বিজেপি চৰকাৰ উত্থাপিত বিতৰ্কিত নাগৰিকত্ব বিধেয়ক, ২০১৬ৰ বিৰুদ্ধে দেশৰ ৰাজধানীত ১মটো প্ৰতিবাদৰ সূচনা কৰি দেওবাৰে পুৱাৰ পৰা সংসদৰ ৩ কি.মি. দূৰত্বত অৱস্থান গ্ৰহণ কৰিছে অসমৰ ৭০টা সংগঠনে।
অহা ১১ ডিচেম্বৰৰ পৰা আৰম্ভ হ’বলগীয়া সংসদৰ শীতকালীন অধিৱেশনত বিধেয়কখনৰ বিৰুদ্ধে প্ৰতিবাদ সাব্যস্ত কৰাৰ লগতে বিধেয়কখনে বহন কৰা ক্ষতিশংকা দেশবাসীক “অৱগত” কৰাৰ উদ্দেশ্যে এই অনিৰ্দিষ্টকালীন অনশন ঘোষণা কৰিছে অসমৰ সংগঠনকেইটাই।
প্ৰতিবাদত অসম জাতীয়তাবাদী যুৱ ছাত্ৰ পৰিষদৰ নেতা পলাশ চাংমাইকে ধৰি প্ৰত্যেকটো সংগঠনৰ দুজনকৈ নেতৃত্ব উপস্থিত আছে।
অসমৰ সংগঠনকেইটাৰ প্ৰতিবাদথলীত ১ম দিনাই উপস্থিত হৈ “সহমৰ্মিতা” জ্ঞাপন কৰে স্বৰাজ অভিযান তথা দলৰ নেতা য়’গেন্দ্ৰ য়াদৱে।
“সংবিধানবিৰোধী” এই বিধেয়কৰ বিৰুদ্ধে সমগ্ৰ দেশবাসী আৰু ৰাজনৈতিক দলকে ঐক্যবদ্ধ হ’বলৈ আহ্বান জনাইছে অসমৰ “জাতীয়-জনগোষ্ঠীয়-সংখ্যালঘু” সংগঠনকেইটাই।
“ভাৰতীয় সংবিধানৰ স্বাৰ্থত, ইয়াৰ নৈতিক আৰু আইনী বিশুদ্ধতা ৰক্ষা আৰু অসম আৰু ই্য়াৰ আৱাসীসকলক আন এক দীঘলীয়া সামাজিক আৰু ৰাজনৈতিক অস্থিৰতাৰ পৰা সুৰক্ষিত কৰাৰ বাবে নাগৰিকত্ব বিধেয়কৰ তৎকালীন বাতিলকৰণৰ দাবীত আমি অসমৰ ৭০টা সংগঠনৰ উমৈহতীয়া মঞ্চই আজিৰ পৰা অনশন আৰম্ভ কৰিছো,” নৰ্থ ইষ্ট নাও-ক জনালে উমৈহতীয়া মঞ্চ তথা কৃষক মুক্তি সংগ্ৰাম সমিতিৰ নেতা অখিল গগৈয়ে।
বিধেয়কখন সন্দৰ্ভত শাসনাধীন বিজেপি দলে অসমৰ ৰাইজক “বিপথে” পৰিচালিত কৰিছে বুলিও মন্তব্য কৰিছে গগৈয়ে।
