অসমীয়া ভাষা-সাহিত্যৰ বিকাশ আৰু বিস্তৃতিৰ বাবে অসম সাহিত্য সভাৰ সভাপতি ড০ পৰমানন্দ ৰাজবংশীৰ নেতৃত্বত এটা প্ৰতিনিধি দলে আজি গুৱাহাটীৰ ৰয়েল গ্ল’ৱেল বিশ্ববিদ্যালয়ৰ উপদেষ্টা তথা অসম চৰকাৰৰ শিক্ষা বিভাগৰ উপদেষ্টা ড০ মিহিৰকান্তি চৌধুৰীৰ লগতে বিশ্ববিদ্যালয়ৰ আচাৰ্য্য, উপাচাৰ্য্যকে প্ৰমুখ্য কৰি এটা প্ৰতিনিধিদলৰ দলৰ সৈতে বিভিন্ন দিশত আলোচনাত মিলিত হয়।
আজি অনুষ্ঠিত হোৱা বৈঠকত সভাৰ সভাপতি পৰমানন্দ ৰাজবংশীয়ে ১৯৬০ চনৰ চৰকাৰী ভাষা আইন অনুসৰি সকলো ক্ষেত্ৰতে অসমীয়া ভাষাৰ যথোচিত প্ৰয়োগৰ ক্ষেত্ৰত বিশ্ববিদ্যালয় কৰ্তৃপক্ষক ব্যৱস্থা গ্ৰহণ কৰিবলৈ মুকলি আহ্বান জনায়। অসমত সৰ্বস্তৰতে ১৯৬০ চনৰ চৰকাৰী ভাষা আইন অনুসৰি অসমীয়া ভাষাৰ যথোচিত ব্যৱহাৰ হব’ই লাগিব। তাৰবাবে অসম সাহিত্য সভাই ২০১৯ বৰ্ষক অসমীয়া আৰু খিলঞ্জীয়া মাতৃভাষাৰ সংৰক্ষণ আৰু সংবৰ্ধনৰ সংকল্প বৰ্ষ হিচাপে গ্ৰহণ কৰিছে বুলি উল্লেখ কৰে।
সাহিত্য সভাৰ নেতৃত্বত যোৱা প্ৰতিনিধিৰ দলটোৱে আজি বিশ্ববিদ্যালয় কৰ্তৃপক্ষক এখন চাৰি দফীয়া স্মাৰক-পত্ৰ প্ৰদান কৰি গুৱাহাটীত অসম সাহিত্য সভাই আয়োজন কৰিবলৈ লোৱা আন্ত্ঃৰাষ্ট্ৰীয় যুৱ লেখক সমাৰোহত পূৰ্ণাংগ সহযোগিতা কৰা, সাহিত্য সভাৰ প্ৰস্তাৱিত বড়ো, মিচিং, ৰাভা, কাৰবি, তিৱা, দেউৰী আদি কৰি সকলো খিলঞ্জীয়া ভাষা-সাহিত্যৰ বিকাশ আৰু গৱেষণাৰ বাবে ব্যবস্থা গ্ৰহণ কৰা, সাহিত্য সভাৰ প্ৰস্তাবিত ছমহীয়া অসমীয়া ভাষাৰ ডিপ্লমা পাঠ্যক্ৰম প্ৰকল্পৰ কাম সম্পন্ন কৰা আৰু অসম সাহিত্য সভাৰ ‘সমাৱৰ্তন’ আয়োজনত পূৰ্ণকালীন সহযোগিতা আগ বঢ়াবৰ বাবে আহ্বান জনায়।
অসম সাহিত্য সভাৰ সৈতে আলোচনাৰ অন্তত বিশ্ববিদ্যালয় কৰ্তৃপক্ষই সামূহিকভাবে সাহিত্যসভাৰ সকলো প্ৰস্তাৱ কাৰ্য্যকৰী কৰা হ’ব বুলি আশ্বাস প্ৰদান কৰে।
আজিৰ আলোচনাত সাহিত্য সভাৰ হৈ কৰ্ণধাৰ সমিতিৰ সদস্য ড০ বলেন্দ্ৰ কুমাৰ দাস, প্ৰাক্তন ভাৰপ্ৰাপ্ত প্ৰধান সম্পাদক অৱনীমোহন চহৰীয়া, প্ৰচাৰ আহ্বায়ক প্ৰফুল্ল বৰ্মন উপস্থিত থাকে।
আনহাতে, বিশ্ববিদ্যালয়ৰ হৈ ড০ মিহিৰকান্তি চৌধুৰীৰ লগতে অশোক কুমাৰ পানছাৰী, ড০ এছ পি সিং, অংকুৰ পানছাৰী, গুৱাহাটী বিশ্ববিদ্যালয়ৰ প্ৰাক্তন উপাচাৰ্য ড০ অখিল কুমাৰ মেধি, ডিব্ৰুগড় বিশ্ববিদ্যালয়ৰ প্ৰাক্তন উপাচাৰ্য ড০ অলক কুমাৰ বুঢ়াগোহাই, তেজপুৰ বিশ্ববিদ্যালয়ৰ প্ৰাক্তন অধ্যাপক ড০ প্ৰদীপজ্যোতি মহন্ত আদিকে ধৰি ভালেকেইগৰাকী বিশিষ্ট ব্যক্তি উপস্থিত থাকে।
