নাগালেণ্ডৰ মন জিলাত হোৱা ডাৱৰ বিস্ফোৰণৰ ফলত উজনি অসমৰ নাজিৰাকে ধৰি কাষৰীয়া অঞ্চলত সৃষ্টি হোৱা আকস্মিক আৰু ভয়াৱহ বান পৰিস্থিতিৰ মোকাবিলা কৰাত প্ৰশাসন সম্পূৰ্ণ ব্যৰ্থ হোৱা বুলি গুৰুতৰ অভিযোগ উত্থাপন কৰিছে অসম নাগৰিক সন্মিলনে। আজি এক প্ৰেছ বিবৃতিযোগে সন্মিলনৰ ফালৰ পৰা ৰাজ্য চৰকাৰক সমৰ-সদৃশ তৎপৰতাৰে বানাক্ৰান্তসকলৰ কাষত থিয় দিবলৈ দাবী জনোৱা হৈছে।
অসম নাগৰিক সন্মিলনৰ হৈ অজিত কুমাৰ ভূঞা, পৰেশ মালাকাৰ, শান্তনু বৰঠাকুৰ আৰু আব্দুল মান্নানে সংবাদ মাধ্যমলৈ প্ৰেৰণ কৰা বিবৃতিটোত কয় যে উজনি অসমৰ এই বানৰ তাণ্ডৱ অভাৱনীয় আৰু ইয়াৰ ফলত হোৱা ক্ষয়-ক্ষতিৰ প্ৰকৃত ছবিখন এতিয়াও পোহৰলৈ অহা নাই। অপৰিকল্পিত নিৰ্মাণ কাৰ্য আৰু পৰিৱেশ ধ্বংসৰ ফলতেই এনেদৰে সঘনাই ডাৱৰ বিস্ফোৰণৰ দৰে ঘটনা ঘটিবলৈ লৈছে বুলি তেওঁলোকে দাবী কৰে। চৰকাৰৰ ‘উলম্ব উন্নয়ন’ৰ নীতিয়ে পৰিৱেশৰ ওপৰত অতিপাত চাপ সৃষ্টি কৰি প্ৰকৃতি ধ্বংস কৰি অহাৰ বাবেই এনে পৰিস্থিতিৰ সৃষ্টি হৈছে বুলিও বিবৃতিটোত উল্লেখ কৰা হৈছে।
চৰকাৰী সাহায্য আৰু উদ্ধাৰ অভিযানক লৈ তীব্ৰ ক্ষোভ প্ৰকাশ কৰি সন্মিলনৰ নেতৃত্বই কয় যে এনে ভয়াৱহ পৰিস্থিতিত প্ৰশাসন যিমান ক্ষীপ্ৰতাৰে বানাক্ৰান্তৰ ওচৰত উপস্থিত হ’ব লাগিছিল, বাস্তৱত সেয়া দেখা পোৱা নগ’ল। বানত আৱদ্ধ লোকক উদ্ধাৰ কৰাত প্ৰশাসন সম্পূৰ্ণৰূপে ব্যৰ্থ হোৱাৰ অভিযোগ তুলি তেওঁলোকে কয়, “ঘণ্টাৰ পিছত ঘণ্টা ধৰি বহু লোক নিঃসহায় হৈ বানৰ মাজত আৱদ্ধ হৈ আছে। এতিয়া য’তে-ত’তে মৃতদেহ পৰি থকাৰ খবৰো পোহৰলৈ আহিছে। অথচ ক্ষতিগ্ৰস্তসকলে পৰ্যাপ্ত সাহায্য লাভ কৰা নাই।”
প্ৰশাসনক ৰাজনৈতিক উদ্দেশ্যত উপৰ্যুপৰি ব্যৱহাৰ কৰি থকাৰ বাবেই তেওঁলোকে আকস্মিক দুৰ্ঘটনাৰ জোৰামৰাৰ দৰে নিজৰ প্ৰথম আৰু প্ৰধান দায়িত্ব পাহৰি যোৱা বুলিও অসম নাগৰিক সন্মিলনে অভিযোগ কৰে। বৰ্তমান উজনি অসমৰ বান পৰিস্থিতি অতি ভয়াবহ হৈ থকাৰ প্ৰতি লক্ষ্য ৰাখি পলম নকৰি সমগ্ৰ প্ৰশাসনক সমৰ-সদৃশ তৎপৰতাৰে উদ্ধাৰ আৰু সাহায্য অভিযানত জঁপিয়াই পৰিবলৈ সন্মিলনে আহ্বান জনাইছে।
