যুদ্ধৰ জুই অতিক্ৰিম পশ্চিম এছিয়া শান্ত হৈছে যদিও যোৱা ৪ বছৰ ধৰি ইউৰেছিয়াত কোনো শান্তিৰ বাতাবৰণ নাই। ৰাছিয়া আৰু ইউক্ৰেইন দুয়োখন দেশতে আক্ৰমণ আৰু প্ৰত্যাক্ৰমণৰ ফলত লাখ লাখ লোক ক্ষতিগ্ৰস্ত হৈছে।
যুদ্ধ পৰিস্থিতিক অধিক তীব্ৰতা প্ৰদান কৰি ৰাছিয়াই ইউক্ৰেইনৰ ৰাজধানী কিয়েভত মাৰাত্মক আক্ৰমণ চলাইছে। বৃহস্পতিবাৰে সমগ্ৰ কিয়েভত সংঘটিত হোৱা ৰাছিয়াৰ আক্ৰমণত কমেও ২৭ জন লোক নিহত হোৱাৰ লগতে আৰু বহু লোক আহত হয়। বাতৰি অনুসৰি এই বছৰ ইউক্ৰেইনৰ ওপৰত ৰাছিয়াৰ এইটোৱেই আটাইতকৈ ডাঙৰ আক্ৰমণ।
বৃহস্পতিবাৰে নিশাৰ পৰা সমগ্ৰ কিয়েভত ৰাছিয়াই বিধ্বংসী আক্ৰমণ চলায়। ৰাজধানীলৈ শ শ ড্ৰোন আৰু কেইবা ডজন মিছাইল নিক্ষেপ কৰা হয়। ইউক্ৰেইনে প্ৰকাশ কৰিছে যে ৰাছিয়াই কমেও ৭৪টা ক্ষেপণাস্ত্ৰ আৰু ৪৯৬টা ড্ৰোন নিক্ষেপ কৰিছে। ৰাজধানীত গোটেই নিশা বিস্ফোৰণৰ শব্দ শুনা গৈছিল।
নিশা হাজাৰ হাজাৰ লোকে প্ৰাণ ৰক্ষাৰ বাবে বাংকাৰ আৰু মাটিৰ তলৰ মেট্ৰ’ ষ্টেচনলৈ পলায়ন কৰে। সমগ্ৰ চহৰখন ক’লা ধোঁৱাই আৱৰি ধৰিছিল। ইউক্ৰেইন প্ৰশাসনে এই আক্ৰমণত এতিয়ালৈকে ২৭ জন লোকৰ মৃত্যু হোৱা বুলি নিশ্চিত কৰিছে। উদ্ধাৰৰ কাম আৰম্ভ হৈছে। ধ্বংসাৱশেষৰ তলত বহু লোক আবদ্ধ হৈ থকাৰ সন্দেহ কৰা হৈছে। এই আক্ৰমণৰ ফলত মহানগৰীৰ ১৩০টা অট্টালিকা ধ্বংসপ্ৰাপ্ত হয়।
ৰাছিয়াই যেতিয়া এই আক্ৰমণ সংঘটিত কৰিছিল ইউক্ৰেইনৰ ৰাষ্ট্ৰপতি জেলেনস্কি বিদেশ ভ্ৰমণত আছিল। এই খবৰ পোৱাৰ পিছতে তেওঁ আয়াৰলেণ্ড ভ্ৰমণ সামৰি দেশলৈ উভতি আহে। এই আক্ৰমণৰ বাবে তেওঁ পশ্চিমীয়া দেশসমূহক লক্ষ্য কৰি লয়। তেওঁ কয় যে যদি তেওঁলোকে প্ৰতিশ্ৰুতি অনুসৰি সময়মতে ইউক্ৰেইনক বায়ু প্ৰতিৰক্ষা ব্যৱস্থা প্ৰদান কৰিলেহেঁতেন তেন্তে ইমান ক্ষতি নহ’লহেঁতেন।
তেওঁ কয়, “আমাৰ বন্ধুসকলে যদি প্ৰতিশ্ৰুতি অনুসৰি সময়মতে এয়াৰ ডিফেন্স চিষ্টেম প্ৰদান কৰিলেহেঁতেন, তেন্তে হয়তো আজি আমি বহুতৰে জীৱন ৰক্ষা কৰিব পাৰিলোহেঁতেন। আমি তেওঁলোকৰ পৰা কোনো অতিৰিক্ত সহায় বিচৰা নাই, কিন্তু অন্ততঃ প্ৰতিশ্ৰুতি দিয়াখিনি যোগান ধৰা উচিত।”
ইপিনে, ৰাছিয়াই এই আক্ৰমণ ইউক্ৰেইনৰ আক্ৰমণৰ প্ৰত্যুত্তৰ বুলি দাবী কৰিছে। টেলিগ্ৰামত ৰাছিয়াৰ প্ৰতিৰক্ষা মন্ত্ৰালয়ে এক বিবৃতিত কয় যে ৰাছিয়াৰ সেনাই আকাশ, সাগৰ আৰু স্থলভাগৰ পৰা মিছাইল আৰু ড্ৰ’নেৰে ইউক্ৰেইনৰ সামৰিক ঘাটি, শক্তি কেন্দ্ৰ আৰু কিয়েভকে ধৰি কেইবাটাও বিমানবন্দৰক লক্ষ্য কৰি লৈছিল। শেহতীয়াকৈ ৰাছিয়াৰ তেল শোধনাগাৰত ইউক্ৰেইনৰ ড্ৰ’ন আক্ৰমণৰ প্ৰত্যুত্তৰ স্বৰূপে এই আক্ৰমণ চলোৱা বুলি ৰাছিয়াই কয়।
