বিষ, জ্বৰ, গোন্ধ নোপোৱা, ডায়েৰীয়া হয়, তেন্তে ১০৪ ত ফোন কৰি মোবাইল নম্বৰ, ঠিকনা জনাবলৈ অনুৰোধ জনায়।
ইপিনে, এই ১৫ গৰাকী লোকৰ দেহত এই মাৰাত্মক ভাইৰাছৰ উপস্থিতি পোৱাৰ পাছতে ৰাজকমল হোটেল, পূৱালী পথ, ফটাশিল আমবাৰীৰ জিএছ কলনী, কুমাৰপাৰা আৰু পানবজাৰ ৰেইলৱে কলনী কন্টেইনমেন্ট জ’ন হিচাপে ঘোষণা কৰা হয় বুলি তেওঁ কয়।
জিলাখনৰ স্বাভাৱিক জীৱন যাত্ৰাত অসুবিধা নকৰাকৈ কোভিদ আক্ৰান্ত ৰোগী চিনাক্ত হোৱা অঞ্চলসমূহ কন্টেইমেন্ট জ’ন কৰা হৈছে বুলি তেওঁ কয়।
কাইলৈৰ পৰা ইমান দিনে কুৱাৰেণ্টাইনত থকা GMCH-ৰ চিকিৎসকলে (যাৰ ৰিজাল্ট নিগেটিভ আহিছে) পুনৰ চিকিৎসা সেৱা আৰম্ভ কৰিব বুলি তেওঁ জানিবলৈ দিয়ে।