বৰপেটা জিলাৰ হাউলী চহৰত আজি এ টি এমৰ ভিতৰত সোমাই আনৰ এ টি এম কাৰ্ড কৌশলেৰে সৰকাবলৈ চেষ্টা কৰা প্ৰবঞ্চক দলৰ এজন সদস্য ৰাইজৰ হাতত ধৰা পৰে। ধৃত প্ৰৱঞ্চকজনৰ ঘৰ হৈছে হাৰিয়ানাত।
প্ৰাপ্ত তথ্য মতে হাউলী চহৰৰ বজাৰৰ ভিতৰত থকা ষ্টেট বেংক অব ইণ্ডিয়াৰ এ টি এমৰ পৰা চহৰৰে কেইজনমান লোকে টকা উলিয়াবলৈ সোমাইছিল। এই লোকসকলৰ মাজতে সোমাই উক্ত প্ৰৱঞ্চকজনে এজন লোকৰ এ টি এম কাৰ্ডখন কৌশলেৰে সৰকাবলৈ চেষ্টা কৰিছিল।
হিন্দীভাষী যুৱকজনৰ আচৰণত সন্দেহ ওপজাত এ টি এমটোৰ ভিতৰত থকা লোকসকলে লগে লগে তেওঁক আটক কৰি সোধপোচ চলাই পিছত হাউলী আৰক্ষীক গটাই দিয়ে।
আৰক্ষীৰ জেৰাত আটকাধীন যুৱকজনে হাৰিয়ানৰ মেৱাট জিলাৰ হাকাম আলী বুলি স্বীকাৰোক্তি দিয়ে। আনহাতে, আৰক্ষীয়ে যুৱকজনৰ কবলৰ পৰা অন্য লোকৰ তিনিখনকৈ এ টি এম কাৰ্ড আৰু নগদ ৩৮ হাজাৰ টকা উদ্ধাৰ কৰে।
তদুপৰি আৰক্ষীয়ে প্ৰৱঞ্চক দলটোৱে ব্যৱহাৰ কৰা এইছ আৰ-২৮-এইছ-২১৩৮ নম্বৰৰ এখন মাৰুতি ছুইফট গাড়ীও জব্দ কৰে। অৱশ্যে প্ৰৱঞ্চকৰ দলটোৰ বাকী সদস্যসকল পলাই যাবলৈ সক্ষম হয় বুলি আৰক্ষীয়ে জানিবলৈ দিয়ে।
