টৰণ্টো আন্তঃৰাষ্ট্ৰীয় মহিলা চলচ্চিত্ৰ মহোৎসৱ ২০২২ত জিলিকিল অসমৰ এগৰাকী নৱম শ্ৰেণীৰ ছাত্ৰী। উক্ত চলচ্চিত্ৰ মহোৎসৱত নয়নমণি মুৰাক শ্ৰেষ্ঠ যুৱ শিল্পীৰ বঁটা প্ৰদান কৰা হৈছে।
নগাঁও জিলাৰ ধন্টুলা চাহ বাগিচাৰ বাসিন্দা নয়নমণি। তেওঁ আকাংক্ষা ভাগৱতীৰ চুটি ছবি “কুমু – এটা ডেউকা বিহীন চৰাইৰ গান”ত কৰা অভিনয়ৰ বাবে বঁটা লাভ কৰিছে।
চলচ্চিত্ৰখনৰ পৰিচালক আকাংক্ষা ভাগৱতীয়ে কানাডাৰ আয়োজকসকলৰ পৰা এই বিষয়ে বাৰ্তা পোৱাৰৈ পিছতে ‘নৰ্থ ইষ্ট নাও’ৰ জৰিয়তে ৰাজ্যবাসীক এই সুখবৰটো জনাইছে।
পৰিচালক আকাংক্ষা ভাগৱতীয়ে কয়, “মই এটা মেইল পাইছো। য’ত নিশ্চিত কৰা হৈছে যে নয়নমণিক ‘কুমু’ত কৰা মুখ্য চৰিত্ৰৰ অভিনয়ৰ বাবে যুৱ শ্ৰেণীৰ শ্ৰেষ্ঠ অভিনেত্ৰী হিচাপে বাচনি কৰা হৈছে।” এই খবৰ লাভ কৰাৰ পিছতে স্বাভাৱিকতে উৎফুল্লিত হৈ পৰিছে নয়নমণি।
‘নৰ্থ ইষ্ট নাও’ৰ আগত নয়নমণিয়ে কয়—” এই খবৰটো মোৰ বাবে যথেষ্ট অবিশ্বাস্য আছিল। প্ৰথমে যেতিয়া মোক চৰিত্ৰটোৰ বাবে যোগাযোগ কৰা হৈছিল, মই অভিনয়ৰ কোনো আগতীয়া অভিজ্ঞতা নোহোৱাকৈ কেনেদৰে অভিনয় কৰিম তাকে লৈ যথেষ্ট চিন্তিত হৈছিলো। কিন্তু আজি মই সঁচাকৈয়ে সুখী যে মই সেয়া কৰিব পাৰিছো”।
‘কুমু’ চুটি ছবিখন অসমৰ সেউজীয়া চাহ বাগিচাক উপজীৱ্য কৰি নিৰ্মাণ কৰা হৈছে। ছবি খনত এগৰাকী ১২ বছৰীয়া আদিবাসী ছোৱালীৰ জীৱন সংগ্ৰামক ফুটাই তোলা হৈছে। এই চৰিত্ৰটোতে অভিনয় কৰিছে নয়নমণি মুৰাই।
‘কুমু’ ছবিখনৰ জৰিয়তে অসমৰ চাহ বাগিচাত বাস কৰা আদিবাসী শিশুসকল কেনেদৰে বঞ্চিত হৈ ৰৈছে,তেওঁলোক কিদৰে শৈশৱৰ সুখ আৰু আশা, সৌন্দৰ্য আৰু পিতৃ-মাতৃৰ যত্নৰ পৰা বঞ্চিত হৈছে সেয়া দেখুওৱা হৈছে।
স্মৰ্তব্য যে কেৰালাত ফেডাৰেচন অৱ ফিল্ম চ’চাইটিজ অৱ ইণ্ডিয়া – কেৰালামৰ দ্বাৰা আয়োজিত চিজিএনএছ চলচ্চিত্ৰ মহোৎসৱৰ ১৫ তম সংস্কৰণত ‘কুমু’ক শ্ৰেষ্ঠ চুটি ফিচাৰ চলচ্চিত্ৰৰ বঁটা প্ৰদান কৰা হৈছিল৷
ছবি খনত সুৰজ দুৱৰাই কালাৰ গ্ৰেডিং, চিনেমাটোগ্ৰাফী চিদা বৰা, শব্দ সংযোজন দেৱজিত গায়ন, সম্পাদনা হীৰক জ্যোতি পাঠকে কৰাৰ লগতে সংগীত পৰিচালনা কৰিছে ৰাষ্ট্ৰীয় বঁটা বিজয়ী প্ৰখ্যাত শিল্পী তৰালী শৰ্মাই।
চলচ্চিত্ৰখনৰ গীতৰ কথা আকাংক্ষাৰ মাতৃ জাহ্নৱী ভাগৱতীৰ ।