সদৌ অসম হিন্দু সুৰক্ষা সেনা নামৰ নতুনকৈ জন্ম লোৱা এটা সংগঠনে ভাৰতবৰ্ষক হিন্দু ৰাষ্ট্ৰ হিচাপে ঘোষণা কৰাৰ লগতে অসমকে ধৰি সমগ্ৰ দেশতে গৰুৰ মাংস নিষিদ্ধ কৰিবলৈ চৰকাৰক আহ্বান জনাইছে।
গুৱাহাটী প্ৰেছ ক্লাবত বুধবাৰে সংবাদমেল সম্বোধন কৰি বৰ্তমান সময়ত অসম তথা ভাৰতৰ হিন্দুসকল সুৰক্ষিত নহয় বুলি তেওঁলোকে কয়।
“বৃহত্তৰ হিন্দু সমাজখনৰ সুৰক্ষাই হব সংগঠনৰ মূল উদ্দেশ্য। অসমত শদিয়াৰ পৰা ধুবুৰীলৈ হিন্দুখিনি সুৰক্ষিত নহয়। সেইবাবে কেইটামান বিশেষ দাবী লৈ ওলাই আহিছো,” সংবাদমেলত এইদৰে কয় সংগঠনটোৰ সভাপতি প্ৰদীপ কলিতাই।
সংবাদমেলত তেওঁ উল্লেখ কৰা দাবীকেইটা হৈছে “ভাৰতবৰ্ষক হিন্দু ৰাষ্ট্ৰ হিচাপে ঘোষণা কৰিব লাগে । গৰুক ৰাষ্ট্ৰীয় জীৱ হিচাপে ঘোষণা কৰা, গৰুৰ মাংস নিষিদ্ধ কৰিব লাগিব, গৰুক কেৱল খেতিৰ বাবেই কিনা-বেচা কৰিব লাগিব। প্ৰত্যেকজন হিন্দু যুৱক-যুৱতীয়ে কর্মসংস্থাপন পাব লাগিব । এই দাবীসমূহ চৰকাৰৰ লগত আলোচনা কৰি সমাজখন হিন্দুৰ বাবে সুৰক্ষা কৰি হিন্দু ৰাষ্ট্ৰ গঢ়িব চেষ্টা কৰিম।”
আনহাতে, ধুবুৰী, হাইলাকান্দি, কৰিমগঞ্জ, বৰপেটা আদি ঠাইত সত্ৰ, মন্দিৰৰ ওপৰত মুছলমান লোকৰ বেদখল চলিছে বুলি অভিযোগ তোলে সংগঠনটোৱে। গতিকে চৰকাৰে ইয়াৰ ওপৰত বিহীত ব্যৱস্থা ল’ব লাগে বুলিও সভাপতি কলিতাই দাবী জনায়।
চৰকাৰলৈ সকীয়নি দি সংগঠনটোৰ সভাপতিজনে কয়, “যদি চৰকাৰে সুৰক্ষা দিব নোৱাৰে তেনেহ’লে আন্দোলন কৰিবলৈ বাধ্য হ’ম।”
ইয়াৰোপৰি ইছলামিক ৰাষ্ট্ৰত কংগ্ৰেছৰ বিশেষভাৱে চাপ’ৰ্ট আছে বুলি অভিযোগ কৰাৰ লগতে অখিল গগৈকো ইছলামিক ৰাষ্ট্ৰৰ পৃষ্ঠপোষক বুলি মন্তব্য কৰে।
তেওঁ লাভ জেহাদৰ বিষয়টোৰ সন্দৰ্ভত কয় যে লাভ জেহাদত হিন্দু ধর্মৰ বিভিন্ন কাষ্টৰ ছোৱালীক ভাল পাই বিয়া পাতিলে তেওঁলোকক য়ুথ ফ’ৰামৰ ফালৰ পৰা টকা দিয়া হয়।
তেওঁ আৰু কয় “কেৰালা, তামিলনাডুৰ পাছত এইবাৰ অসমত হৈ আছে এই লাভ জেহাদ। এয়া বন্ধ কৰিব লাগে।”
ৰাম মন্দিৰৰ সন্দৰ্ভত তেওঁ কয় “ৰাম মন্দিৰ হব লাগে কিন্তু বিজেপি চৰকাৰ শাসনত বহাৰ পাছত নিমাত হৈ আছে। ৰাম মন্দিৰৰ ওপৰত উচ্চতম ন্যায়ালয়ে উচিত ৰায় দিলেহে আমি উচ্চতম ন্যায়ালয়ক সন্মান দিম।”
