ভূমি অধিকাৰ, মজুৰি বৃদ্ধি আৰু জনজাতিকৰণৰ দাবীত ক্ষোভ অব্যাহত আছে চাহ শ্ৰমিকসকলৰ। অসমৰ চাহ জনগোষ্ঠীৰ প্ৰতিনিধিত্বকাৰী সংগঠনসমূহে এই তিনিটা মূল সমস্যা সমাধানৰ বাবে দীৰ্ঘদিন ধৰি দাবী জনাই আহিছে। কিন্তু চৰকাৰে এই বিষয়ত আগ্ৰহ নেদেখুওৱাত শ্ৰমিক সমাজৰ মাজত ক্ষোভ তীব্ৰতৰ হৈ উঠিছে। দেওবাৰে যোৰহাট জিলা চাহ মজদুৰ সংঘৰ শাখা কাৰ্যালয়ত যোৰহাট, গোলাঘাট আৰু তিতাবৰ শাখাৰ বিষয়ববীয়াসকলে এক সংবাদমেলৰ জৰিয়তে ক্ষোভ প্ৰকাশ কৰি চৰকাৰক প্ৰতিবাদ তীব্ৰতৰ কৰি তোলা হ’ব বুলি হুংকাৰ দিয়ে।
সংবাদমেলত সংগঠনৰ এগৰাকী বিষয়ববীয়াই কয় যে, “জনজাতিকৰণ, ভূমি পট্টা আৰু মজুৰি বৃদ্ধিৰ দাবীত আমি যোৰহাটত এক বিশাল গণসমাৱেশৰ পৰিকল্পনা কৰিছিলোঁ। কিন্তু ১৯ অক্টোবৰত আটছাৰ কেন্দ্ৰীয় অধিৱেশনত মুখ্যমন্ত্ৰী ড° হিমন্ত বিশ্ব শৰ্মাই ভূমি অধিকাৰ আৰু জনজাতিকৰণৰ বিষয়ত ২৫ নৱেম্বৰত বিধানসভা অধিৱেশনত আইন প্ৰণয়ন আৰু আলোচনাৰ প্ৰতিশ্ৰুতি দিয়াৰ বাবে আমি সাময়িকভাৱে এই গণসমাৱেশ স্থগিত ৰাখিছোঁ।” তেওঁ স্পষ্টভাৱে কয় যে, যদি ২৫ নৱেম্বৰৰ ভিতৰত এই প্ৰতিশ্ৰুতি পূৰণ নহয়, তেন্তে চাহ মজদুৰ সংঘই পুনৰ ৰাজপথত নামিব।
সংঘৰ বিষয়ববীয়াসকলে ক্ষোভৰ সৈতে উল্লেখ কৰে যে বৰ্তমান চাহ শ্ৰমিকসকলে দৈনিক ২৫০ টকাৰ নিম্ন মজুৰিত বাগানত কাম কৰিবলগীয়া হৈছে। “ভূমি অধিকাৰ, মজুৰি বৃদ্ধি আৰু জনজাতিকৰণৰ দাবীত শ্ৰমিকসকলৰ মাজত তীব্ৰ অসন্তোষ বিৰাজ কৰিছে। ২৫ নৱেম্বৰৰ ভিতৰত এই সমস্যা সমাধান নহ’লে ক্ষোভৰ বৰ্হিঃপ্ৰকাশ অৱশ্যম্ভাৱী বুলি মত প্ৰকশ কৰিছে।
বিগত দিনত বিধানসভাত চাহ জনগোষ্ঠীৰ প্ৰতিনিধিত্ব হ্ৰাসৰ বিষয়তো সংঘই মুখ্যমন্ত্ৰীৰ সৈতে আলোচনা কৰিছিল। মুখ্যমন্ত্ৰীয়ে ২০২৬ৰ বিধানসভা নিৰ্বাচনত চাহ জনগোষ্ঠীৰ প্ৰতিনিধিৰ সংখ্যা বৃদ্ধিৰো প্ৰতিশ্ৰুতি দিয়াৰ কথা সংঘই উল্লেখ কৰিছে।
চাহ শ্ৰমিকসকলক লৈ চৰকাৰৰ উদাসীনতা অব্যাহত থাকিলে এই আন্দোলন অসমৰ ৰাজনৈতিক আৰু অৰ্থনৈতিক পৰিস্থিতিত গুৰুত্বপূৰ্ণ প্ৰভাৱ পেলাব পাৰে। সংঘৰ বিষয়ববীয়াসকলে সকলো চাহ শ্ৰমিকৰ ন্যায়ৰ স্বাৰ্থত ঐক্যবদ্ধভাৱে আন্দোলন গঢ়িতোলাৰ হুংকাৰ দিছে।
