হৃদৰোগত আক্ৰান্ত হৈ মৃত্যুক সাৱটিলে অসম চৰকাৰৰ আভ্যন্তৰীণ জল পৰিবহন বিভাগৰ প্ৰাক্তন সঞ্চালক অমল দত্ত লহকৰে।
গুৱাহাটীৰ ৰিহাবাৰী নিবাসী লহকৰৰ বৃহস্পতিবাৰে পুৱা মৃত্যু ঘটে।
মৃত্যুৰ সময়ত তেওঁৰ বয়স হৈছিল ৮৩ বছৰ। প্ৰয়াত লহকৰে পত্নী আৰু কন্যাক ইহ সংসাৰত এৰি থৈ গৈছে।
কলকাতাৰ মেৰিন ইঞ্জিনিয়াৰিং কলেজৰ পৰা অভিযন্তাৰ পাঠ্যক্ৰম সমাপ্ত কৰি অমল দত্ত লহকৰে মাৰ্চেণ্ট নেভীত যোগদান কৰিছিল।
পৰৱৰ্তী সময়ত তেওঁ অসম চৰকাৰৰ আভ্যন্তৰীণ জল পৰিবহন বিভাগত যোগ দিছিল আৰু বিভাগটোৰ সঞ্চালক পদলৈ উন্নীত হৈছিল।প্ৰয়াত দত্ত লহকৰ এগৰাকী ভাল খেলুৱৈয়ো আছিল।
তেওঁ গুৱাহাটীৰ ইণ্ডিয়া ক্লাৱত নিয়মীয়াকৈ টেনিছ খেলাৰ লগতে মাজে সময়ে গল্ফো খেলিছিল।
প্ৰয়াত অমল দত্ত লহকৰে দুবছৰ ধৰি ইণ্ডিয়া ক্লাবৰ সভাপতি পদো অলংকৃত কৰিছিল।
দত্ত লহকৰৰ মৃত্যুৰ বাতৰি পোৱাৰ পিছতে ইণ্ডিয়া ক্লাবৰ সদস্যসকল শোকত ম্ৰিয়মান হৈ পৰে ।ক্লাবটোৰ সদস্যসকলে প্ৰয়াত দত্ত লহকৰৰ আত্মাৰ সদগতি কামনা কৰি ক্লাব প্ৰাংগনত প্ৰাৰ্থনা জনোৱাৰ লগতে শোক সন্তপ্ত পৰিয়ালবৰ্গলৈ সমবেদনা জ্ঞাপন কৰে।
গুৱাহাটীৰ নৱগ্ৰহ শ্মশানত কালি অমল দত্ত লহকৰৰ নশ্বৰ দেহ সৎকাৰ কৰা হয়।প্ৰাক্তন বিষয়াগৰাকীৰ মৃত্যুত তেওঁৰ শুভাকাংক্ষীৰ লগতে গুণমুগ্ধসকলে গভীৰ শোক প্ৰকাশ কৰিছে।
