নিশা জুবিনক আক্ৰমণৰ চেষ্টা ৬ দুৰ্বৃত্তৰ।
নিশা ষ্টুডিঅ’ত গান ৰেকৰ্ডিং কৰি কাহিলিপাৰা বাসগৃহলৈ উভতি অহাৰ পথতে গণেশগুৰিৰ গণেশ মন্দিৰৰ সন্মুখত জুবিনক আক্ৰমণৰ চেষ্টা চলাই ৬ দুৰ্বৃত্তই।
ঘটনা বিবৰণী অনুসৰি গণেশ মন্দিৰৰ সমীপত ৰাজপথত কাম কৰি থকা শ্ৰমিকক অশালীন গালি-গালাজ কৰি আছিল সুৰামত্ত ৬ জন যুৱকে৷
সেই সময়তে সেই ঠাইৰে পাৰ হৈ গৈছিল জুবিন গাৰ্গ৷
জুবিনে গাড়ী ৰখাই যুৱককেইজনক বাধা দিবলৈ চেষ্টা কৰোঁতে যুৱকেইজনে জুবিনক আক্ৰমণ কৰিবলৈ আগবাঢ়ি আহে।
আনকি জুবিনক বহু অশ্ৰাব্য ভাষা প্ৰয়োগ কৰি গালি-গালাজ কৰে যুৱককেইজনে।
সুৰামত্ত যুৱককেইজনৰ হাতত বিয়েৰৰ বটল আছিল বুলি জানিব পৰা গৈছে।
এই ঘটনা সন্দৰ্ভত ইতিমধ্যে দিছপুৰ থানাত নিশাই এজাহাৰ দাখিল কৰিছে জুবিন গাৰ্গে।
নিশা প্ৰায় ১২:৪০ বজাত এই ঘটনা সংঘটিত হোৱা বুলি এজাহাৰত উল্লেখ কৰিছে জুবিনে।
এজাহাৰত জুবিনে উল্লেখ কৰা অনুসৰি দুৰ্বৃত্তৰ দলটো AS-01BY-0675 নম্বৰৰ গাড়ীত আহিছিল৷
জুবিনক আক্ৰমণৰ চেষ্টা কৰা যুৱক অহা গাড়ীখনৰ সৈতে গাড়ীখনৰ গৰাকী হীৰক ৰাজবংশী। AS 01BY 0675 নম্বৰৰ গাড়ীখনত দুৰ্বৃত্ত অহা বুলি এজাহাৰত উল্লেখ কৰিছিল জুবিনে।
বৰ্তমান দিছপুৰ আৰক্ষীয়ে সমগ্ৰ ঘটনাৰ সন্দৰ্ভত তদন্ত আৰম্ভ কৰিছে। জানিব পৰা মতে JB আইন মহাবিদ্যালয়ত অধ্যয়নৰত ৰাজবংশী কামৰূপ মেট্ৰো NSUI ৰ উপ সভাপতি।
ইপালে জানিব পৰা মতে হীৰকজ্যোতি ৰাজবংশী বৰ্তমান পলাতক। তেওঁ ফেচবুক একাউণ্ট ইতিমধ্যে নিজে ডি এক্টিভেট কৰিছে।
আৰক্ষীয়ে হীৰকৰ পূৱ শৰণীয়া গৃহৰ পৰা জ্যেষ্ঠ ভাতৃ অমৰজ্যোতি ৰাজবংশীক সোধা পোছাৰ বাবে আটক কৰিছে। তেওঁ সংবাদ মাধ্যমত কৰা ভাষ্য অনুসৰি তেওঁ এই ঘটনাৰ সৈতে জড়িত নহয়, ভায়েক হে জড়িত।
এই আক্ৰমণৰ ঘটনাক তীব্ৰ গৰিহণা দিছে জুবিন ফেন ক্লাবে। ফেন ক্লাবে আক্ৰমণকাৰীক উচিত শাস্তি প্ৰদানৰো দাবী জনাইছে।
উল্লেখযোগ্য যে, কৃষি বিপ্লৱৰ সৈতে জড়িত হৈ ‘পথাৰো আমাৰ বজাৰো আমাৰ’ নামেৰে জাগৰণ সৃষ্টি কৰাৰ সময়তে বহুতৰে সমালোচনাৰ সন্মুখীন হৈছিল জুবিন গাৰ্গ।
‘কা’ বিৰোধী আন্দোলনত চৰকাৰক বিভিন্ন বাক্যবাণেৰে ঠকা-সৰকা কৰা জুবিনে অসম চৰকাৰৰ কৃষি বিভাগৰ ‘ব্ৰেণ্ড এম্বেছাডৰ’ ঘোষণা কৰালৈ ছ’চিয়েল মিডিয়াত বহু সমালোচনাৰ সন্মুখীন হৈছে৷
