দক্ষিণ স্পেইনৰ আন্দালুছিয়া অঞ্চলত দুখন তীব্ৰবেগী ৰে’লৰ সংঘৰ্ষত কমেও ২১ জন লোকৰ মৃত্যু হয়। আহতৰ সংখ্যাই ১০০ জন অতিক্ৰম কৰিছে। সমগ্ৰ দেশখনৰ লগতে স্পেইনৰ প্ৰধানমন্ত্ৰী পেড্ৰ’ ছানচেজে এই ঘটনাত শোক প্ৰকাশ কৰিছে।
দেওবাৰে সন্ধিয়া সংঘটিত হয় এই ঘটনা। আন্দালুছিয়াৰ আদামুজ অঞ্চলত মালাগাৰ পৰা মাদ্ৰিদলৈ যোৱা এখন তীব্ৰবেগী ৰে’ল হঠাতে লাইনচ্যুত হয়। স্পেইনৰ ৰে’ল নেটৱৰ্ক অপাৰেটৰ আদিফে জনায় যে ৰে’লখন ৰে’লপথৰ পৰা ওলাই বিপৰীত ট্ৰেকত প্ৰৱেশ কৰে। একে সময়তে বিপৰীত দিশৰ পৰা অহা আন এখন ৰে’লৰ সৈতে মুখামুখিকৈ সংঘৰ্ষ হয়। দুৰ্ঘটনাৰ বাবে দুয়োখন ৰে’লেই লাইনচ্যুত হয়।
আৰক্ষী সূত্ৰই জনোৱা মতে, এই পৰ্যন্ত ২১ জন লোকৰ মৃত্যু হোৱা বুলি নিশ্চিত হৈছে। আন্দালুছিয়াৰ জৰুৰীকালীন সেৱাৰ শীৰ্ষ বিষয়া এণ্টনিঅ’ ছানজে এক সংবাদমেলত কয় যে কমেও ১০০ জন লোক আহত হৈছে। মৃতকৰ সংখ্যা বৃদ্ধি পাব পাৰে বুলি তেওঁ স্পষ্টকৈ কয়। ‘আমাৰ সন্মুখত এটা অতি জটিল নিশা আছে’ বুলিও তেওঁ কয়।
পৰিবহণ মন্ত্ৰী অস্কাৰ পুয়েণ্টে কয় যে উদ্ধাৰকাৰীয়ে সংকটজনক অৱস্থাত কমেও ৩০ জন লোকক চিকিৎসালয়লৈ লৈ গৈছে। আহত সকলোকে উদ্ধাৰ কৰি চিকিৎসা কৰা হৈছে। শেহতীয়াকৈ সম্পূৰ্ণৰূপে সংস্কাৰ কৰা ৰে’লপথৰ এটা পোন অংশত দুৰ্ঘটনাস্থলীটো আছিল। প্ৰথম লাইনচ্যুত ৰে’লখন প্ৰায় নতুন আছিল, যাৰ বাবে এনে দুৰ্ঘটনা কেনেকৈ হ’ব পাৰিলে সেয়া বুজাটো কঠিন হৈ পৰিছে।
ৰে’ল কোম্পানী ইৰিঅ’ই জনোৱা মতে, মালাগা-মাদ্ৰিদ ৰে’লখনত প্ৰায় ৩০০ যাত্ৰী আছিল। উলটি যোৱা ডবা আৰু পেচ খোৱা ধাতৱ অংশত আবদ্ধ হৈ থকা যাত্ৰীসকলক মুক্ত কৰিবলৈ উদ্ধাৰকাৰীয়ে কঠোৰ পৰিশ্ৰম কৰিবলগীয়া হৈছে। কৰ্ডোবা আঞ্চলিক অগ্নিনিৰ্বাপক বাহিনীৰ মুৰব্বী ফ্ৰান্সিস্কো কাৰ্মোনাই কয় যে ডবাবোৰ ইমানেই বেঁকা হৈ পৰিছে যে ভিতৰত থকা লোকসকলক উদ্ধাৰ কৰাটো অতি কঠিন হৈ পৰিছিল। “কিছুমানক বচাবলৈ আমি মৃতদেহবোৰ আঁতৰাই দিব লগা হৈছিল।”
কিছুমান ডবা চাৰি মিটাৰ দ খাৱৈত বাগৰি পৰে। আন কিছুমান সম্পূৰ্ণ পেচ খাই পৰিছিল। দ্বিতীয়খন ৰে’লৰ যাত্ৰী মণ্টছে কয় যে হঠাতে ৰে’লখন প্ৰচণ্ড জোকাৰণিৰ সৈতে ৰৈ গ’ল, আৰু আন্ধাৰ হৈ পৰিল। শিশুসকলে কান্দিছিল, আহত কৰ্মীসকলৰ তেজ, ভয়ংকৰ পৰিস্থিতি আছিল।
সোমবাৰে এই দুৰ্ঘটনাৰ বাবে মাদ্ৰিদ আৰু কৰ্ডোবা, চেভিল, মালাগা আৰু হুৱেলভাৰ মাজত তীব্ৰবেগী পৰিসেৱা বন্ধ কৰাৰ কথা ঘোষণা কৰা হৈছে। দুৰ্ঘটনাটোত মৃত আৰু আহতসকলৰ পৰিয়ালৰ বাবে সংশ্লিষ্ট প্ৰশাসনে বিভিন্ন ষ্টেচনত সহায়ক কেন্দ্ৰ মুকলি কৰিছে। প্ৰতিৰক্ষা মন্ত্ৰালয়ে জনোৱা মতে, সেনাৰ জৰুৰীকালীন ইউনিটকো উদ্ধাৰৰ বাবে প্ৰেৰণ কৰা হৈছে।
স্পেইনৰ ৰজা ফেলিপে ষষ্ঠ আৰু ৰাণী লেটিজিয়াই এই ঘটনাত গভীৰ শোক প্ৰকাশ কৰে। ফ্ৰান্সৰ ৰাষ্ট্ৰপতি ইমানুৱেল মেক্ৰন আৰু ইউৰোপীয় কমিছনৰ মুৰব্বী উৰ্চুলা ভন ডাৰ লেয়েনকে ধৰি কেইবাগৰাকীও বিশ্ব নেতাই শোক বাৰ্তা প্ৰেৰণ কৰে।
ইউৰোপৰ ভিতৰতে সৰ্ববৃহৎ তীব্ৰবেগী ৰে’ল নেটৱৰ্ক থকাৰ পিছতো এই দুৰ্ঘটনাটোৱে ২০১৩ চনৰ চেণ্টিয়াগো ডি কম্পোষ্টেলা ৰে’ল দুৰ্যোগৰ স্মৃতি ঘূৰাই আনিছে, য’ত ৮০ জন লোকৰ মৃত্যু হৈছিল। এইবাৰো সেই স্মৃতি যেন ঘুৰি আহিল।
