লকডাউনৰ সুবিধা লৈ টীয়কত এচাম অবৈধ সুৰা ব্যৱসায়ীয়ে অবাধ হাৰত গাঁৱে ভূঁইয়ে দেশীয় মদৰ লগতে চুলাইৰ ব্যৱসায় চলাই থকাৰ অভিযোগ আনিছে টীয়ক আঞ্চলিক ছাত্ৰ সন্থাই।
সমগ্ৰ বিষয়টোৰ ক্ষেত্ৰত তৎকালিনভাৱে ব্যৱস্থা গ্ৰহণৰ বাবে তেওঁলোকে আজি যোৰহাট জিলাৰ উপায়ুক্তৰ জৰিয়তে মুখ্য মন্ত্ৰী সৰ্বানন্দ সোণোৱাল, আৰক্ষী সঞ্চালকপ্ৰধান আৰু আৰক্ষী অধীক্ষকলৈ এখন স্মাৰকপত্ৰ প্ৰেৰণ কৰে।
বৃহত্তৰ টীয়ক অঞ্চলত চলি থকা অবৈধ সুৰা, চুলাই ভাটি, ভাং তথা জুৱাৰ আড্ডা উচ্ছেদ কৰিবলৈ যোৱা ৭ এপ্ৰিলতে টীয়ক আঞ্চলিক ছাত্ৰ সন্থাই দাবী জনাইছিল যদিও সেইক্ষেত্ৰত প্ৰশাসনে কোনা গুৰুত্ব দিয়া নাই বুলি তেওঁলোকে অভিযোগ তোলে।
তেওঁলোকৰ অভিযোগ, টীয়ক আৰক্ষী থানাৰ নিচেই কাষৰ অঞ্চল, হাঁহচৰাৰ বিভিন্ন অঞ্চল, বাদুলিপুখুৰীৰ বিভিন্ন অঞ্চলত এচাম অসাধু ব্যৱসায়ীয়ে বৃহৎ কমিছনৰ অংকত চলাই গৈছে অবৈধ ব্যৱসায়।
শীঘ্ৰে এই ছিণ্ডিকেট চক্ৰক উৎখাত কৰিবলৈ জিলা প্ৰশাসনক দাবী জনাই আছুয়ে কয় যে ইয়াৰ অন্যথা ৰাইজৰ সহযোগত তেওঁলোকৰ আন্দোলনৰ পথ গ্ৰহণ কৰিবলৈ বাধ্য হ’ব।
বাৰম্বাৰ এইসমূহ অবৈধ ব্যৱসায় উচ্ছেদ কৰিবলৈ দাবী জনোৱাৰ পাছতো আজি পৰ্যন্ত প্ৰশাসনে কোনো ব্যৱস্থা গ্ৰহণ নকৰাটোৱে প্ৰশাসনৰ প্ৰত্যক্ষ সহযোগত ছিণ্ডিকেট চলি থকা বুলি তেওঁলোকে কয়।
যোৰহাট জিলা ছাত্ৰ সন্থাৰ সাধাৰণ সম্পাদক জিতু নেওগে কয় যে আৰক্ষীয়ে এই ব্যৱসায় বন্ধ নকৰিলে ছাত্ৰ সন্থাই নিজাববীয়াকৈ ব্যৱস্থা গ্ৰহণ কৰিবলৈ বাধ্য হ’ব।
