ছিৰিয়াৰ গৃহযুদ্ধৰ ফলত ক্ষতিগ্ৰস্ত হোৱা শিশুসকলৰ হৈ সাহসীকতাৰে মাত মাতি বিশ্বজুৰি পৰিচিতি লাভ কৰা ১৬ বছৰীয়া বানা আল-আবেদক কিডছৰাইটছ ফাউণ্ডেচনে (KidsRights Foundation) এই বৰ্ষৰ আন্তঃৰাষ্ট্ৰীয় শিশু শান্তি পুৰস্কাৰ প্ৰদান কৰিছে। বিগত কেইবা বছৰ ধৰি এই কিশোৰীগৰাকীয়ে বিশ্বৰ সংঘাতপূৰ্ণ অঞ্চলসমূহত শান্তিৰ বাৰ্তা কঢ়িয়াই ফুৰা এগৰাকী শান্তিদূতৰ ভূমিকা পালন কৰি আহিছে।
নেদাৰলেণ্ডস্থিত কিডছৰাইটছ ফাউণ্ডেচনৰ মতে, ২০১৬ চনত পৰিয়ালৰ সৈতে তুৰস্কলৈ স্থানান্তৰিত হোৱা বানা আল-আবেদক তেওঁৰ অতুলনীয় মানৱীয় কৰ্মৰ বাবে এই পুৰস্কাৰ দিয়া হৈছে। ফাউণ্ডেচনে উল্লেখ কৰিছে যে বানা আল-আবেদে কেৱল ক্ষতিগ্ৰস্ত পৰিয়ালক পুনৰ একত্ৰিত কৰা, বিদ্যালয়সমূহ পুনৰ আৰম্ভ কৰাৰ বাবে কাম কৰাই নহয়, বৰঞ্চ গাজা, চুডান, ইউক্ৰেইন আৰু ছিৰিয়াৰ দৰে সংঘাতৰ মাজত থকা শিশুসকলৰ বাবেও আশাৰ এক প্ৰতীক হিচাপে পৰিগণিত হৈছে।
শিশুৰ অধিকাৰৰ বাবে বিশ্বব্যাপী মাত উল্লেখ্য যে ছিৰিয়া এতিয়াও বিশ্বজুৰি সংঘাতৰ এক মূল কেন্দ্ৰ হৈ আছে, য’ত লাখ লাখ লোকে প্ৰাণ হেৰুৱাইছে। এনে কঠিন পৰিস্থিতিত আল-আবেদে অহৰহ শিশুৰ অধিকাৰৰ বাবে মাত মাতি আহিছে। তেওঁ এই উদ্দেশ্য আগত ৰাখি বিশ্বজুৰি বহু সন্মিলনত অংশগ্ৰহণ কৰিছে, তুৰস্ক আৰু জৰ্ডানৰ শৰণাৰ্থী শিবিৰত থকা শিশুসকলক সাক্ষাৎ কৰিছে, দুখনকৈ গ্ৰন্থ লিখিছে আৰু ফ্ৰান্সৰ ৰাষ্ট্ৰপতি ইমানুৱেল মেক্ৰোঁকে ধৰি বিশ্বৰ নেতাসকলৰ পৰা সমৰ্থন লাভ কৰিছে।
ষ্টকহ‘মৰ চিহল্লাত পুৰস্কাৰ গ্ৰহণ কৰি দিয়া ভাষণত আল-আবেদে সকলো নেতাকে উদ্দেশ্যি কয়:
“মনত কোনো ভয় নোহোৱাকৈ মই ছিৰিয়াৰ প্ৰাক্তন ৰাষ্ট্ৰপতি বাশ্বাৰ আল-আছাদ, ইজৰাইলৰ প্ৰধানমন্ত্ৰী বেঞ্জামিন নেতান্যাহু, ৰাছিয়াৰ ৰাষ্ট্ৰপতি ভ্লাদিমিৰ পুটিন, চুডানৰ নেতাসকল আৰু সমগ্ৰ বিশ্বৰ আন সকলো নেতাসকলক সুধিছো: আপোনালোকে কিমান শিশুৰ জীৱন আৰু সপোনক যুদ্ধৰ দ্বাৰা কাঢ়ি নিব? শাসন ব্যৱস্থাৰে নিজৰ নাগৰিকক হত্যা কৰা, যুদ্ধক ৰাজনৈতিক এজেণ্ডা হিচাপে বিক্ৰী কৰা, নিৰাপত্তাৰ নামত আক্ৰমণক ন্যায্যতা প্ৰদান কৰা, আৰু হিংসাক ইচ্ছাকৃত নীতিত পৰিণত কৰা সকলক মই প্ৰশ্ন কৰিছো।”
