উত্তৰ প্ৰদেশৰ কেইবাখনো জিলাত প্ৰচণ্ড ধুমুহা, বজ্ৰপাত আৰু প্ৰচণ্ড বৰষুণৰ ফলত ক্ষতিগ্ৰস্ত হয়। শেহতীয়া খবৰ অনুসৰি ৮৯ জন লোকৰ মৃত্যু হৈছে। বহু ঘৰৰ ক্ষতিসাধন হৈছে। গছ আৰু বিদ্যুতৰ খুঁটা উভালি পৰাৰ বাবে স্বাভাৱিক জীৱন আৰু যাতায়ত ব্যাহত হৈছে।
উত্তৰ প্ৰদেশৰ মুখ্যমন্ত্ৰী যোগী আদিত্যনাথে ক্ষতিগ্ৰস্ত অঞ্চলসমূহত ক্ষিপ্ৰ সাহায্য আৰু উদ্ধাৰ অভিযানৰ নিৰ্দেশ দিছে। ছ’চিয়েল মিডিয়াত ভাইৰেল হৈছে ধুমুহাৰ এটা ভিডিঅ’ (ভিডিঅ’ৰ সত্যাসত্য পৰীক্ষা কৰা হোৱা নাই)। য’ত দেখা গৈছে যে এজন ব্যক্তিক প্ৰচণ্ড বতাহে উৰুৱাই লৈ যায় আৰু কেইবাশ ফুট দূৰত পেলাই দিয়ে।
উত্তৰ প্ৰদেশৰ সাহায্য আয়ুক্তৰ কাৰ্যালয়ে নিজৰ এক্স হেণ্ডেলত এটা পোষ্টত প্ৰকাশ কৰিছে যে বৃহস্পতিবাৰে দুপৰীয়া ১২ বজা পৰ্যন্ত ৫৩ জন লোক গুৰুতৰভাৱে আহত হৈছে। ১১৪টা গৰু মৃত্যু হোৱাৰ লগতে ৮৭টা ঘৰৰ ক্ষতিসাধন হোৱা বুলি জানিব পৰা গৈছে।
মুখ্যমন্ত্ৰী আদিত্যনাথে ২৪ ঘন্টাৰ ভিতৰত ক্ষতিগ্ৰস্ত পৰিয়ালক সাহায্য প্ৰদান কৰিবলৈ সকলো বিভাগীয় আয়ুক্ত আৰু জিলা দণ্ডাধীশক নিৰ্দেশ দিছে।
প্ৰয়াগৰাজ জিলা প্ৰশাসনে প্ৰকাশ কৰা তালিকা অনুসৰি ধুমুহা আৰু বৰষুণৰ ফলত হাণ্ডিয়া অঞ্চলত ৭ জন, ফুলপুৰত ৪ জন, সোৰাওনত ৩ জন, মেজাত ২ জন আৰু সদৰ অঞ্চলত এজন লোকৰ মৃত্যু হোৱা বুলি জানিব পৰা গৈছে।
ভাদোহী জিলাত ধুমুহা আৰু বৰষুণৰ ফলত ১৬ জন লোকৰ মৃত্যু হয়। ফতেহপুৰৰ অতিৰিক্ত জিলা দণ্ডাধীশ অবিনাশ ত্ৰিপাঠীয়ে জনোৱা মতে, এই জিলাত ৯ জন লোকৰ মৃত্যু হোৱাৰ বিপৰীতে ১৬ জন আহত হৈছে।
আনহাতে, প্ৰতাপগড় জিলাত প্ৰবল ধুমুহা আৰু বৰষুণৰ ফলত দেৱাল ভাঙি, চিমেণ্ট চেড ভাঙি, বজ্ৰপাতৰ দৰে পৃথক পৃথক ঘটনাত চাৰিজন লোকৰ মৃত্যু হয়। এই জিলাৰ আৰক্ষী অধীক্ষক দীপক ভূকৰে কয়, ‘লালগঞ্জ কোটিয়ালী অঞ্চলৰ ওঝা কা পূৰৱা গাঁৱত ভীম যাদৱ (২৫) নামৰ এজন যুৱকৰ চিমেণ্টৰ চেড ভাঙি তাৰ ধ্বংসাৱশেষৰ তলত পোত খোৱাৰ ফলত মৃত্যু হয়। বাঘৰাই থানা এলেকাৰ শাৰী স্বামী গাঁৱত ভূষণ পাণ্ডে (৫৬) নামৰ এজন লোকৰ দেৱাল ভাঙি মৃত্যু হয়।
পাথৰ গিৰ্জঘৰ, অশোক নগৰ, কছাৰী ৰোড, মহাত্মা গান্ধী মাৰ্গকে ধৰি বিভিন্ন অঞ্চলত জনজীৱন ব্যাহত কৰে। কল্যাণী দেৱী অঞ্চলতো এডাল জৰাজীৰ্ণ গছ উভালি পৰে। ধুমুহাৰ ফলত প্ৰয়াগৰাজৰ কেইবাটাও অঞ্চলত বিদ্যুৎ যোগান ব্যাহত হৈ পৰে। সংশ্লিষ্ট অঞ্চলৰ পৌৰসভাৰ দলে পথৰ পৰা উভালি পৰা গছ আঁতৰোৱাৰ কাম আৰম্ভ কৰিছে। শীঘ্ৰে যাতায়ত স্বাভাৱিক কৰাৰ প্ৰচেষ্টা চলোৱা হৈছে।
