অসমৰ এন আৰ চিত অন্তৰ্ভুক্ত নোহোৱাসকলৰ “নাগৰিকত্ব” বিচাৰ শীঘ্ৰেই আৰম্ভ হ’ব।
অসমৰ বিদেশী ন্যায়াধিকৰণসমূহত ৰাজ্য চৰকাৰে শেহতীয়াকৈ ২২১গৰাকী সদস্য নিযুক্তি দিছে। আৰু অহা মাহত বিচাৰ প্ৰক্ৰিয়া আৰম্ভ হ’ব বুলি ধাৰণা কৰা হৈছে।
অসমৰ চৰকাৰৰ এজন জ্যেষ্ঠ বিষয়াই শুকুৰবাৰে নৰ্থইষ্ট নাওক জনোৱা মতে, বাচনি কৰা বিষয়াসকল দায়িত্ব গ্ৰহণৰ দিনৰে পৰা এবছৰলৈ নিযুক্ত হ’ব।
১ অক্তোবৰত তেওঁলোকে দায়িত্ব গ্ৰহণ কৰাৰ কথা, নাম প্ৰকাশ কৰিব নোখোজা বিষয়াগৰাকীয়ে লগতে জনায়।
তেওঁ জনায় যে অহা ২৮ আৰু ২৯ ছেপ্তেম্বৰত বিষয়াসকলৰ এক প্ৰশিক্ষণ কৰ্মশালা অনুষ্ঠিত হ’ব।
এই নতুন নিযুক্তিৰ ফলত অসমত প্ৰায় ২০০খন বিদেশী ন্যায়াধিকৰণ কাৰ্য্যক্ষম হৈ উঠিব।
নিযুক্তি দিয়া ২২১গৰাকীৰ মাজত আছে কৰ্মৰত অধিবক্তা, অৱসৰপ্ৰাপ্ত আমোলা আৰু ন্যায়িক বিষয়া।
মুঠ ২০০০ লোকে বিদেশী ন্যায়াধিকৰণৰ সদস্যপদৰ বাবে আবেদন কৰিছিল।
৩১ আগষ্টত প্ৰকাশিত চূড়ান্ত এন আৰ চিত বাদ পৰা লোকসকলে “নাগৰিকত্ব” দাবী নিষ্পত্তিৰ বাবে ১২০ দিনৰ ভিতৰত ন্যায়াধিকৰণৰ কাষ চাপিব লাগিব।
অসমত ইতিপূৰ্বে ১০০খন বিদেশী ন্যায়াধিকৰণ কাৰ্য্যক্ষম হৈ আছিল।
এন আৰ চিৰ পিছতে ৰাজ্য চৰকাৰে নতুনকৈ ৪০০খন বিদেশী ন্যায়াধিকৰণ স্থাপন কৰাৰ কথা।
বিদেশী ন্যায়াধিকৰণলৈ যাওঁতে এন আৰ চি-বহিৰ্ভূতসকলে তেওঁলোকৰ “দাবী খাৰিজ” হোৱা সম্পৰ্কীয় “প্ৰত্যায়িত প্ৰতিলিপি” লগত নিব লাগিব।
প্ৰকাশিত অসমৰ চূড়ান্ত এন আৰ চিত মুঠ ৩,১১,২১,০০৪ গৰাকী লোকৰ নাম সন্নিৱিষ্ট হৈছে।
দাবী আৰু আপত্তি দাখিল নকৰাসকলকে ধৰি মুঠ ১৯,০৬,৬৫৭ গৰাকী লোকৰ নাম এন আৰ চিৰ পৰা বাদ পৰিছে।
এন আৰ চি নাগৰিকৰ পঞ্জী, বিদেশী ঘোষণাৰ আইনী কাৰবাৰ ইয়াৰ আওতাত নাই।
২০১৭ চনৰ ৩১ ডিচেম্বৰত প্ৰকাশিত এন আৰ চিৰ প্ৰথম খচৰাত ৩.২৯ কোটি আবেদনকাৰীৰ ভিতৰত ১.৯৪ কোটি লোকৰ নাম অন্তৰ্ভুক্ত হৈছিল।
