অৰ্থনৈতিক পৰিস্থিতিৰ অৱনতি ঘটাক লৈ ইৰাণত আৰম্ভ হোৱা প্ৰতিবাদত কমেও ৩৫ জন লোকৰ মৃত্যু হৈছে। ১২০০ লোকক গ্ৰেপ্তাৰ কৰা হৈছে। ধাৰাবাহিক মুদ্ৰাস্ফীতিৰ বাবে দেশৰ অৰ্থনৈতিক অৱস্থা অধিক বেয়াৰ পিনে গৈছে। ইয়াৰ বাবেই বিগত এসপ্তাহ ধৰি দেশজুৰি সংঘটিত প্ৰতিবাদৰ ফলত ইৰাণৰ পৰিস্থিতি উত্তপ্ত হৈ পৰিছে।
বাতৰি অনুসৰি নিহতসকলৰ ভিতৰত ২৯ জন প্ৰতিবাদকাৰী, চাৰিটা শিশু আৰু ইৰাণৰ নিৰাপত্তা বাহিনীৰ দুজন সদস্যও আছে। আনহাতে, ইৰাণৰ এক সংবাদ মাধ্যমৰ সূত্ৰ অনুসৰি প্ৰতিবাদৰ সময়ত প্ৰায় ২৫০ জন আৰক্ষী বিষয়া আৰু বেচিক ফৰ্চৰ ৪৫ জন সদস্য আহত হয়।
এনে পৰিস্থিতিত নতুন দিল্লীয়ে সোমবাৰে ইৰাণত থকা ভাৰতীয় নাগৰিকসকলৰ বাবে সতৰ্কবাণী জাৰি কৰে। ভাৰতৰ বৈদেশিক পৰিক্ৰমা মন্ত্ৰালয়ে কয় যে, “প্ৰয়োজন নহ’লে ইৰাণৰ ইছলামিক ৰিপাব্লিকত ওলাই নাযাব।” ভাৰতীয় নাগৰিক আৰু ভাৰতীয় মূলৰ ব্যক্তিসকলকো বিশেষভাৱে প্ৰতিবাদ বা সশস্ত্ৰ সংঘাতৰ অঞ্চললৈ যাতায়ত নকৰিবলৈ সজাগ হ’বলৈ পৰামৰ্শ দিয়া হৈছে।
ইৰাণৰ ৩১খন প্ৰদেশৰ ভিতৰত ২৫খন প্ৰদেশত প্ৰতিবাদ অব্যাহত আছে আৰু কিছুমান প্ৰদেশত ১০ জনতকৈ অধিক লোকৰ মৃত্যু হৈছে। প্ৰতিবাদৰ মূল কাৰণ হ’ল আমেৰিকান ডলাৰৰ বিপৰীতে হঠাতে ৰিয়ালৰ পতন আৰু বৃদ্ধি পোৱা মুদ্ৰাস্ফীতি।
যোৱা সপ্তাহত আমেৰিকাৰ ৰাষ্ট্ৰপতি ড’নাল্ড ট্ৰাম্পে ইৰাণক সকীয়াই দিছিল। ছ’চিয়েল মিডিয়াত তেওঁ কয়, “আমি সাজু। আমি সকলো পৰিস্থিতি নিৰীক্ষণ কৰি আছো। যদি তেওঁলোকে মানুহক হত্যা কৰিবলৈ আৰম্ভ কৰে তেন্তে আমেৰিকাই মৌনতা অৱলম্বন নকৰে।”
প্ৰতিবাদ আৰু নিৰাপত্তা পৰিস্থিতি এতিয়াও উত্তেজনাপূৰ্ণ হৈ থকাত আন্তঃৰাষ্ট্ৰীয় মহল আৰু স্থানীয় নাগৰিক উদ্বিগ্ন। ভাৰতে সতৰ্কবাণীৰ জৰিয়তে নিজৰ নাগৰিকৰ সুৰক্ষা সুনিশ্চিত কৰিবলৈ চেষ্টা কৰিছে।
