গুৱাহাটীৰ তৰুণৰাম ফুকন ইনড’ৰ ষ্টেডিয়ামত চলি থকা ৮৩ সংখ্যক ছিনিয়ৰ ৰাষ্ট্ৰীয় বেডমিণ্টন প্ৰতিযোগিতাত দুৰ্দান্ত প্ৰদৰ্শন আগবঢ়াই সকলোৰে দৃষ্টি আকৰ্ষণ কৰা অসমৰ অস্মিতা চলিহাই ইতিহাস সৃষ্টিৰ লক্ষ্যৰে ছেমিত অৱতীৰ্ণ হ’ব।
পদক দখলৰ স্বপ্নৰ দৌৰৰ পৰা মাত্ৰ এটা খোজ দূৰত থকা অস্মিতাই আজি ছেমিত মুখামুখি হ’ব বিশ্বৰ দুই নং স্থানৰ তাৰকা শ্বাটলাৰ তথা ৰিঅ’ অলিম্পিকত ৰূপজয়ী পি ভি সিন্ধুৰ।
উল্লেখযোগ্য যে, প্ৰতিযোগিতাখনত দুয়োজন খেলুৱৈয়ে উজ্জীৱিত প্ৰদৰ্শন দাঙি ধৰি প্ৰতিপক্ষক ধৰাশায়ী কৰিছে। ছেমিফাইনেললৈ অগ্ৰগতিৰ পথত অস্মিতাই কোৱাৰ্টাৰ ফাইনেলত ১৬-২১, ২১-১৭, ২১-১৯ ব্যৱধানত পৰাস্ত কৰে আকৰ্ষি কাশ্যপক।
আনহাতে অলিম্পিক বিজয়ী পি ভি সিন্ধুৱে কোৱাৰ্টাৰ ফাইনেলত ২১-১৬, ২১-৭ ব্যৱধানত পৰাস্ত কৰে ৰিয়া মুখাৰ্জীক।
অসমৰ প্ৰতিভাৱান খেলুৱৈগৰাকীৰ বিৰুদ্ধে স্বাভাবিকতে পি ভি সিন্ধু ফেভাৰিত হিচাপে নামিব যদিও ঘৰুৱা দৰ্শকৰ সমৰ্থন আৰু পৰিবেশৰ সুবিধা গ্ৰহণ কৰি যিকোনো মহূৰ্ততে অঘটন ঘটাই ইতিহাস সৃষ্টি কৰাৰ ক্ষমতা আছে অস্মিতা চলিহাৰ।
ৰাজ্যৰ ক্ৰীড়াপ্ৰেমী সকলে হাই ভল্টেজ খেলখনলৈ অধীৰ আগ্ৰহেৰে অপেক্ষা কৰিছে।
