সপ্তদশ লোকসভাৰ আজিৰ প্ৰথমখন অধিৱেশনৰ প্ৰথম দিনটোত নৱ নিৰ্বাচিত সাংসদসকলৰ মাজৰ বহুকেইজন সাংসদে শপত বাক্য পাঠ কৰে। অসমৰ পৰা নিৰ্বাচিত ১৪ গৰাকী সাংসদৰ ভিতৰত ১৩ গৰাকী সাংসদেই আজি সাংসদ হিচাপে শপত বাক্য পাঠ কৰে।
লোকসভাৰ প্ৰ’টেম স্পীকাৰৰ সন্মুখত শপত বাক্য পাঠ কৰা অসমৰ সাংসদসকলৰ ভিতৰত আছে ৰামেশ্বৰ তেলী, প্ৰদ্যুত বৰদলৈ, প্ৰদান বৰুৱা, পল্লৱ লোচন দাস, কুইন ওজা, গৌৰৱ গগৈ, তপন গগৈ, নৱ কুমাৰ শৰণীয়া, কৃপানাথ মাল্লা, ৰাজদ্বীপ ৰয়, হৰেণ সিং বে, আব্দুল খালেক আৰু দিলীপ শইকীয়া।
আনহাতে, লোকসভাৰ প্ৰথম দিনটোত শপত গ্ৰহণৰ বাবে আমন্ত্ৰণ নাপালে অসমৰ ধুবুৰী লোকসভা সমষ্টিৰ এ আই য়ু ডি এফৰ সাংসদ বদৰুদ্দিন আজমলে। স্বাভাৱিকতে, অসমৰ বাকী আটাইকেইজন সাংসদে শপতবাক্য পাঠ কৰাৰ বিপৰীতে বদৰুদ্দিন আজমল অনুপস্থিত নথকাৰ বিষয়টোৱে প্ৰতিক্ৰিয়াৰ সৃষ্টি কৰে।
অৱশ্যে, লোকসভা সচিবালয়ে প্ৰথম দিনটোত শপত লোৱাৰ বাবে আমন্ত্ৰণ জনোৱা সাংসদসকলেহে আজি শপতবাক্য পাঠ কৰে। সচিবালয়ৰ পৰা অসমৰ ১৩ গৰাকী সাংসদে শপত লোৱাৰ বাবে আমন্ত্ৰণ পোৱাৰ বিপৰীতে একমাত্ৰ সাংসদ বদৰুদ্দিন আজমলেহে আজি আমন্ত্ৰণ নাপালে।
এক সূত্ৰৰ পৰা জানিব পৰা মতে, কাইলৈ ন’হলে পৰহিলৈ সাংসদ আজমলে লোকসভাৰ সাংসদ হিচাপে শপত ল’ব। লোকসভাৰ ৫৪৩ জন সদস্যৰ শপত গ্ৰহণ একেদিনাই অনুষ্ঠিত কৰাটো সম্ভৱ নহয় আৰু সেয়েহে পৰ্যায়ক্ৰমে সাংসদসকলক আমন্ত্ৰণ জনোৱা হয়।
সেয়া যিয়েই নহওক, লোকসভাৰ প্ৰথম দিনটোত ৰাজ্যখনৰ পৰা নিৰ্বাচিত বাকী ১৩ জন সাংসদেই শপত লোৱাৰ সময়ত একমাত্ৰ বদৰুদ্দিন আজমল অনুপস্থিত থকাটোৱে বিভিন্ন মহলত চৰ্চা লাভ কৰিছে।