জয়পুৰ, লছ এঞ্জেলছ, দিল্লী, মুম্বাই— ক’ত হোৱা নাই অসম পৰ্য্যটনৰ বহু কোটি টকীয়া এম্বেছেদৰ প্ৰিয়ংকাৰ বিয়াৰ পাৰ্টি!
আমি নাজানো বিয়াৰ পিছত যোৱা দুসপ্তাহ ধৰি খণ্ড খণ্ডকৈ চলি থকা অভ্যৰ্থনাত ভাগ লোৱাৰ সৌভাগ্য অসমৰ কেইজনৰ হৈছে। হাজাৰ হ’লেও অসমৰ ব্ৰেন্দ এম্বেছেদৰৰ বিয়া!
ভাৰতৰ প্ৰধান মন্ত্ৰী নৰেন্দ্ৰ মোদীৰ পৰা বলিউদ-হলিউদৰ অভিনেতা, অভিনেত্ৰীলৈকে বহু বিশ্বখ্যাত লোকৰ সমাগম ঘটা এই ৰাজকীয় বিবাহ প্ৰিয়ংকাৰ বাবে আছিল অসমৰ সামান্য হ’লেও পৰিচয় তুলি ধৰাৰ এক সুৱৰ্ণ সুযোগ। আৰু অসমক পৰিচিত কৰি তোলাৰে দায়িত্ব লৈছে তেওঁ।
A heartfelt thank you to our Hon'ble Prime Minister Shri @narendramodi ji for gracing us with your presence. Touched by your kind words and blessings. @nickjonas pic.twitter.com/ktGguBra0N
— PRIYANKA (@priyankachopra) December 5, 2018
অসমৰ বহু লোকেও আশা কৰিছিল অসমক awesome বোলা প্ৰিয়ংকাই পিন্ধিব নেকি অসমৰ পাট! বিদেশী দিজাইনাৰে নিজ হাতে বনোৱা ৱে’দিং গাউন পিন্ধিলে প্ৰিয়ংকাই, পিন্ধিলে ভাৰতীয় লেহেংগাও; মাথো “বিশ্ব দৰবাৰ”ৰ বাবে অনুপযুক্ত বিবেচিত হ’ল অসমৰ সাজ।
“বিশ্ব দৰবাৰ” অসমবাসীৰ চিৰক’লীয়া হেঁপাহৰ। দুখীয়া অসমৰ বহু কোটি টকা ৰাজহুৱা ধনেৰে, চৰকাৰৰ দাবী অনুসৰি, সেইবাবেই প্ৰিয়ংকাক পতা হৈছে এম্বেছেদৰ।
নাই, এই বিশাল ৰাজকীয় পৰিক্ৰমাত অসমলৈ মনত নপৰিল প্ৰিয়ংকাৰ। “Forever stays with you” হৈ নাথাকিল Assam (।)
১৬ অক্তোবৰত অসম পৰ্য্যটনৰ হৈ শেষবাৰলৈ এটা টুইট কৰিছিল চ’চিয়েল মিডিয়াত অতি সক্ৰিয় প্ৰিয়ংকাই। আৰু সেই দিনটো আছিল অসম পৰ্য্যটনৰ প্ৰচাৰ ভিডিঅ’ মুকলি হোৱাৰ।
Thank you Assam for your generosity and hospitality! Once you visit Assam it stays with you forever… #AwesomeAssam https://t.co/4H89CyvAWN
— PRIYANKA (@priyankachopra) October 17, 2018
প্ৰিয়ংকাৰ বিবাহে অন্ততঃ এটা কথা স্পষ্ট কৰিছে “বিশ্ব দৰবাৰ”ৰ যোগাৰ কৰিব লাগিব অসমৰ মানুহে নিজেই।
প্ৰিয়ংকাৰ বিবাহৰ চলি থকা অভ্যৰ্থনাৰ শেহতীয়া এখণ্ডত সৌভাগ্যক্ৰমে আমন্ত্ৰণ পালে অসমৰ জনপ্ৰিয় গায়ক অংগৰাগ মহন্তই।
অসমৰ বুলিবলৈ অন্ততঃ পাপনলৈকে যে মনত পৰিল কোটিটকীয়া এম্বেছেদৰ প্ৰিয়ংকাৰ!