জুবিন গাৰ্গৰ মৃত্যুৰ ন্যায়ৰ দাবীৰ সমান্তৰাল কৈ ৰাজ্যত ভূমি অধিকাৰ দাবীত ১২ অক্টোবৰত চচলত সফলতাৰে অধিকাৰ সমাৱেশ অনুষ্ঠিত হৈ যায়। ইয়াৰ পিছতে আজি অনুসূচিত জনজাতি (এছ টি)ৰ মৰ্যাদা, দৈনিক মজুৰি বৃদ্ধি আৰু ভূমি অধিকাৰৰ দাবীত ডিব্ৰুগড়ত হাজাৰ হাজাৰ চাহ জনজাতি আৰু আদিবাসী শ্ৰমিক একত্ৰিত হৈ বৃহৎ প্ৰতিবাদী সমদল উলিয়াই।
অসম চাহ মজদুৰ সংঘ (এচিএমএছ), অসম চাহ জনজাতি ছাত্ৰ সন্থা (এটিএসএ), সদৌ আদিবাসী ছাত্ৰ সন্থা অসম (আছা), ৩৬ জনজাতি পৰিষদ আৰু চাহ জনগোষ্ঠীয় জাতীয় মহাসভাৰ উদ্যোগত অনুষ্ঠিত হোৱা প্ৰতিবাদী সমদলৰ ফলত ২১৮খন চাহ বাগিচা, ২৪ হাজাৰ ক্ষুদ্ৰ খেতিয়কৰ বাগিচা আৰু ৭০টা কাৰখানাৰ কাম স্তব্ধ হৈ পৰে।
আটাছাৰ সভাপতি ধীৰাজ গোৱালাই প্ৰতিবাদকাৰী ৰাইজক সম্বোধন কৰি কয় যে “আমি অসমৰ অন্যতম বৃহৎ জনগোষ্ঠী, কিন্তু আটাইতকৈ বঞ্চিত। বিজেপিয়ে আমাৰ ভোট ব্যৱহাৰ কৰে, কিন্তু আমাৰ অধিকাৰক আওকাণ কৰে।” তেওঁ শ্ৰমিকসকল ভূমিহীন হৈ থকাৰ সময়ত বিজেপিৰ দলীয় কাৰ্যালয় আৰু আদানি আম্বানিৰ প্ৰকল্পৰ বাবে ভূমি আবন্তন কৰাৰ বিৰুদ্ধে তীব্ৰ সমালোচনা কৰে।
এচিএমএছ ডিব্ৰুগড়ৰ সম্পাদক নবীন চন্দ্ৰ কেওটে কয়, “স্বাধীনতাৰ ৭৮ বছৰৰ পাছতো আমি দৰিদ্ৰতাৰ সন্মুখীন হৈ আহিছো। আমাৰ দাবীসমূহ, এছ টিৰ মর্যাদা, দৈনিক ৫৫১ টকা নূন্যতম মজুৰি আৰু ভূমি অধিকাৰ বিষয়ে আলোচনা কৰিবলৈ চৰকাৰৰ সময় নহয় বুলি ক্ষোভ প্ৰকাশ কৰে
উল্লেখ্য যে সংগঠনসমূহে দাবীসমূহ সজোৰে উত্থাপন কৰিবলৈ অসমৰ প্ৰতিখন জিলাত একেধৰণৰ সমদল উলিওৱাৰ পৰিকল্পনা কৰিছে বুলি জানিব লৈ দিয়ে। আৰু বিজেপিৰ প্ৰতিশ্ৰুতি সত্ত্বেও মৰাণ, মটক, চুতীয়া, টাই-আহোম, কোচ-ৰাজবংশী, চাহ জনজাতি আদি সম্প্ৰদায়ক এতিয়াও এছটি মর্যাদা প্ৰদান কৰা নাই গতিকে ৰাজ্য জুৰি এই আন্দোলন অধিক তীব্ৰতৰ হোৱাৰ সম্ভাৱনা প্ৰৱল।
