সোমবাৰে সন্ধিয়া দিল্লীৰ ব্যস্ত ৰেড ফ’ৰ্ট মেট্ৰ’ ষ্টেচনৰ সমীপত এক ভয়ংকৰ বিস্ফোৰণ সংঘটিত হয়। ব্যস্ত পথত ৰখাই থোৱা এখন গাড়ীত এক শক্তিশালী বিস্ফোৰণ হোৱাৰ ফলত কমেও ৮ জন লোকৰ প্ৰাণহানি হোৱাৰ লগতে কেইবাজনো লোক আহত হয়।
প্ৰত্যক্ষদৰ্শীয়ে জনোৱা অনুসৰি, সন্ধিয়া প্ৰায় ৬:৩০ বজাৰ ওচৰত এক তীব্ৰ বিস্ফোৰণৰ শব্দ শুনা গৈছিল।
খবৰ পোৱাৰ লগে লগে দিল্লী অগ্নিনিৰ্বাপক বাহিনীয়ে ঘটনাস্থলীলৈ ৭ খন অগ্নিনিৰ্বাপক বাহিনীৰ গাড়ী প্ৰেৰণ কৰে আৰু তেওঁলোকে জুই নিয়ন্ত্ৰণলৈ আনে।
বিস্ফোৰণৰ কিছু সময়ৰ পাছতে দিল্লী আৰক্ষীৰ বিশেষ কোষ আৰু ফৰেনছিক বিশেষজ্ঞৰ এটা দলে ক্ষয়-ক্ষতিৰ পৰিসৰ মূল্যায়ন আৰু প্ৰয়োজনীয় প্ৰমাণ সংগ্ৰহৰ বাবে ঘটনাস্থলীত উপস্থিত হয়।
বিস্ফোৰণৰ সঠিক কাৰণ এতিয়াও জানিব পৰা হোৱা নাই আৰু তদন্ত অব্যাহত আছে। প্ৰাথমিক প্ৰতিবেদনসমূহে নিশ্চিত কৰিছে যে বিস্ফোৰণটো ৰেড ফ’ৰ্ট মেট্ৰ’ ষ্টেচনৰ ১ নং গেটৰ ওচৰত ৰখাই থোৱা এখন গাড়ীৰ পৰা আৰম্ভ হৈছিল।
বিষয়াসকলে বৰ্তমান এইটো এটা যান্ত্ৰিক বিজুতি নে কোনো বিস্ফোৰক যন্ত্ৰৰ দ্বাৰা সংঘটিত হৈছে, সেই সম্ভাৱনাও নুই কৰা নাই।
