উত্তৰ প্ৰদেশ, পঞ্জাৱ, উত্তৰাখণ্ড, মণিপুৰ আৰু গোৱা। আগন্তুক বৰ্ষৰ আৰম্ভণিতে এই পাঁচখন ৰাজ্যৰ বিধানসভা নিৰ্বাচন অনুষ্ঠিত হোৱাৰ কথা আছিল। কিন্তু নিৰ্বাচন আয়োগে এই ভোটগ্ৰহণ প্ৰক্ৰিয়া কিছু সময় আগুৱাই আনিব পাৰে বুলি বিশেষ সূত্ৰৰ পৰা জানিব পৰা গৈছে। আনকি নিৰ্বাচন আগুৱাই অহাৰ সম্ভাৱনাৰ কথা চিন্তা কৰিয়েই বিজেপিয়ে নিজৰ প্ৰস্তুতিও জোৰদাৰ কৰি তুলিছে।
সাধাৰণতে এই পাঁচখন ৰাজ্যৰ নিৰ্বাচন অহা বছৰৰ ফেব্ৰুৱাৰী মাহত অনুষ্ঠিত হোৱাৰ কথা আছিল। কাৰণ মাৰ্চ মাহত এই ৰাজ্যসমূহৰ বিধানসভাৰ কাৰ্যকাল শেষ হ’ব। নিয়ম অনুসৰি কাৰ্যকাল শেষ হোৱাৰ পূৰ্বেই নিৰ্বাচন অনুষ্ঠিত কৰিব লাগে। সাধাৰণতে এই ভোটগ্ৰহণ ফেব্ৰুৱাৰী মাহতে হয় যদিও এইবাৰ নিৰ্বাচন আয়োগে কেইসপ্তাহমান পূৰ্বেই নিৰ্বাচন অনুষ্ঠিত কৰাৰ কথা চিন্তা-চৰ্চা কৰিছে।
প্ৰকৃততে সেই সময়ছোৱাত এই ৰাজ্যসমূহত ব্যাপক হাৰত দেশৰ লোকপিয়ল অৰ্থাৎ জনসংখ্যা গণনাৰ কাম চলিব। সমস্যাটো হ’ল যিসকল চৰকাৰী কৰ্মচাৰীয়ে লোকপিয়লৰ কাম কৰে, তেওঁলোকেই নিৰ্বাচনৰ কামো কৰিব লগা হয়। গতিকে একেটা সময়তে দুয়োটা কাম হ’লে কৰ্মীৰ তীব্ৰ নাটনি হোৱাৰ সম্ভাৱনা আছে। নিৰ্বাচন আয়োগৰ সূত্ৰ অনুসৰি এই সন্দৰ্ভত প্ৰাৰম্ভিক পৰ্যায়ৰ আলোচনা চলিছে যদিও কোনো চৰকাৰী প্ৰস্তাৱ বা আনুষ্ঠানিক আলোচনা এতিয়ালৈকে আৰম্ভ হোৱা নাই। কিন্তু আয়োগৰ এই চিন্তাৰ খবৰ ইতিমধ্যে শাসকীয় দলটোৱে লাভ কৰিছে আৰু সেইবাবেই তেওঁলোকে নিৰ্বাচনৰ প্ৰস্তুতি আৰম্ভ কৰি দিছে। বিজেপিৰ সভাপতি নীতিন নবীনে ইতিমধ্যে ৰাজ্যিক গোটসমূহক নিৰ্বাচনী প্ৰস্তুতি চূড়ান্ত কৰিবলৈ নিৰ্দেশ দিছে। খবৰ অনুসৰি ডিচেম্বৰৰ শেষৰ ফালে বা জানুৱাৰী মাহৰ আৰম্ভণিতেই এই পাঁচখন ৰাজ্যৰ নিৰ্বাচন ঘোষণা হ’ব পাৰে।
এই পাঁচখন ৰাজ্যৰ ভিতৰত উত্তৰাখণ্ড, গোৱা আৰু উত্তৰ প্ৰদেশত বিগত দহ বছৰ ধৰি বিজেপি ক্ষমতাত আছে। মণিপুৰতো বিজেপিৰ চৰকাৰ আছে, যদিও শেহতীয়াকৈ হোৱা জাতিগত হিংসাৰ বাবে তাত কিছু দিনৰ বাবে ৰাষ্ট্ৰপতি শাসন জাৰি কৰা হৈছিল। আনহাতে পঞ্জাৱত বৰ্তমান আম আদমি পাৰ্টীৰ চৰকাৰ চলি আছে। উত্তৰ প্ৰদেশৰ বাহিৰে বাকী চাৰিখন ৰাজ্যতে শাসকীয় দলৰ মূল প্ৰতিদ্বন্দ্বী হৈছে কংগ্ৰেছ দল। গতিকে সকলোৰে চকু এতিয়া এই পাঁচখন ৰাজ্যৰ আগন্তুক ৰাজনৈতিক ফলাফলৰ ওপৰত নিবদ্ধ হৈ পৰিছে।
