মফিদুল হুছেইন নামৰ গোৱালপাৰাৰ এজন কলেজীয়া ছাত্ৰ “ৰাষ্ট্ৰদ্ৰোহ”ৰ অভিযোগত দেওবাৰে জে’লত সোমাইছে।
ধূপধৰাৰ বিকালী কলেজৰ বি এ প্ৰথম ছিমেষ্টাৰৰ ছাত্ৰজনে “ফে’চবুকত পাকিস্তানী আৰ্মিৰ সমৰ্থনত ছবি আৰু ভাৰতবিৰোধী” প’ষ্ট কৰিছিল।
শনিবাৰে ৰাতি আৰক্ষীয়ে আটক কৰা ছাত্ৰজনক গোৱালপাৰা জিলা আদালতে জে’ললৈ প্ৰেৰণ কৰিছে।
“তেওঁক যোৱা ৰাতি উঠাই অনা হৈছিল আৰু জেৰাৰ পিছত ৰাতিপুৱা গ্ৰেপ্তাৰ কৰা হয়,” গোৱালপাৰাৰ আৰক্ষী অধীক্ষক সুশান্ত বিশ্ব শৰ্মাই নৰ্থইষ্ট নাওক জনায়।
ছাত্ৰজনৰ প’ষ্টটো আছিল যোৱা ৮ এপ্ৰিলৰ, কিন্তু চূড়ান্ত এন আৰ চি প্ৰকাশৰ দিনাহে কোনো লোকে সেয়া আৰক্ষীৰ দৃষ্টিগোচৰ কৰে।
হুছেইনৰ ওপৰত ভাৰতীয় দণ্ড বিধিৰ দুটা কঠোৰ ধাৰাত গোচৰ (নং ১৩৩/১৯) ৰুজু কৰা হৈছে।
“ভাৰতীয় দণ্ড বিধিৰ ১২৪এ আৰু ১২১ ধাৰাৰ অধীনত আমি এটা গোচৰ ৰুজু কৰিছো,” জনায় ধূপধৰা আৰক্ষী থানাৰ ভাৰপ্ৰাপ্ত বিষয়া নীলকমল সূত্ৰধৰে।
“ৰাষ্ট্ৰদ্ৰোহ”ৰ ধাৰা ১২৪এৰ অধীনত সৰ্বোচ্চ যাৱজ্জীৱন কাৰাৱাস পৰ্য্যন্ত হ’ব পাৰে।
বিপৰীতে ভাৰত চৰকাৰৰ বিৰুদ্ধে যুদ্ধ বা যুদ্ধৰ চেষ্টা বা যুদ্ধত উচতনিৰ ক্ষেত্ৰত প্ৰযোজ্য ১২১ ধাৰাত অভিযোগ প্ৰমাণ হ’লে সৰ্বাধিক মৃত্যুদণ্ড বা যাৱজ্জীৱন কাৰাৱাস পৰ্য্যন্ত শাস্তি হ’ব পাৰে।
আৰক্ষীৰ মতে, হুছেইন আমবাৰী গাঁৱৰ কৃষক পৰিয়ালৰ সন্তান। তেওঁৰ পৰিয়ালৰ বাকী সদস্যসকলকো আটক কৰা হৈছিল, কিন্তু পিছত যাবলৈ দিয়া হয়।
“পৰিয়ালটো খেতিয়ক পৰিয়াল আৰু বাকী সদস্যসকলে এন্দ্ৰইদ ম’বাইল ফ’নৰ ব্যৱহাৰ সম্পৰ্কে প্ৰায় অজ্ঞ। আমি তেওঁলোকক যাবলৈ দিলো,” আৰক্ষী বিষয়া সূত্ৰধৰে জনায়।
