ৰাজ্যৰ ৩১টা ৰাজহুৱা খণ্ডৰ প্ৰতিষ্ঠানত অসম চৰকাৰে ১০,৯০৩ কোটি টকাৰ বিশাল ধনৰাশি বিনিয়োগ কৰিছে যদিও ইয়াৰ পৰা চৰকাৰে লাভ কৰা প্ৰতিদানৰ পৰিমাণ প্ৰায় শূন্য। চলিত মাহত ৰাজ্যিক বিধানসভাত দাখিল কৰা ভাৰতৰ নিয়ন্ত্ৰক আৰু মহাহিচাপ পৰীক্ষকৰ (CAG) ২০২৪-২৫ বৰ্ষৰ ৰাজ্যিক বিত্তীয় হিচাপ পৰীক্ষাৰ প্ৰতিবেদনত এই গুৰুতৰ তথ্য পোহৰলৈ আহিছে। প্ৰতিবেদন অনুসৰি, ৰাজ্যৰ অৰ্থনীতিৰ দ্ৰুত সম্প্ৰসাৰণ ঘটিছে যদিও চৰকাৰী কোম্পানীসমূহত কৰা বিশাল বিনিয়োগৰ বিপৰীতে নামমাত্ৰ লাভাংশ অৰ্জন হোৱা বিষয়টোৱে ৰাজ্যৰ বিত্তীয় ব্যৱস্থাপনাৰ এক উদ্বেগজনক দিশ উন্মোচন কৰিছে।
প্ৰতিবেদনখনত উল্লেখ কৰা অনুসৰি, ৰাজ্যৰ ২৭টা চৰকাৰী কোম্পানী আৰু ৪টা বিধিবদ্ধ নিগমকে ধৰি মুঠ ৩১টা ৰাজহুৱা খণ্ডৰ প্ৰতিষ্ঠানৰ ভিতৰত কেৱল অসম শক্তি উৎপাদন নিগম লিমিটেডেহে (APGCL) সামান্য লাভ অৰ্জন কৰিবলৈ সক্ষম হৈছে। ২০২৪-২৫ বৰ্ষত এই প্ৰতিষ্ঠানটোৱে মাত্ৰ ১৫ কোটি টকাৰ লাভাংশ ঘৰলৈ আনিছে, যি মুঠ বিনিয়োগ কৰা মূলধনৰ মাত্ৰ ০.১১ শতাংশ। ইয়াৰ বিপৰীতে, ৰাজ্য চৰকাৰে গড়ে ৬.৭৬ শতাংশ সুতৰ হাৰত বজাৰৰ পৰা ঋণ সংগ্ৰহ কৰি আছে। ইয়াৰ অৰ্থ হ’ল চৰকাৰে নিজৰ প্ৰতিষ্ঠানসমূহৰ পৰা যিমান টকা উপাৰ্জন কৰিছে, তাতকৈ বহু বেছি পৰিমাণৰ ধন ঋণৰ সুত পৰিশোধ কৰোতেই ব্যয় কৰিবলগীয়া হৈছে।
ৰাজ্যিক প্ৰতিষ্ঠানসমূহৰ লোকচানৰ পৰিমাণ যথেষ্ট গভীৰ বুলি প্ৰতিবেদনত সৱিশেষ উল্লেখ কৰা হৈছে। ২৭টা চৰকাৰী কোম্পানীৰ ভিতৰত ১৭টাই বৰ্তমান লোকচানত চলি আছে আৰু এই কোম্পানীসমূহৰ এতিয়ালৈকে মুঠ লোকচানৰ পৰিমাণ হৈছে ৫৯২.৩০ কোটি টকা। একেদৰে, চাৰিটা বিধিবদ্ধ নিগমৰ ভিতৰত তিনিটা নিগমেই বৃহৎ লোকচানৰ সন্মুখীন হৈছে, যাৰ সামগ্ৰিক লোকচানৰ পৰিমাণ ১১২.৯০ কোটি টকালৈ বৃদ্ধি পাইছে। চৰকাৰে ঋণ লৈ বিনিয়োগ কৰাৰ পাছতো এই প্ৰতিষ্ঠানসমূহে কোনো ধন ঘূৰাই দিব নোৱাৰাৰ ফলত ৰাজ্যৰ ৰাজকোষৰ ওপৰত ভয়ংকৰ মাধমাৰ পৰিছে।
অসমৰ সামগ্ৰিক অৰ্থনীতিয়ে এক যোগাত্মক দিশত অগ্ৰসৰ হৈছে বুলি দাবী কৰা সময়ত এই নিৰাশাজনক তথ্যই অৰ্থনৈতিক বিকাশৰ প্ৰকৃত ছবিখন উদাঙাই দেখুৱাইছে। ২০২০-২১ বৰ্ষৰ পৰা ২০২৪-২৫ বৰ্ষলৈ অসমৰ মুঠ ৰাজ্যিক ঘৰুৱা উৎপাদন (GSDP) বছৰি গড়ে ১৮ শতাংশ হাৰত বৃদ্ধি পাই ৬,৪৩,৬৬৭ কোটি টকা হৈছেগৈ। একেদৰে মূলধনী ব্যয়ৰ পৰিমাণো ২০২০-২১ বৰ্ষৰ ১২,৩৯৯ কোটি টকাৰ পৰা বৃদ্ধি পাই ২০২৪-২৫ বৰ্ষত ২৬,৪০৪ কোটি টকা হৈছে। কিন্তু কেগৰ প্ৰতিবেদনৰ পৰিসংখ্যাই এক ভিন্ন বাস্তৱ দাঙি ধৰিছে য’ত ৰাজ্যখনে বিনিয়োগৰ বাবে বৃহৎ পৰিমাণৰ ঋণ লৈছে যদিও বিনিয়োগ লাভ কৰা প্ৰতিষ্ঠানসমূহে ঘূৰাই একোৱেই দিয়া নাই।
শেহতীয়া পাঁচ বছৰত ৰাজহ প্ৰাপ্তিৰ বিপৰীতে পেঞ্চনৰ ব্যয় ১৫.৯১ শতাংশৰ পৰা ১৯.৩৭ শতাংশলৈ আৰু সুতৰ ধন পৰিশোধৰ পৰিমাণ ৮.০১ শতাংশৰ পৰা ৯.৭৭ শতাংশলৈ বৃদ্ধি পাইছে। ইয়াৰ ফলত এই প্ৰতিষ্ঠানসমূহৰ বৃহৎ লোকচান পূৰণ কৰিবলৈ চৰকাৰৰ হাতত থকা বিত্তীয় পৰিসৰ ক্ৰমান্বয়ে সংকুচিত হৈ আহিছে। সামগ্ৰিক পৰিস্থিতিৰ প্ৰতি লক্ষ্য ৰাখি বৰ্তমান এই গুৰুত্বপূৰ্ণ প্ৰতিবেদনখন বিতং আলোচনা আৰু উপযুক্ত পৰামৰ্শৰ বাবে সদনৰ লোক হিচাপ সমিতিৰ (Public Accounts Committee) ওচৰলৈ প্ৰেৰণ কৰা হৈছে।
