বিজেপি চৰকাৰে মধ্যাহ্ন ভোজনৰ দায়িত্ব NGO ক অৰ্পণ কৰি লক্ষাধিক ৰান্ধনীক কৰ্মহীন কৰাৰ পিছত সমগ্ৰ ৰাজ্যতে মধ্যাহ্ন ভোজনৰ ৰান্ধনীসকলে প্ৰতিবাদ সাব্যস্ত কৰাৰ লগতে উত্তপ্ত পৰিস্থিতিৰ সৃষ্টি কৰিছে।
আজি শিলচৰৰ ছোৱালী উচ্চতৰ মাধ্যমিক বিদ্যালয়ত মধ্যাহ্ন ভোজনৰ দায়িত্ব বহন কৰা ‘আকৃতি’ নামৰ এন জি অ’টোৱে আৰক্ষীৰ উপস্থিতিতহে খিচিৰি বিলাইছে।
বিদ্যালয়খনৰ ৰঞ্জিত দাস নামৰ এগৰাকী কৰ্মচাৰীয়ে কয় যে, ‘১ নৱেম্বৰৰ দিনা তেওঁলোকে মধ্যাহ্ন ভোজনৰ খাদ্য দিনৰ ২.০৭ মিনিটত বিদ্যালয়লৈ আনিছে, তেতিয়া বিদ্যালয় বন্ধ হোৱাৰে সময় হ’ল। তাৰ পিছদিনা তেওঁলোক আহিছে ২.১০ মিনিটত। কালি মই তেওঁলোকক ক’লো তেওঁলোকে ১২ বজাৰ আগত নাহিলে আমি তেওঁলোকৰ মধ্যাহ্ন ভোজনৰ খাদ্য ল’ব নোৱাৰিম আৰু আজি তেওঁলোকে লগত আৰক্ষীৰ দল লৈ আহিছে।’
তাৰোপৰি দাসে কয় যে, ‘এন জি অ’টোৱে অনা খাদ্য স্বাস্থ্যৰ বাবে উপযুক্ত নহয় আৰু ছাত্ৰ-ছাত্ৰীসকলে খাদ্যত মাখি বিচাৰি পাইছে। ফলত আধাতকৈ বেছি ছাত্ৰ-ছাত্ৰীয়ে সেই খাদ্য খোৱাৰ সলনি ডাষ্টবিনত পেলাই দিছে।’
লগতে তেওঁ কয় ‘আমি খাদ্যখিনি গ্ৰহণ কৰিব বিচৰা নাছিলো। কিন্তু এন জি অ’টোৱে লগত আৰক্ষীৰ দল লৈ আহিছে গতিকে আমাৰ ওচৰত বিকল্প নাই।’
বিদ্যালয়খনৰ এগৰাকী জ্যেষ্ঠ শিক্ষকে কয় যে, ‘পূৰ্বতে আমাৰ বিদ্যালয়ত মধ্যাহ্ন ভোজনৰ কাৰ্য সুচাৰুৰূপে চলি আছিল। ছাত্ৰ-ছাত্ৰীসকলেও ভাল খাদ্য খাবলৈ পাইছিল।’
লগতে জ্যেষ্ঠ শিক্ষক গৰাকীয়ে কয় যে, ‘এইটো অপৰাধেই হৈছে নে কি হৈছে নাজানো কিন্তু এই ৰাজনৈতিক পাকচক্ৰত আটাইতকৈ ভোক্তভোগী হৈছে ছাত্ৰ-ছাত্ৰীসকল। মই ব্যক্তিগত ভাৱে আশা কৰিছো যে ইয়াৰ এটা সমাধান হওক।’