কেন্দ্ৰীয় চৰকাৰৰ অভিলাষী আঁচনি ‘জল জীৱন মিছন‘ৰ ৰূপায়ণক লৈ সমগ্ৰ দেশৰ ভিতৰতে অসমত দ্বিতীয় সৰ্বাধিক অভিযোগ উত্থাপিত হৈছে। যোৱা ৩০ মাৰ্চত ৰাজ্যসভাত এক লিখিত উত্তৰত কেন্দ্ৰীয় জল শক্তি দপ্তৰৰ ৰাজ্যিক মন্ত্ৰী ভি সোমান্নাই এই তথ্য প্ৰকাশ কৰে। মন্ত্ৰীগৰাকীয়ে সদনত দাখিল কৰা তথ্য অনুসৰি, গ্ৰামাঞ্চলৰ প্ৰতিঘৰ মানুহক বিশুদ্ধ খোৱাপানী যোগান ধৰাৰ লক্ষ্যৰে আৰম্ভ কৰা এই আঁচনিখনৰ অধীনত অসমৰ পৰা মুঠ ১,২২৬ টা বিসংগতিৰ অভিযোগ চৰকাৰীভাৱে পঞ্জীয়ন হৈছে।
সমগ্ৰ দেশজুৰি জল জীৱন মিছনৰ অধীনত এতিয়ালৈকে মুঠ ১৮,৭৯০ টা অভিযোগ চৰকাৰে লাভ কৰিছে। ইয়াৰে ভিতৰত সৰ্বাধিক ১৬,১৭৮ টা অভিযোগ কেৱল উত্তৰ প্ৰদেশৰ পৰাই উত্থাপিত হোৱাৰ বিপৰীতে এই তালিকাত অসমে দ্বিতীয় স্থান অধিকাৰ কৰিছে। সংবাদ মাধ্যমৰ প্ৰতিবেদন, জনপ্ৰতিনিধি, সাধাৰণ নাগৰিক আৰু চৰকাৰী অভিযোগ দাখিলৰ পৰ্টেলৰ জৰিয়তে এই বিসংগতিসমূহ পোহৰলৈ আহিছে। প্ৰাপ্ত অভিযোগসমূহৰ ভিতৰত মূলতঃ বিত্তীয় অনিয়ম, নিম্নমানৰ কাম আৰু বিকল পানীৰ সংযোগ আদি প্ৰধান সমস্যা হিচাপে চিহ্নিত হৈছে।
ৰাজ্যসভাত এই সন্দৰ্ভত প্ৰতিক্ৰিয়া ব্যক্ত কৰি মন্ত্ৰীগৰাকীয়ে স্পষ্ট কৰি দিয়ে যে খোৱাপানী যোগান ব্যৱস্থাটো মূলতঃ এক ৰাজ্যিক বিষয় আৰু ইয়াৰ সফল ৰূপায়ণৰ প্ৰধান দায়িত্ব ৰাজ্য চৰকাৰসমূহৰ ওপৰত ন্যস্ত থাকে। আনহাতে, কেন্দ্ৰীয় চৰকাৰে এই মিছনৰ অধীনত কেৱল বিত্তীয় আৰু কাৰিকৰী সহায়হে আগবঢ়ায়। আঁচনিখনৰ অগ্ৰগতিৰ বিষয়ে অৱগত কৰি ভি সোমান্নাই জানিবলৈ দিয়ে যে ২০১৯ চনৰ আগষ্ট মাহত এই প্ৰকল্প আৰম্ভ হোৱাৰ পৰা বৰ্তমানলৈকে সমগ্ৰ ভাৰতবৰ্ষৰ ১২.৫৯ কোটিৰো অধিক গ্ৰাম্য পৰিয়ালক ঘৰে ঘৰে খোৱাপানীৰ সংযোগ প্ৰদান কৰা হৈছে। চলিত বৰ্ষৰ ৮ মাৰ্চলৈকে দেশৰ প্ৰায় ৮১.৭২ শতাংশ গ্ৰাম্য পৰিয়ালে এই সুবিধা লাভ কৰিবলৈ সক্ষম হৈছে।
আঁচনিখন ৰূপায়ণৰ ক্ষেত্ৰত সন্মুখীন হোৱা প্ৰত্যাহ্বানসমূহৰ বিষয়েও মন্ত্ৰীগৰাকীয়ে সদনত উল্লেখ কৰে। পানীৰ অভাৱ, ভূগৰ্ভস্থ পানীৰ প্ৰদূষণ, দুৰ্গম যাতায়াত ব্যৱস্থা আৰু বিক্ষিপ্ত জনবসতিৰ দৰে কাৰকসমূহে অসমৰ দৰে ৰাজ্যত আঁচনিখনৰ সফলতাত বিশেষ বাধাৰ সৃষ্টি কৰিছে। অৱশ্যে, আধৰুৱা কামসমূহ সম্পূৰ্ণ কৰাৰ উদ্দেশ্যে কেন্দ্ৰীয় চৰকাৰে বৰ্ধিত বিত্তীয় অনুদানেৰে এই মিছনৰ সময়সীমা ২০২৮ চনৰ ডিচেম্বৰ মাহলৈকে বৃদ্ধি কৰিছে বুলি মন্ত্ৰীগৰাকীয়ে প্ৰকাশ কৰে। ৰাজ্য চৰকাৰসমূহৰ সৈতে সমন্বয় ৰক্ষা কৰি দুৰ্গম অঞ্চলসমূহত পানী যোগান ধৰাৰ ওপৰত চৰকাৰে বৰ্তমান অধিক গুৰুত্ব আৰোপ কৰিছে।
