কালি দক্ষ মন্ত্ৰী ড০ হিমন্ত বিশ্ব শৰ্মাই ৰাজ্যসভাৰ সাংসদ অজিত কুমাৰ ভূঞা কটাক্ষ কৰি তেওঁ AIUDFৰ ওচৰত নিৰ্লজ্জ আত্মসমৰ্পণ কৰি বিবেক, জ্ঞান বিক্ৰী কৰিলে বুলি মন্তব্য প্ৰকাশ কৰিছিল।
ইয়াৰ পাছতেই হিমন্তক উভটি ধৰিছে পিএলপিৰ আদৰ্শৰে পৰিচালিত জাতীয়তাবাদ পুনৰ নিৰ্মাণ সমিতিৰ সাধাৰণ সম্পাদক ৰাজকুমাৰ বৈশ্যই।
এক বিজ্ঞপ্তিৰ জৰিয়তে বৈশ্যই কয় ‘নিজে বিক্ৰী যোৱা হিমন্ত বিশ্বই অজিত ভূঞাক সমালোচনা কৰাৰ অধিকাৰ নাই। অজিত ভূঞাই অসমীয়া জাতিৰ প্ৰতি কৰা ত্যাগ অসমীয়াই মনত ৰাখিব। তাৰ বিপৰীতে হিমন্ত বিশ্ব শৰ্মাই নিজৰ ক্ষমতা প্ৰাপ্তিৰ বাবে গুজৰাটীসকলক অসমলৈ আনি অসমীয়া জাতিৰ ওপৰত যি অত্যাচাৰ চলালে সেই কথা অসমীয়াই সদায় মনত ৰাখিব।’
ইপিনে, বদনে মান আনি অসমৰ যিমান ক্ষতি কৰিছিল হিমন্তই তাতকৈ বহুগুণে বেছি অসমৰ ক্ষতি কৰিছে বুলি মন্তব্য কৰি বৈশ্যই লগতে কয় ‘গুজৰাটৰ পানীৰ পাইপেৰে মুছলমানৰ তেজ বৈ যায় বুলি ডিঙিৰ শিৰ ফুলাই মন্তব্য কৰা হিমন্তই নিজে কিমান টকাত বিক্ৰী গৈ মোদী প্ৰমুখ্যে গুজৰাটীসকলৰ ওচৰত আঁঠু লৈছিল সেই কথা আগতে জনাওঁক।’
‘আমি জনাত তেখেতৰ দৰে কম সময়ৰ ভিতৰত বিক্ৰী যোৱা লোক বহুত কম আছে। তেওঁ এবাৰ নহয়, বহুবাৰ আনৰ ওচৰত বেচি থৈছে। অজিত ভূঞাই নিজৰ স্বাৰ্থত ৰাজনীতিলৈ অহা নাই। ‘বদন’ আৰু ‘মান’ৰ ৰূপত অৱতীৰ্ণ হোৱা হিমন্ত আৰু বিজেপিৰ পৰা অসমীয়া জাতি উদ্ধাৰৰহে প্ৰচেষ্টাতহে ব্ৰতী হৈছে।’ বৈশ্যই এইদৰে কয়।