“এই কথা জানি থওক: আপোনাৰ কামৰ হিচাপ নোহোৱাকৈ নাথাকে। তেজক শাসন বা ক্ষমতাৰ মাধ্যম হিচাপে গঢ়ি তোলা সকলৰ সন্মুখত আমি মৌন হৈ নাথাকো।”
অনুষ্ঠানৰ পূৰ্বে দিয়া এক সাক্ষাৎকাৰত আল-আবেদে স্পষ্ট কৰি দিয়ে যে যুদ্ধক্ষেত্ৰৰ শিশুসকলক পুনৰ বিদ্যালয়ত পঢ়িবলৈ সক্ষম কৰাটোৱেই তেওঁৰ প্ৰথম আৰু প্ৰধান লক্ষ্য। তেওঁৰ মতে, শিক্ষাই শিশুসকলক আশা আৰু বিকাশৰ সুযোগ দিয়ে, যি কোনো সহায়তকৈ অধিক গুৰুত্বপূৰ্ণ।
তেওঁ কয় যে যুদ্ধই শিশুসকলক তেওঁলোকৰ শৈশৱৰ পৰা বঞ্চিত কৰিছে। “যুদ্ধত শিশুসকলক প্ৰাপ্তবয়স্ক হ‘বলৈ আৰু এই বয়সতে পৰিৱেশটো বুজিবলৈ বাধ্য কৰা হয়।”
যদিও তেওঁৰ পৰিয়ালটো পলায়ন কৰাৰ পিছত আল-আবেদ ছিৰিয়ালৈ ঘূৰি অহা নাই, তথাপি তেওঁ দেশখন আৰু বিদ্যালয়সমূহ পুনৰ নিৰ্মাণত সহায় কৰিবলৈ দৃঢ়সংকল্পবদ্ধ। তেওঁ দুঃখ প্ৰকাশ কৰে যে ছিৰিয়াৰ বিদ্যালয়সমূহত কোনো সা-সুবিধা নাই; “একো নাই। ল’ৰা-ছোৱালীক মজিয়াত বহিবলৈ বাধ্য কৰা হয়। ঠাণ্ডা লাগে, হোৱাইটব’ৰ্ড, কিতাপ, ডেস্ক, শিক্ষাৰ সামগ্ৰী নাই।”
বানা আল-আবেদে এতিয়াও যুদ্ধৰ সময়ত পৰিয়ালৰ পৰা বিচ্ছিন্ন হোৱা আৰু ভাগ্য অনিশ্চিত হৈ থকা পাঁচ হাজাৰ ছিৰিয়ান শিশুক পুনৰ একত্ৰিত কৰাৰ বাবে কাম কৰি আছে। কিডছৰাইটছৰ প্ৰতিষ্ঠাপক আৰু অধ্যক্ষ মাৰ্ক ডালাৰ্টে আল-আবেদৰ ‘সাহস, দৃঢ়তা আৰু ন্যায়ৰ প্ৰতি অটল দায়বদ্ধতা’ক প্ৰশংসা কৰি কয় যে তেওঁ নিজৰ দুখজনক কাহিনীক শক্তিশালী সমৰ্থনৰ মঞ্চলৈ ৰূপান্তৰিত কৰিছে।
এই সন্মান লাভ কৰা পূৰ্বৰ বিজয়ীসকলৰ ভিতৰত চুইডেনৰ জলবায়ু কৰ্মী গ্ৰেটা থানবাৰ্গ আৰু শান্তিৰ নোবেল বঁটা বিজয়ী মালালা ইউছুফজাইও আছে।
