‘তেওঁ সময়ে সময়ে আজমলতকৈ বেছি মুছলমান আৰু এতিয়া মোহন ভাগৱততকৈ বেছি আৰ এছ এছ ‘ দেওবাৰে ৰাজীৱ ভৱনত অনুষ্ঠিত এখন সংবাদমেলত হিমন্ত বিশ্ব শর্মাক এইদৰে কটাক্ষ কৰে কংগ্ৰেছী নেতা তথা তেওঁৰ একালৰ সতীৰ্থ ৰকিবুল হুছেইনে।
সংবাদমেলত তেওঁ, হিমন্ত বিশ্বই কংগ্ৰেছৰ শাসনকালত অসম চুক্তি ৰূপায়ণ দপ্তৰৰ মন্ত্ৰী হৈ থাকোতে ডি-ভোটাৰসকলক NRCত নাম অন্তৰ্ভুক্ত কৰিবলৈ ভূমিধৰ বৰ্মণক আহ্বান জনাইছিল বুলি তথ্য সহকাৰে উল্লেখ কৰে।
‘তেওঁ তেতিয়া NRCত ডি-ভোটাৰৰ নাম সোমোৱাই দিব লাগে বুলি কৈছিল। ২০১০ চনৰ ২২ নৱেম্বৰত দিনৰ ১০ বজাত উপ কমিটিৰ অধ্যক্ষ ভূমিধৰ বৰ্মণৰ হাতত তেওঁ কাৰ্য্য বিৱৰণী অৰ্পন কৰিছিল। ডি-ভোটাৰৰ ইলেক্ট্ৰৰেল ৰোলৰ লগতহে সম্পৰ্ক আছে, NRCৰ লগত কোনোধৰণৰ সম্পৰ্ক নাই বুলিও উল্লেখ কৰিছিল’ ৰকিবুলে কয়।
ৰকিবুলৰ মতে পূৰ্বে NRCৰ কৃতিত্ব লোৱা বিজেপিয়ে এতিয়া ইয়াক সম্পূৰ্ণৰূপে নাকচ কৰিবলৈ বিচৰাত তেওঁলোকে অসমৰ ৰাইজক ক্ষমা খোজা উচিত।
২০২১ চনৰ নিৰ্বাচনত কংগ্ৰেছ শাসনলৈ আহিলে অসম চুক্তিৰ ভিত্তিত যিখন NRC ইতিমধ্যে হ’ল সেইখন বাহাল ৰাখিব বুলি উল্লেখ কৰি ৰকিবুল হুছেইনে কয়, ‘অসমত নতুন NRC নাকচ কৰিম।‘
