অসমত এন আৰ চিৰ চূড়ান্ত খচৰা প্ৰকাশৰ পাছতেই চুবুৰীয়া ৰাজ্য আৰুণাচল প্ৰদেশত অৰুণাচল প্ৰদেশ ছাত্ৰ সন্থাই ৰাজ্যখনত আবৈধভাৱে প্ৰৱেশ কৰা লোকসকলক বিতাড়নৰ যি অভিযান চলাইছে, সেই অভিযানক লৈ প্ৰতিক্ৰিয়া অসমৰ প্ৰাক্তন মুখ্যমন্ত্ৰী তৰুণ গগৈয়ে।
সোমবাৰে সাংবাদিকৰ আগত গগৈয়ে অৰুণাচল প্ৰদেশত চলা এই ‘অপাৰেইশ্যন ক্লীন ড্ৰাইভ’ নামৰ অভিযান সম্পৰ্কত কয়, “অৰুণাচল প্ৰদেশত ‘ইনাৰ লাইন পাৰ্মিট’ ব্যৱস্থা আছে। তেনেস্থলত ৰাজ্যখনত অবৈধভাৱে মানুহ কেনেকৈ সোমাবলৈ পালে? অসম বা মেঘালয় আদি ৰাজ্যৰ কথা বেলেগ, ইয়াত ‘ইনাৰ লাইন পাৰ্মিট’ ব্যৱস্থা নাই। কিন্তু এই ব্যৱস্থা থকাৰ পাছত অবৈধভাৱে ময়ো সোমাবলৈ নিদিওঁ।”
তেওঁ লগতে ভাৰতীয় নাগৰিকক হাৰাশাস্তি কৰাটো উচিত হোৱা নাই বুলি মন্তব্য কৰে যদিও অৰুণাচল প্ৰদেশলৈ যাবলৈ হ’লে ‘ইনাৰ লাইন পাৰ্মিট’ লাগিবই আৰু এইটো সকলো ভাৰতীয় নাগৰিকৰ বাবেই প্ৰযোজ্য বুলি কয়।
কিন্তু ‘ইনাৰ লাইন পাৰ্মিট’ লৈ কোনো বিদেশী নাগৰিক অৰুণাচল প্ৰদেশত যদি প্ৰৱেশ কৰিছে তাৰ বাবে ইয়াৰ দায়িত্বত থকা বিষয়াসকল দায়ী হ’ব বুলি মন্তব্য কৰে গগৈয়ে।
“যদি সঁচাকৈয়ে তেওঁ অবৈধ অনুপ্ৰবেশকাৰী আৰু তেওঁ ‘ইনাৰ লাইন পাৰ্মিট’ লৈ ৰাজ্যখনত প্ৰৱেশ কৰিছে তেতিয়াহ’লে ইয়াৰ তদন্ত হ’ব লাগে”, তৰুণ গগৈয়ে কয়।
